ជាតិ
នយោបាយជាតិ
អាមេរិកទាមទារឲ្យស៊ើបអង្កេតករណីសកម្មជនប្រឆាំងដែលស្លាប់ក្នុងពន្ធនាគារ លោកស្រី Morgan Ortagus អ្នកនាំពាក្យក្រសួងការបរទេសអាមេរិក
× ក្រសួងការបរទេសអាមេរិក កាលពីថ្ងៃទី១៧ ខែឧសភា បានទាមទារឲ្យការស៊ើបអង្កេតឯករាជ្យមួយលើករណីមរណភាពរបស់លោក ទិត រ៉ន សកម្មជនរបស់អតីតគណបក្សសង្គ្រោះជាតិ នៅក្នុងពន្ធនាគារខេត្តកំពង់ចាមកន្លងមក។
ក្នុងសេចក្តីថ្លែងការណ៍ លោកស្រី Morgan Ortagus អ្នកនាំពាក្យក្រសួងការបរទេសអាមេរិក បានសំដែងការសោកស្តាយទាក់ទងនឹងមរណភាពរបស់លោក ទិត រ៉ន អាយុ៣៨ឆ្នាំ ក្រោយការចាប់ឃុំខ្លួន កាលពីថ្ងៃទី២៨ ខែមេសា ឆ្នាំ២០១៩។
ករណីនេះ ត្រូវបានលោក សម រង្ស៊ី អតីតប្រធានគណបក្សប្រឆាំង អះអាងថា ជាឃាតកម្មនយោបាយ ដោយលោកជឿជាក់ថា សកម្មជនរបស់ខ្លួន រងអំពើហិង្សាពីសំណាក់ប៉ូលិស ឬមន្ត្រីពន្ធនាគារ។
ក្នុងរបាយការណ៍ទៅកាន់អគ្គស្នងការនគរបាលជាតិ លោក ឯម កុសល ស្នងការនគរបាលខេត្តកំពង់ចាម បានបញ្ជាក់ថា ជនសង្ស័យ ទិត រ៉ន បានស្លាប់ក្នុងពន្ធនាគារនៅថ្ងៃទី២៨ ខែមេសា ដោយមូលហេតុបណ្តាលមកពីដួលប៉ះទង្គិចក្បាល កាលពីថ្ងៃទី១៧ ខែមេសា»។
ទោះបីជាយ៉ាងណាក៏ដោយ សហរដ្ឋអាមេរិក ទាមទារឲ្យមានការស៊ើបអង្កេតឯករាជ្យពាក់ព័ន្ធនឹងការឃុំខ្លួន និងមរណភាពរបស់សកម្មជនរូបនេះ ដោយបន្ថែមអំពាវនាវដល់រដ្ឋាភិបាលកម្ពុជា ដោះលែងលោក កឹម សុខា និងសកម្មជនបក្សប្រឆាំងជាង៦៥រូបទៀត៕
© រក្សាសិទ្ធិដោយ thmeythmey.com