ជនពិការ និងជនជាតិដើមភាគតិច មានអាទិភាពសម្រាប់ការដាក់ពាក្យប្រឡងចូលបម្រើការនៅក្រសួងដែនដី

ជាតិ

សង្គមជាតិ

ជនពិការ និងជនជាតិដើមភាគតិច មានអាទិភាពសម្រាប់ការដាក់ពាក្យប្រឡងចូលបម្រើការនៅក្រសួងដែនដី

20, May 2019 , 8:59 am

រូបភាព

ទិដ្ឋភាពប្រឡងរើសក្របខណ្ឌក្រសួងដែនដីនគរូបនីយកម្ម និងសំណង់ កាលពីឆ្នាំ២០១៨

ដោយ:

ភ្នំពេញ៖ ក្របខណ្ឌ «ក» សរុប៤៧កន្លែង កំពុងរង់ចាំនិស្សិត និងមន្ត្រីរាជការ ដែលមានសមត្ថភាពដើម្បីក្លាយជាមន្ត្រីបម្រើការនៅក្រសួងដែនដី នគរូបនីយកម្ម និងសំណង់។ សេចក្តីជូនដំណឹងចុះកាលពីថ្ងៃទី១៦ ខែឧសភា លោក ឆាន់ សាផាន រដ្ឋលេខាធិការប្រចាំការ និងជាប្រធានគណៈកម្មការប្រឡង បានបញ្ជាក់លំអិតពីជំនាញ និងមូលដ្ឋានដែលត្រូវជ្រើសរើសមន្ត្រីក្របខណ្ឌ ខណៈជនពិការ និងជនជាតិដើមភាគតិច ត្រូវបានលើកទឹកចិត្ត និងផ្តល់អាទិភាព។

សេចក្តីជូនដំណឹង បានបញ្ជាក់ថា ការជ្រើសរើសបេក្ខជនឲ្យចូលបម្រើការងារនៅក្របខណ្ឌក្រសួងដែនដីមានចំនួន៤៧កន្លែង នៅទីស្តីការក្រសួងចំនួន១៩កន្លែង និងនៅមន្ទីររៀបចំដែនដី នគរូបនីយកម្ម សំណង់ និងសូរិយាដីខេត្តចំនួន២៨កន្លែង។

បេក្ខជនដែលមានជំនាញភាសាអង់គ្លេស, ជំនាញភាសាជប៉ុន,ជំនាញភាសាចិន,ជំនាញភាសាកូរ៉េ,ជំនាញការទូត,ជំនាញនីតិសាស្ត្រ និងរដ្ឋបាលសាធារណៈ, ជំនាញសេដ្ឋកិច្ច និងហិរញ្ញវត្ថុ,ជំនាញព័ត៌មានវិទ្យា,ជំនាញវិស្វកម្ម,ជំនាញស្ថាបត្យកម្ម,ជំនាញសុរិយាដី និងជំនាញរៀបចំដែនដី និងនគរូបនីយកម្ម អាចមកចុះឈ្មោះប្រឡងចូលក្របខណ្ឌទាំង៤៧កន្លែងដែលមាននៅទូទាំងរាជធានី-ខេត្តបាន។

សម្រាប់លក្ខខណ្ឌនៃការជ្រើសរើស បេក្ខជនត្រូវមានអាយុមិនលើសពី ៣៥ឆ្នាំ បើករណីមានសញ្ញាបត្របរិញ្ញាបត្រ និងមិនលើសពី៤០ ឆ្នាំ បើករណីមិនមានសញ្ញាបត្របរិញ្ញាបត្រជាន់ខ្ពស់។ ចំពោះមន្ត្រីរាជការទូទៅ និងបេក្ខជនជានិស្សិតដែលមានសញ្ញាបត្រថ្នាក់បណ្ឌិតឡើងទៅ ត្រូវមានលិខិតបញ្ជាក់ពីប្រធានស្ថាប័ន។

បេក្ខជនត្រូវតែមកដាក់ពាក្យប្រឡងឲ្យបានមុនថ្ងៃទី១២ ខែកក្កដា ឆ្នាំ២០១៩ នៅទីស្តីការក្រសួងដែលមានអាសយដ្ឋានលេខ៧៧១-៧៧៣ មហាវិថីព្រះមុន្នីវង្ស សង្កាត់បឹងត្របែក ខណ្ឌចម្ការមន រាជធានីភ្នំពេញ។ សម្រាប់ថ្ងៃប្រឡងនឹងប្រព្រឹត្តិទៅនៅថ្ងៃទី ២៨ ខែកក្កដា នៅវិទ្យាល័យទួលទំពូង៕