ជាតិ
សង្គមជាតិ
ស្ថានទូតចិន៖ ព្រោះស្រវឹង ទើបចិនមួយក្រុម បង្ហោះវីដេអូព្រមានបង្កអសន្តិសុខនៅព្រះសីហនុ
× ការស៊ើបអង្កេតរបស់សមត្ថកិច្ចចិន បង្ហាញលទ្ធផលថា ដោយសារតែស្រវឹង ទើបបានជាជនជាតិចិនប្រមាណ២០នាក់ នាំគ្នាបង្ហោះវីដេអូព្រមានបង្កអសន្តិសុខនៅខេត្តព្រះសីហនុ។ នេះបើតាមសារដែលបង្ហោះលើទំព័រហ្វេសប៊ុករបស់ស្ថានទូតចិនប្រចាំកម្ពុជា នៅថ្ងៃទី១៧ ខែឧសភា ឆ្នាំ២០១៩។
ស្ថានទូតចិន សរសេរថា ក្រោយពីស្រវឹង ពួកគេ ក៏បង្ហោះវីដេអូនោះ ដោយគ្រាន់តែជាការលេងសើចប៉ុណ្ណោះ។ ស្ថានទូតចិន បញ្ជាក់បែបនេះថា៖«បុគ្គលទាំងឡាយនៅក្នុងវីដេអូនោះ មិនមានជាប់ពាក់ព័ន្ធនឹងសង្គមងងឹតណាមួយទេ»។
ស្ថានទូតចិន បានឲ្យដឹងទៀតថា ក្រុមជនជាតិចិនទាំងនោះ ធ្លាប់បានមកធ្វើការនៅកម្ពុជា កាលពីអំឡុងខែមីនា ឆ្នាំ២០១៩។ ហើយពួកគេ បានថតបង្ហោនោះ ពីក្រុង Chongqing ប្រទេសចិន ក្រោយពីពួកគេ ត្រឡប់ទៅដល់ប្រទេសចិនវិញ។ ស្ថានទូតចិន ពុំបានបញ្ជាក់ទេថា សមត្ថកិច្ច ចាប់ខ្លួនឬចាត់វិធានការយ៉ាងណាចំពោះពួកគេ។
ស្ថានទូតចិន លើកឡើងយ៉ាងដូច្នេះថា៖«ឆ្នាំនេះ គឺជាឆ្នាំសហប្រតិបត្តិការអនុវត្តច្បាប់រវាងចិន និងកម្ពុជា។ ភាគីទាំងពីរ នឹងចាត់វិធានការជាក់ស្ដែងឲ្យកាន់តែស៊ីជម្រៅលើកិច្ចសហការផ្នែកសន្តិសុខ និងការអនុវត្តច្បាប់ ដែលនឹងនាំមកនូវភាពសុខដុមរមនា និងអត្ថប្រយោជន៍ជូនដល់ប្រជាជនប្រទេសទាំងពីរ»។
តាមរយៈវីដេអូឃ្លីបប្រមាណ១០វិនាទី ជនជាតិចិនទាំងនោះ ព្រមានថា ពួកគេ ចង់ឲ្យខេត្តព្រះសីហនុ វឹកវរ គឺវឹកវរ ចង់ឲ្យមានសន្តិសុខ គឺមានសន្តិសុខ៕ © រក្សាសិទ្ធិដោយ thmeythmey.com