ជាតិ
«No Kids Drown»! យុវជនខេត្តស្វាយរៀងបង្រៀនកុមារឲ្យចេះសង្គ្រោះខ្លួនឯងពេលលង់ទឹក
×![]()
ដោយ: ឡាយ សុភាវតី
សហភាពសហព័ន្ធយុវជនកម្ពុជា (ស.ស.យ.ក) ខេត្តស្វាយរៀង កាលពីពេលថ្មីៗកន្លងមកនេះ បានរៀបចំកម្មវិធីសកម្មភាពសង្គមមួយ ដែលមានឈ្មោះថា «No Kids Drown»។ សម្រាប់ដំណាក់កាលទី១ ដែលរៀបចំនៅសាលាបឋមសិក្សាស្វាយជ្រំ ខេត្តស្វាយរៀង កុមារប្រមាណ១២០នាក់ បានរៀនសូត្រពីវិធីសង្គ្រោះខ្លួនឯងពេលលង់ទឹក ហើយយុវជនបង្គោលមួយចំនួនក្លាយទៅជាគ្រូបង្រៀនកុមារហែលទឹក ការសង្គ្រោះបឋម និងវិធានការការពារតាមភូមិស្រុក ក្រុងនៃខេត្តស្វាយរៀង។
«យើងបានមើលឃើញពីគ្រោះថ្នាក់របស់ក្មេង ជាពិសេសនៅភូមិសាស្ត្រស្រុកស្វាយជ្រំ ដែលកន្លងមក មានកុមារប្រមាណ២០នាក់បានស្លាប់ដោយសារលង់ទឹក»។ លោក ឈី កុលបុត្រា សមាជិក ស.ស.យ.ក ខេត្តស្វាយរៀង បានបញ្ជាក់ប្រាប់សារព័ត៌មាន ThmeyThmey ពីមូលហេតុនៃការបង្កើតកម្មវិធីសង្គម ក្រោមប្រធានបទ «ចូលរួមកាត់បន្ថយករណីគ្រោះថ្នាក់លង់ទឹកចំពោះកុមារ» (No Kids Drown)។
លោក កុលបុត្រា បានឲ្យដឹងផងដែរថា កម្មវិធីនេះផ្ដួចផ្ដើមឡើងដោយលោក ឌី វិជ្ជា ប្រធានស.ស.យ.កខេត្តស្វាយរៀង ផ្ទាល់។ លោកមានជំនឿថា កម្មវិធីរយៈពេល៣ថ្ងៃពីថ្ងៃទី១៣ ដល់ទី១៥ ខែឧសភា នៅសាលាបឋមសិក្សាស្វាយជ្រំ ជាចំណែកដ៏សំខាន់ក្នុងការជួយដល់កុមារឲ្យចេះជួយខ្លួនឯងពេលលង់ទឹក។
នេះគ្រាន់តែជាដំណាក់កាលចាប់ផ្តើមប៉ុណ្ណោះ ដោយ ស.ស.យ.ក ខេត្តស្វាយរៀង នឹងបន្តបេសកកម្មរបស់ខ្លួនបន្ថែមទៀតដើម្បីជួយដល់កុមារ។ លោក ឈី កុលបុត្រា បានអះអាងថា កម្មវិធីបែបនេះនឹងត្រូវបន្តរៀបចំតាមបណ្ដាស្រុកទាំង៨នៃខេត្តស្វាយរៀង៕
Tag:
ស្វាយរៀង
បង្រៀនកុមារ
សង្គ្រោះខ្លួនឯង
ពេលលង់ទឹក
© រក្សាសិទ្ធិដោយ thmeythmey.com
