កីឡាជាតិ
ជាតិ
ណាហ្គាវើលបញ្ចប់បេសកកម្មនៅ AFC Cup ក្រោយឈ្នះ១ប្រកួត និងចាញ់៥ប្រកួត សកម្មភាពប្រកួតជើងទី២រវាងក្រុមណាហ្គាវើលជាមួយ Yangon United នៅមីយ៉ាន់ម៉ា, រូបភាពពី AFC
× ក្រុមបាល់ទាត់ណាហ្គាវើល បានបញ្ចប់បេសកកម្មក្នុងព្រឹត្តិការណ៍ AFC Cup 2019 ដោយឈរបាតតារាងពូល F ក្រោយចាញ់ក្រុម Yangon United ក្នុងលទ្ធផល ២-០ នាជំនួបចុងក្រោយកាលពីថ្ងៃទី១៥ ខែឧសភា ឆ្នាំ២០១៩។ នាជំនួបចុងក្រោយនៅលើទឹកដី Yangon ខ្សែការពារ Anderson Zogbe របស់ណាហ្គាបានបង្កកំហុសដោយផ្តល់បាល់ពិន័យ១១ម៉ែត្រដល់ម្ចាស់ផ្ទះចំនួនពីរលើក។
បរាជ័យ ២-០ នាជំនួបចុងក្រោយជាមួយក្រុម Yangon United របស់មីយ៉ាន់ម៉ា ធ្វើឲ្យក្រុមណាហ្គាវើលក្រោមការដឹកនាំរបស់លោក មាស ចាន់ណា ឈរបាតតារាងពូល F នៃព្រឹត្តិការណ៍ AFC Cup 2019 មាន៣ពិន្ទុ។ លទ្ធផលជារួមក្នុងចំណោម៦ប្រកួត ណាហ្គាស្គាល់ជ័យជម្នះតែមួយលើកប៉ុណ្ណោះ ក្រោយយកឈ្នះ Yangon United ២-១ នាជំនួបជើងទី១នៅពហុកីឡដ្ឋានជាតិ។ ប៉ុន្តែកាលណោះ Yangon United បានបាត់បង់សមាជិក១រូបតាំងពីនាទីទី៦។
សម្រាប់ជំនួបចុងក្រោយជាមួយ Yangon កាលពីថ្ងៃទី១៥ ឧសភា ខ្សែការពារ Anderson Zogbe របស់ណាហ្គាវើលបានបង្កកំហុស ដោយផ្តល់បាល់ប៉េណាល់ទីពីរលើកដល់ក្រុមម្ចាស់ផ្ទះ Yangon United។ ប៉ុន្តែអ្នកចាំទី ស៊ូ យ៉ាទី អាចសង្គ្រោះបាន១លើកពីការស៊ុតរបស់កីឡាករ Sekou Sylla ខណៈកីឡាករ Vinicius Miller ទាត់បានសម្រេច ដើម្បីបន្ថែមលើគ្រាប់បាល់ស៊ុតពីចម្ងាយរបស់ Maung Maung Lwin ដើម្បីនាំជ័យជម្នះ ២-០ សម្រាប់ក្រុមម្ចាស់ផ្ទះ។
ជំនួបរវាងក្រុមទាំងពីរ គឺជាជំនួបប្រវត្តិសាស្ត្ររបស់សហព័ន្ធកីឡាបាល់ទាត់ទ្វីបអាស៊ី(AFC)។ ព្រោះអាជ្ញាកណ្តាលកាត់សេចក្តីក្នុងជំនួបនេះសុទ្ធសឹងជាស្ត្រី ដែលពុំធ្លាប់មានពីមុនមក។ អាជ្ញាកណ្តាលជនជាតិជប៉ុនទាំងបីរួមមានអាជ្ញាកណ្តាលកាត់សេចក្តីលើទីលាន Yoshimi Yamashita និងអាជ្ញាកណ្តាលខ្សែបន្ទាត់ Makoto Bozono និង Naomi Teshirogi។
ក្រុម Hanoi FC របស់វៀតណាមឈរកំពូលតារាងពូល F ក្រោយឈ្នះ៤ ស្មើ១ និងចាញ់១ ខណៈក្រុម Tampines Rovers របស់សិង្ហបុរី ស្ថិតនៅលេខរៀងទី២ ក្រោយឈ្នះ៤ ស្មើ១ និងចាញ់១ ដូចគ្នា តែចាញ់គ្រាប់បាល់ចំណេញ Hanoi។ ចំណែកក្រុម Yangon United ឈរលេខរៀងទី៣មាន៦ពិន្ទុ ក្រោយឈ្នះ២ ចាញ់៤៕
Tag:
ណាហ្គាវើល
AFC Cup 2019
Yangon United
© រក្សាសិទ្ធិដោយ thmeythmey.com