ជាតិ
នយោបាយជាតិ
លោក សុខ ទូច៖ លោក សម រង្ស៊ី មិនចូលស្រុក ព្រោះប្រពន្ធមិនអនុញ្ញាត
× លោក សុខ ទូច ប្រធានរាជបណ្ឌិត្យសភា មិនជឿថា លោក សម រង្ស៊ី ហ៊ានចូលស្រុក ដូចការប្រកាសរបស់លោកនោះទេ។ ប្រធានបណ្ឌិត្យសភា លើកហេតុផល៥យ៉ាង នៅលើទំព័រហ្វេសប៊ុក។
ទី១ លោក សម រង្ស៊ី ធ្លាប់សន្យាថា នឹងវិលមកកម្ពុជាវិញជាច្រើនលើកមកហើយ តែបានត្រឹមតែសន្យាខ្យល់ប៉ុណ្ណោះ។ ទី២ កាលពីរចនាសម្ព័ន្ធនៃអតីតគណបក្សសង្គ្រោះជាតិ នៅមាន លោក សម រង្ស៊ី បានលាលែង ហើយដេករង់ចាំមើលសកម្មភាពរដ្ឋាភិបាលកម្ពុជា។ ត្រង់ចំណុចទី២នេះ លោក សុខ ទូចច ទំនងជាចង់មានន័យថា កាលពីអតីតគណបក្សសង្គ្រោះជាតិ នៅមានរចនាសម្ព័ន្ធ លោក សម រង្ស៊ី មិនហ៊ានចូលស្រុកផង ដោយរង់ចាំមើលការបន្ធូរដៃពីរដ្ឋាភិបាល ចុះទម្រាំតែពេលនេះ គណបក្សសង្គ្រោះជាតិ ត្រូវបានរំលាយទៅហើយនោះ តើឲ្យលោក សម រង្ស៊ី ហ៊ានមកយ៉ាងម៉េចកើត។
ទី៣ អ្នកស្រី ជូឡុង សូមួរ៉ា ភរិយារបស់លោក សម រង្ស៊ី អាចនឹងមិនផ្តល់ឱកាសឲ្យលោក វិលមកកម្ពុជានោះទេ ព្រោះអ្នកលេងនយោបាយនៅពីខាងក្រោយឆាក គឺភរិយារបស់លោក សម រង្ស៊ី មិនមែនលោក សម រង្ស៊ី ឡើយ។ ទី៤ លោក សម រង្ស៊ី អាចធ្វើព្យុះ-ធ្វើភ្លៀងនៅក្រៅស្រុក តែពេលចូលស្រុក លោក បានលើកជើងពានជូនសម្តេចនាយករដ្ឋមន្ត្រី ហ៊ុន សែន ទៅវិញ ដូចជា ករណីធ្វើវិសោធនកម្មរដ្ឋធម្មនុញ្ញពី ២/៣ មក ៥០ + ១ ជាដើម។
ទី៥ លោក សម រង្ស៊ី នឹងមកកម្ពុជា ដើម្បីផ្តួលរំលំរដ្ឋាភិបាល និងមកចាប់សម្តេច ហ៊ុន សែន ដោយរបៀបណា បើពេលខ្លួននៅមានសមត្ថភាពនិងលទ្ធភាព លោក ធ្វើអ្វីមិនកើតផង ចុះទម្រាំពេលនេះ ខ្លួនជាទណ្ឌិត ហើយជាប់បណ្តឹងជាច្រើនករណីផ្សេងទៀតនោះ? ដូច្នេះ រដ្ឋាភិបាល មានសិទ្ធិគ្រប់គ្រាន់ ដើម្បីការពាររដ្ឋធម្មនុញ្ញ និងរក្សាសណ្តាប់ធ្នាប់សង្គម។
លើកហេតុផលទាំង៥នេះហើយ ប្រធានបណ្ឌិត្យសភា ក៏សន្និដ្ឋានបែបនេះថា «ជារួមមក អ្វីដែល លោក សម រង្ស៊ី បំផុសចលនាវិលចូលស្រុកនេះ វាគ្រាន់តែជាសារមួយប្រាប់ទៅមហាជនថា លោក សម រង្ស៊ី មិនដេកលក់ទេ ហើយខ្លួនអាចធ្វើអាជីវកម្មក្នុងការប្រមូលថវិកាពីការវិលចូលស្រុកនេះទៀតផង។ ម្យ៉ាងវិញទៀត សកម្មភាពរបស់លោកដែលនៅកូរ៉េកាលពីពេលថ្មីៗនេះ ថាជាភាពជោគជ័យ ប៉ុន្តែបើយើងក្រឡេកមកមើលពីចំនួនអ្នកចូលរួមក្នុងមហាបាតុកម្មភ្លើងទៀនកាលពីចុងខែមេសានេះ គឺមិនដល់១ម៉ឺននាក់ផង ខណៈពេលដែលពលករខ្មែរនៅកូរ៉េមានដល់ជាង៦ម៉ឺននាក់ឯណោះ។ ជាងនេះទៅទៀតក្រោយបាតុកម្មនោះចប់ ក្រុមយុវជននៅកូរ៉េបានបែកបាក់ផ្ទៃក្នុងទៀតផង»។
មិនមែនតែលោក សុខ ទូច ទេ មន្ត្រីរដ្ឋាភិបាល និង មន្ត្រីគណបក្សកាន់អំណាច ដោយរួមទាំងសម្តេច ហ៊ុន សែន ផងនោះ ក៏បានចំអកឲ្យលោក សម រង្ស៊ី ដែរ ថាបានតែប្រកាសប៉ុណ្ណោះ ដោយមិនហ៊ានវិលមកកម្ពុជានោះទេ។ សម្តេចនាយករដ្ឋមន្ត្រី ព្រមានវាយខ្នោះលោក សម រង្ស៊ី ឲ្យតែលោក មកដល់កម្ពុជានៅពេលណា។
លោក សម រង្ស៊ី កំពុងធ្វើចលនាបំផុសប្រជាពលរដ្ឋនៅក្រៅប្រទេស ឲ្យវិលមកកម្ពុជាជាមួយលោក ក្នុងឆ្នាំ២០១៩នេះ។ លើសពីនេះ លោក ក៏រំពឹងថា មានប្រជាពលរដ្ឋក្នុងស្រុក ចាំទទួលលោកផងដែរ៕
Tag:
សុខ ទូច
សម រង្ស៊ី
មាតុភូមិនិវត្ត
© រក្សាសិទ្ធិដោយ thmeythmey.com