អន្តរជាតិ
×![]()
ដោយៈ យ៉ន សុខន
មជ្ឈមណ្ឌលស្រាវជ្រាវដំណាំស្រូវប្រើទឹកប្រៃដែលឈានមុខគេរបស់ចិន និងមានមូលដ្ឋាននៅភូមិភាគខាងកើតនៃខេត្ត សានទុង បានសម្រេចនៅដើមខែឧសភានេះថា ខ្លួននឹងពង្រីកទំហំដីពិសាធន៍ដំណាំស្រូវរបស់ខ្លួនឲ្យដល់លើស ៦៦៦ ហិកតាឯណោះ។
តាមការចុះផ្សាយរបស់ទីភ្នាក់ងារព័ត៌មានចិន Xinhua មជ្ឈមណ្ឌលស្រាវជ្រាវ និងអភិវឌ្ឍដំណាំស្រូវដីប្រៃដែលមានទីតាំងនៅទីក្រុងឆ្នេរ ឈីងតាវ (Qingdao) បានលើកឡើងថាការធ្វើនេះមានគោលបំណងពន្លឿនល្បឿននៃការស្រាវជ្រាវ អភិវឌ្ឍ និង ជ្រើសប្រភេទពូជស្រូវសម្រាប់ដីប្រៃ។ បន្ថែមពីនេះ គោលដៅដ៏សំខាន់បំផុតមួយទៀតគឺការពង្រីកដីដាំដុះ គឺដើម្បីស្វែងរកវិធីសាស្ត្រល្អក្នុងការដាំដុះ។
មជ្ឈមណ្ឌលដដែលបានធ្វើការកំណត់ផែនការទិន្នផលស្រូវ ដោយធ្វើយ៉ាងណាផលិតឱ្យបាន ជាមធ្យម៣០០ គីឡូក្រាមក្នុងផ្ទៃដី ៦៦៦ ម៉ែតការ៉េ ឬត្រូវនឹង៤,៥តោនក្នុងមួយហិកតា។ ជាមួយគ្នានោះដែរ អ្នកស្រាវជ្រាវ នឹងសិក្សាអំពីប្រភេទស្រូវ ដែលសមប្រកបជាមួយនឹងដីប្រភេទជាក់លាក់ណាមួយ និងប្រភេទដីមានជាតិអំបិល នឹងត្រូវកែលម្អគុណភាព។
ប្រទេសចិនមានដីជាតិប្រៃប្រមាណ១០០លានហិកតា ដែលក្នុងនោះ ផ្ទៃដីចំនួនមួយភាគប្រាំអាចកែលម្អឱ្យក្លាយជាដីមានជីជាតិដើម្បីដាំដំណាំបាន។
ក្រៅពីស្រូវដាំដុះប្រើប្រាស់ទឹកប្រៃ ចិនក៏មានប្រភេទស្រូវដាំដុះលើដីស្ងួតហែងដែរ។ គម្រោងថ្មីនេះត្រូវបានគេសាកល្បងនៅខេត្ត Hebei តាំងពីឆ្នាំ ២០១៧ ហើយទិន្នផលស្រូវដែលគេអាចផលិតបាននោះមានទំហំដល់ទៅជាង ៦តោន ទោះមិនសូវមានទឹកស្រោចស្រពគ្រប់ក្តី។
លើសពីនេះ ចិនក៏ស្រាវជ្រាវបានប្រភេទពូជស្រូវយក្សដែលអាចផ្តល់ទិន្នផលខ្ពស់រហូតដល់ ១៥ តោនក្នុងមួយហិកតាដែរ។ ស្រូវនេះមានកម្ពស់ជាង ២ម៉ែត្រ និងអាចផ្តល់ជម្រកឲ្យត្រី បានសុខសាន្ត និងមិនមានផលប៉ះពាល់ចំពោះទឹកឡើយ។
សូមបញ្ជាក់ថា ស្រូវអង្ករជាប្រភេទអាហារមូលដ្ឋានរបស់ប្រជាជនចិន ហើយវាមានប្រវត្តិនៅ ចិនយូរអង្វែងមកហើយ។ បច្ចុប្បន្នការដាំដុះស្រូវនេះធ្វើឡើងលើផ្ទៃដីមួយភាគបួននៃផ្ទៃដីសម្រាប់ដំណាំទូទាំងប្រទេសចិនទាំងមូល៕
© រក្សាសិទ្ធិដោយ thmeythmey.com
