ភ្នំពេញ៖ រដ្ឋាភិបាលអាល្លឺម៉ង់ បានប្តេជ្ញាបន្តចូលរួមលុបបំបាត់ភាពក្រីក្រក្នុងប្រទេសកម្ពុជា តាមរយៈការជួយគាំទ្រទាំងផ្នែកហិរញ្ញវត្ថុ និងផ្នែកបច្ចេកទេស ដែលមានទំហំទឹកប្រាក់ជាង ៤៨.៦ លានអឺរ៉ូ (ប្រមាណ ៥៤ លានដុល្លារ) សម្រាប់អនុវត្តន៍ក្នុងឆ្នាំ២០១៩ និង២០២០។ អាល្លឺម៉ង់សង្ឃឹមថាគម្រោងទាំងនេះនឹងជួយឲ្យមានការប្រែប្រួលជាវិជ្ជមានដល់ជីវភាពនិងការរស់នៅរបស់ប្រជាពលរដ្ឋនៅតាមជនបទ។ នេះបើយោងតាមសេចក្តីប្រកាសព័ត៌មាននៃស្ថានទូតអាល្លឺម៉ង់ប្រចាំនៅកម្ពុជា។
ក្រោយកិច្ចប្រជុំទ្វេភាគីរវាង លោក Norbert Barthle សមាជិកសភាសហព័ន្ធអាល្លឺម៉ង់ និងលោក ឈៀង យ៉ាណារ៉ា រដ្ឋមន្ត្រីប្រតិភូអមនាយករដ្ឋមន្ត្រី កាលពីថ្ងៃទី១៥ ខែឧសភា ឆ្នាំ២០១៩ ក្នុងរដ្ឋធានីប៊ែរឡាំងនោះ រដ្ឋាភិបាលអាល្លឺម៉ង់បានសម្រេចផ្តល់ជំនួយលើគម្រោងវិមជ្ឈការ ដើម្បីពង្រឹងប្រព័ន្ធគណនេយ្យភាពសង្គម ផ្នែកសុខភាពសាធារណៈ និងការអភិវឌ្ឍជនបទ ក្នុងទំហំទឹកប្រាក់ ៤៨.៦ លានអឺរ៉ូ (ប្រមាណ ៥៤ លានដុល្លារ) ដែលមានរយៈពេលពីរឆ្នាំ (ឆ្នាំ ២០១៩ ដល់ឆ្នាំ២០២០)។
បើតាមសេចក្តីប្រកាសព័ត៌មានរបស់ស្ថានទូតអាល្លឺម៉ង់ ថវិកាទាំងនេះនឹងអនុវត្តលើគម្រោងដូចជា គម្រោងគណនេយ្យភាពសង្គម ក្នុងទំហំទឹកប្រាក់ ៥ លានអឺរ៉ូ (ជាជំនួយឥតសំណង), គម្រោងកំណត់អត្តសញ្ញាណគ្រួសារក្រីក្រ មានទំហំទឹកប្រាក់ ១,៣ លានអឺរ៉ូ (ជំនួយបច្ចេកទេស), គម្រោងគាំពារសុខភាពសាធារណៈ ក្នុងទំហំទឹកប្រាក់ ២ លានអឺរ៉ូ (ជំនួយបច្ចេកទេស), គម្រោងកសាងហេដ្ឋារចនាសម្ព័ន្ធជនបទ ក្នុងទំហំទឹកប្រាក់ ០.១ លានអឺរ៉ូ (ជាជំនួយឥតសំណង) និង ៣០ លានអឺរ៉ូ ជាជំនួយឥណទានសម្បទាន, និងគម្រោងអភិវឌ្ឍសេដ្ឋកិច្ចថ្នាក់តំបន់ មានទំហំទឹកប្រាក់ ៨លានអឺរ៉ូ (ជំនួយបច្ចេកទេស)។
ក្រៅពីគម្រោងខាងលើនេះរដ្ឋាភិបាលអាល្លឺម៉ង់ ក៏គ្រោងនឹងផ្តលជំនួយហិរញ្ញវត្តុ ចំនួន ១០ លានអឺរ៉ូ (ប្រមាណ ១១ លានដុល្លារ) សម្រាប់គម្រោងអាហាររូបត្ថម្ភកម្ពុជា ដែលជាគម្រោងរួមគ្នាជាមួយធនាគារពិផពលោក ស្ថាប័នហិរញ្ញវត្តុអន្តរជាតិ អូស្ត្រាលី។ ហើយរដ្ឋាភិបាលអាល្លឺម៉ង់ ក៏បានគ្រោងនឹងផ្តល់ឥណទានថ្មី (កម្ចី) លើគម្រោងកសាងហេដ្ឋារចនាសម្ព័ន្ធជនបទ ក្នុងទំហំទឹកប្រាក់លើសពី ៨០ លានអឺរ៉ូ (ប្រមាណ ៨៩ លានដុល្លារ) ដែលជាគម្រោងរួមគ្នារវាងទីភ្នាក់ងារបារាំងសម្រាប់ការអភិវឌ្ឍ (AFD) និងសហភាពអឺរ៉ុប។
លោក Norbert Barthle បាននិយាយថា៖« មិត្តភាពកម្ពុជានិងអាល្លឺម៉ង់នៅតែរឹងមាំ។ ការលុបបំបាត់ភាពក្រីក្រ និងការកើនឡើងនៃវិបុលសុខសម្រាប់ទាំងអស់គ្នា គឺជាគោលដៅរួមរបស់ពួកយើង»។
ជាមួយគ្នានោះរដ្ឋាភិបាលអាល្លឺម៉ង់ និងកម្ពុជាក៏បានជជែកពិភាក្សាលើបញ្ហាប្រជាធិបតេយ្យ ការគោរពសិទ្ធិមនុស្ស និងសិទ្ធិនយោបាយផងដែរ។ អាល្លឺម៉ង់បានជំរុញឲ្យកម្ពុជាពង្រឹងការអនុវត្តច្បាប់ ឲ្យស្របទៅនឹងកាតព្វកិច្ចសិទ្ធិមនុស្សអន្តរជាតិ ដើម្បីគេចផុតពីការព្យួរភាពអនុគ្រោះពន្ធពីសហភាពអឺរ៉ុប។
សមាជិកសភាសហព័ន្ធអាល្លឺម៉ង់ បាននិយាយថា៖« ប្រសិនបើលំហនយោបាយ និងសង្គមពិតជាត្រូវបានបើកចំហ កម្ពុជានឹងអាចគេចផុតពីការបាត់បង់នូវក្របខ័ណ្ឌគាំពារពិសេសផ្នែកពាណិជ្ជកម្ម (EBA Preferences) ។ ច្បាប់ជាតិ និងការអនុវត្តជាក់ស្ដែងត្រូវតែស្របតាមកាតព្វកិច្ចសិទ្ធិមនុស្សអន្តរជាតិ ដូចជាសេរីភាពនៃការបញ្ចេញមតិ និងសេរីភាពខាងការជួបជុំនិងប្រមូលផ្តុំ។ ខ្ញុំជឿជាក់ថា វាមិនពិបាកនឹងសម្រេចទេ»។
គួរបញ្ជាក់ថា កម្ពុជា កំពុងស្ថិតនៅក្រោមនីតិវិធីតាមដាន និងត្រួតពិនិត្យរបស់សហភាពអឺរ៉ុប លើការសម្រេចចិត្តបន្ត ឬដកការអនុគ្រោះពន្ធ(Everything But Arms) ពីកម្ពុជាវិញ។ ដំណើការនីតិវិធីរបស់សហភាពអឺរ៉ុបនេះ គឺមានរយៈ២០ខែ មុននឹងឈានដល់ការសម្រេចចិត្តចុងក្រោយ៕