កីឡាជាតិ
ជាតិ
វាសនាត្រឡប់មកវាយនៅកម្ពុជាវិញរបស់ សុខ ធី គឺអាស្រ័យលើឪពុកម្តាយ
× កីឡាករ សុខ ធី ដែលរងពិន័យមិនឲ្យឡើងសង្វៀនប្រកួតក្នុង និងក្រៅប្រទេសរយៈពេល៦ខែ ពីសហព័ន្ធកីឡាប្រដាល់គុនខ្មែរនៅតែមានបំណងចង់វិលត្រឡប់មកវាយនៅកម្ពុជា ក្រោយរួចផុតពីការពិន័យ។ ប៉ុន្តែវាសនាវិលមកកាន់សង្វៀនប្រដាល់នៅកម្ពុជារបស់គេ គឺអាស្រ័យលើការសម្រេចចិត្តរបស់ឪពុកម្តាយ។ ក្នុងករណីឪពុកម្តាយមិនឲ្យវាយនៅកម្ពុជា សុខ ធី នឹងទៅវាយនៅប្រទេសថៃ ក្នុងនាមកីឡាករតំណាងឲ្យកម្ពុជា។ សុខ ធី អះអាងថា ការវាយនៅថៃទទួលបានតម្លៃខ្លួនថ្លៃជាងនៅកម្ពុជា។
នៅដំណាច់ខែឧសភានេះ ដល់ពេលវេលាកំណត់ ដែលកីឡាករ សុខ ធី ហៅ កាកា ត្រូវរួចផុតពីការពិន័យរបស់សហព័ន្ធកីឡាប្រដាល់គុនខ្មែរ ដែលពិន័យមិនឲ្យរូបគេឡើងសង្វៀនប្រកួតទាំងក្នុងនិងក្រៅប្រទេសរយៈពេល៦ខែ។ ទោះបីយ៉ាងនេះក្តី សុខ ធី មិនទាន់ប្រាកដថា នឹងមកប្រកបអាជីពនៅកម្ពុជានោះទេ។ ប៉ុន្តែរូបគេនៅតែមានបំណងចង់មកវាយនៅកម្ពុជា បើសិនទទួលបានការអនុញ្ញាតពីឪពុកម្តាយ។ ក្នុងន័យនេះ វាសនាវិលត្រឡប់មកសង្វៀនកម្ពុជាសាជាថ្មីរបស់គេ គឺស្ថិតលើឪពុកម្តាយ។
«ពាក់ព័ន្ធរឿងវិលត្រឡប់មកប្រកួតលើសង្វៀនកម្ពុជា ខ្ញុំមិនដឹងនោះទេ ទាល់តែសួរពុកម៉ែខ្ញុំសិន។ តែខ្ញុំនៅតែស្រលាញ់ជាតិខ្មែរ ទោះបីខ្ញុំមិនបានវាយនៅកម្ពុជា ហើយទៅវាយនៅថៃ តែខ្ញុំជាកីឡាករតំណាងឲ្យកម្ពុជា»។ សុខ ធី លើកឡើងបែបនេះពេលផ្តល់បទសម្ភាសដល់សារព័ត៌ថ្មីៗ មុនរូបគេចេញទៅវាយក្នុងព្រឹត្តិការណ៍ ONE Championship នៅប្រទេសថៃ កាលពីពេលថ្មីៗ។
កីឡាករមានដើមកំណើតនៅខេត្តបន្ទាយមានជ័យរូបនេះអះអាងថា ការប្រកួតលើសង្វៀនទូរទស្សន៍របស់ថៃ គឺទទួលបានតម្លៃខ្លួនថ្លៃជាងសង្វៀននៅកម្ពុជាជាងពាក់កណ្តាល។ ពេលឡើងប្រកួតម្តងៗ សុខ ធី ទទួលបានតម្លៃខ្លួនពី៥ទៅ៦ម៉ឺនបាត(ជាងមួយពាន់ដុល្លារ) និងប្រាក់ឧបត្ថម្ភផ្សេងៗទៀត។ បញ្ហានេះ អាចជាកត្តាធ្វើឲ្យរូបគេមានចិត្តរារែក ក្នុងការវិលត្រឡប់មកប្រកបអាជីពលើសង្វៀននៅកម្ពុជាសាជាថ្មី។
«វាយនៅថៃយើងបានលុយច្រើនជាង ពេលឡើងវាយលើប៉ុស្តិ៍ទូរទស្សន៍ម្តងៗយើងបាន៥ទៅ៦ម៉ឺនបាត ហើយមានប្រាក់ឧបត្ថម្ភលើកទឹកចិត្តផ្សេងៗទៀត។ ខ្ញុំវាយនៅកម្ពុជាកន្លងមក គឺដោយសារគ្រូគាត់ឲ្យនៅវាយ ខ្ញុំក៏នៅវាយទៅ ព្រោះមិនចង់វាយនៅថៃ។ ទោះបីវាយនៅកម្ពុជាទទួលបានតម្លៃខ្លួនតិចជាងនៅថៃ តែពេលណោះខ្ញុំមិនសោកស្តាយនោះទេ»។ នេះជាការបង្ហាញអារម្មណ៍របស់ សុខ ធី ពេលប្រកួតនៅកម្ពុជាមួយរយៈកន្លងមក។
កីឡាករ សុខ ធី ត្រូវបានសហព័ន្ធកីឡាប្រដាល់គុនខ្មែរពិន័យបមិនឲ្យឡើងសង្វៀនប្រកួតក្នុងនិងក្រៅប្រទេសរយៈពេល៦ ពាក់ព័ន្ធរឿងមិនទទួលស្គាល់លទ្ធផល ដែលចៅក្រមកាត់ក្តីឲ្យរូបគេចាញ់កីឡាករថៃ ធ្នូ សឹកឡេក ដោយពិន្ទុនាការប្រកួតវគ្គសន្សំពិន្ទុដណ្តើមខ្សែក្រវាត់ ISI Palm របស់ស្ថានីយទូរទស្សន៍ CNC កាលពីអំឡុងខែវិច្ឆិកា ឆ្នាំ២០១៨។ ចំណែកលោក សាន សៅយ៉ាន់ ដែលជាគ្រូបង្វឹករបស់គេ ក៏ត្រូវបានសហព័ន្ធផ្អាកការងារពីមន្ត្រីបច្ចេកទេស អាជ្ញាកណ្តាល ចៅក្រម រយៈពេល៦ខែផងដែរ។
ភ្លាមៗនោះ ទាំងកីឡាករ សុខ ធី និងលោក សាន សៅយ៉ាន់ បានប្រកាសឈប់ប្រកួត និងធ្វើជាមន្ត្រីបច្ចេកទេសអាជ្ញាកណ្តាល ចៅក្រមនៅកម្ពុជា។ ទោះបី សុខ ធី ស្ថិតក្នុងការពិន័យរបស់សហព័ន្ធក៏ដោយ គេសង្កេតឃើញកីឡាកររូបនេះបានឡើងសង្វៀនប្រកួតជាច្រើនលើកនៅប្រទេសថៃ។ ប៉ុន្តែ គេពុំឃើញសហព័ន្ធចាត់វិធានលើកីឡាកររូបនេះឡើយ៕
Tag:
ប្រដាល់គុនខ្មែរ
សុខ ធី
© រក្សាសិទ្ធិដោយ thmeythmey.com