អន្តរជាតិ
×![]()
ដោយ: ធីតា
សាកលវិទ្យាល័យវិទ្យាសាស្ត្រ និងបច្ចេកទេសក្រុងព្យុងយ៉ាង (PUST) បានដាក់ដំណើរការកម្មវិធីវាស់ស្ទង់សមត្ថភាពភាសាចិន Hanyu Shuiping Kaoshi (HSK) ដើម្បីឲ្យនិស្សិតអាចសិក្សាភាសាចិនតាមស្តង់ដាលើមុខជំនាញរបស់ខ្លួន។ នេះបើយោងតាមការផ្សាយរបស់សារព័ត៌មាន NK News។
ការពង្រឹងសមត្ថភាពភាសាចិន ដើម្បីពង្រីកទំនាក់ទំនង និងការផ្លាស់ប្តូរវប្បធម៌រវាងក្រុងព្យុងយ៉ាង និងក្រុងប៉េកាំង។ នាដំណាក់កាលដំបូង និស្សិត៤៥នាក់របស់សាកលវិទ្យាល័យ PUST បានចូលធ្វើតេស្តិ៍ភាសាចិន HSK ប្រកបដោយជោគជ័យ។
លោក Li Jinjun ទូតសារធារណរដ្ឋចិន ប្រចាំកូរ៉េខាងជើង បានលើកឡើងពីសារសំខាន់ក្នុងវិស័យអប់រំ ជាពិសេសការពង្រីកការបណ្តុះបណ្តាលភាសាចិន ដើម្បីពង្រឹងកិច្ចសហប្រតិបត្តិការ និងការផ្លាស់ប្តូរវប្បធម៌នៃប្រទេសជាមិត្តទាំងពីរ។
ថ្នាក់ដឹកនាំសាកលវិទ្យាល័យ PUST ក៏បានគូសបញ្ជាក់ថា កម្មវិធីបណ្តុះបណ្តាលភាសាចិននេះ នឹងបន្តពង្រីកដល់សហគមន៍កូរ៉េខាងជើងទាំងមូល ពោលគឺមិនមែនត្រឹមតែក្របខណ្ឌសាកលវិទ្យាល័យនោះឡើយ។
«ពិតណាស់ កម្មវិធីបង្រៀនចម្បង គឺភាសាអង់គ្លេស ប៉ុន្តែភាសាក្លាយជាភាសាទីពីរ ដែលមានសារសំខាន់ខ្លាំងណាស់ដែរ»។ នេះជាការលើកឡើងរបស់ថ្នាក់ដឹកនាំសាកលវិទ្យាល័យ ដោយបានអះអាងថា និស្សិតជាច្រើនចង់ប្រើប្រាស់ភាសាចិននាពេលអនាគត ហើយពួកគេក៏ចង់បន្តការសិក្សានៅប្រទេសចិនផងដែរ។
ចិន និងកូរ៉េខាងជើង កាន់តែខិតចូលគ្នា បន្ទាប់ពីជំនួបច្រើនលើករវាង លោកប្រធានាធិបតី ស៊ី ជិនភីង និងលោក គឹម ជុងអ៊ុន នៅប៉េកាំង។ លោក ស៊ី ក៏នឹងមានគម្រោងទៅទស្សនកិច្ចនៅក្រុងព្យុងយ៉ាងវិញផងដែរ។
PUST ជាសកលវិទ្យាល័យឯកជនតែមួយគត់នៅកូរ៉េខាងជើង ដែលពង្រីកការសិក្សាភាសាបរទេស ដោយក្រៅពីអង់គ្លេស និងចិន ក៏មានការបង្រៀនភាសាអាល្លឺម៉ង់ផងដែរ។ យោងតាមការផ្សាយរបស់ NK News សកលវិទ្យាល័យនេះ កើតចេញពីកិច្ចសហប្រតិបត្តិការកូរ៉េ-អាមេរិក ប៉ុន្តែគម្លាតប្រទេសទាំងពីរកាន់តែឆ្ងាយ ដោយសារអាមេរិកដាក់កំហិតពលរដ្ឋរបស់ខ្លួនទាក់ទងនឹងដំណើរទៅកាន់កូរ៉េខាងជើង៕
Tag:
អប់រំ
កូរ៉េខាងជើង
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
