អន្តរជាតិ
ន័រវ៉េស លូកដៃជួយសម្របសម្រួលវិបត្តិនៅវ៉េណេស៊ុយអេឡា
× មេដឹកនាំប្រឆាំងវ៉េណេស៊ុយអេឡា ហ័ន ក្វៃដូ នៅថ្ងៃទី១៦ ខែឧសភា បានប្រកាសពីការបញ្ជូនបេសកជនពិសេសទៅកាន់ន័រវ៉េស ដើម្បីចូលរួមក្នុងកិច្ចសម្របសម្រួលរបស់រដ្ឋអឺរ៉ុបមួយនេះ សំដៅដោះស្រាយបញ្ហាស្រុកទេសជាមួយរដ្ឋាភិបាលលោក នីកូឡាស់ ម៉ាឌុយរ៉ូ ។ ប៉ុន្តែលោក ក្វៃដូ អះអាងថា តំណាងក្រុមប្រឆាំង មិនបានជួបចរចាជាមួយមន្ត្រីរបស់លោក ម៉ាឌុយរ៉ូ ដែលធ្វើទស្សនកិច្ចនៅនៅទីក្រុងអូស្លូឡើយ។
ខណៈស្ថានការណ៍នយោបាយនៅវ៉េណេស៊ុយអេឡាកំពុងតែក្ដៅ រឿងរ៉ាវក្រៅឆាកឯណោះវិញកំពុងកើតឡើងនៅឯទឹកដីន័រវ៉េស។ រដ្ឋាភិបាលន័រវ៉េស កំពុងដើរតួសម្របសម្រួលរវាងក្រុមប្រឆាំងនៅវ៉េណេស៊ុយអេឡា និងរដ្ឋាភិបាលប្រធានាធិបតី នីកូឡាស់ ម៉ាឌុយរ៉ូ ។ មេដឹកនាំក្រុមប្រឆាំង ហ័ន ក្វៃដូ ប្រកាសព័ត៌មាននេះនៅថ្ងៃទី១៦ ខែឧសភា ប៉ុន្តែលោកបានបដិសេធថា គ្មានការចរចាអ្វីទាំងអស់មកទល់ពេលនេះ។
ថ្លែងទៅកាន់ក្រុមអ្នកគាំទ្ររបស់ខ្លួន លោក ក្វៃដូ ដែលតាំងខ្លួនជាប្រធានាធិបតីវ៉េណេស៊ុយអេឡា និយាយថា លោកបានបញ្ជូនប្រេសិតទៅកាន់ន័រវ៉េស ដែលបានប្រឹងប្រែងបង្កើតបរិយាកាសសមស្របសម្រាប់ភាគីទាំងពីរជួបគ្នា តែការជជែកគ្នាមិនទាន់មានឡើយ។ នេះជាការប្រកាសផ្លូវការលើកដំបូងពីការប៉ុនប៉ងចរចារវាងក្រុមប្រឆាំង និងរបបដឹកនាំក្រុងការ៉ាកាស ស្របពេលការប្រទាញប្រទង់អំណាចនៅតែបន្តមានរហូតដល់មានការបាត់បង់ជីវិតផងនោះ។
បើតាមទីភ្នាក់ងារព័ត៌មាន AFP ក្រុមប្រឆាំងដែលបានធ្វើដំណើរទៅកាន់ទីក្រុងអូស្លូដឹកនាំដោយអនុប្រធារដ្ឋសភា Stalin Gonzalez និងអតីតសមាជិកសភាលោក Gerardo Blyde ។ ពីរដ្ឋធានីការ៉ាកាស លោក ម៉ាឌុយរ៉ូ មិនបាននិយាយអ្វីទាក់ទងការចរចាជាមួយក្រុមប្រឆាំងឡើយ តែបង្ហើបថា មនុស្សជំនិត និងជារដ្ឋមន្ត្រីគមនាគមន៍ Jorge Rodriguez បំពេញបេសកម្មដើម្បីសន្តិភាពប្រទេសជាតិនៅតំបន់អឺរ៉ុប។
ប្រព័ន្ធផ្សព្វផ្សាយនានាផ្សាយថា លោក Rodriguez និងអភិបាលរដ្ឋម្នាក់ទៀត បានទៅកាន់ទឹកដីន័រវ៉េសក្នុងនាមជាតំណាងរដ្ឋាភិបាលលោក ម៉ាឌុយរ៉ូ ។ យ៉ាងណាមិញ គេមិនទាន់ដឹងថា ភាគីទាំងពីរបានជួបគ្នាឬអត់ឡើយ ប៉ុន្តែវិទ្យុន័រវ៉េសមួយផ្សាយថា ការជជែកគ្នាធ្វើឡើងប៉ុន្មានថ្ងៃមកហើយនៅកន្លែងសម្ងាត់មួយ។ ជុំវិញបញ្ហា អ្នកនាំពាក្យក្រសួងការបរទេសន័រវ៉េស Ane Haavardsdatter Lunde មិនបានបដិសេធ ឬទទួលស្គាល់ការសម្របសម្រួលនេះឡើយ។
បើមានការចរចាមែន លោក ក្វៃដូ បានដាក់លក្ខខណ្ឌឲ្យមានការបញ្ចប់ការដណ្ដើមអំណាចរបស់លោក ម៉ាឌុយរ៉ូ ហើយត្រៀមខ្លួនបង្កើតរដ្ឋាភិបាលអន្តរកាលជំនួសរដ្ឋាភិបាលបច្ចុប្បន្ន មុននឹងឈានដល់ការបោះឆ្នោតជ្រើសរើសមេដឹកនាំថ្មី។ លោក ក្វៃដូ ចោទលោក ម៉ាឌុយរ៉ូ ថា កំពុងកាន់អំណាចខុសច្បាប់ក្រោយការបោះឆ្នោតឆ្នាំមុន ដែលអវត្តមានបក្សប្រឆាំង ហើយបរទេសជាច្រើនមិនទទួលស្គាល់។ យ៉ាងណា លោក ម៉ាឌុយរ៉ូ នៅមានចិន រុស្ស៊ី អ៊ីរ៉ង់ និងគុយបាចាំជួយ និងមានយោធាជាខ្នងបង្អែកទៀត៕
Tag:
ន័រវ៉េស
វ៉េណេស៊ុយអេឡា
ហ័ន ក្វៃដូ
នីកូឡាស់ ម៉ាឌុយរ៉ូ
© រក្សាសិទ្ធិដោយ thmeythmey.com