កីឡាអន្តរជាតិ
អន្តរជាតិ
Kompany ប្រកាសចាកចេញពី Man City ក្រោយរស់នៅដ៏ជោគជ័យអស់១១រដូវកាល
× Vincent Kompany បានបញ្ជាក់ ក្រោយឈ្នះពាន FA Cup លើ Watford កាលពីថ្ងៃសៅរ៍ថា រូបគេនឹងចាកចេញពី Manchester City។ ប្រធានក្រុមវ័យ៣៣ឆ្នាំរូបនេះ ទទួលបានជោគជ័យដ៏ធំធេងក្នុងអាជីពក្រោយរស់នៅ១១រដូវកាលជាមួយក្រុមមេឃខៀវ។
Kompany ដែលលេងក្នុងតួនាទីជាខ្សែការពារ បានទៅចូលរួមជាមួយ Man City តាំងពីឆ្នាំ២០០៨មក ក្រោយឆ្លងកាត់អាជីពនៅក្លិប Anderlecht និង Hamburger SV។ រយៈពេល១១ឆ្នាំនៅ Eithad Stadium ខ្សែការពារអន្តរជាតិបែលហ្ស៊ិករូបនេះ មានចំណែកជួយឲ្យ Man City ឈ្នះពាន Premier League ៤លើក FA Cup ១លើក និង League Cup ៤លើក។ គេបានបង្ហាញវត្តមាន៣៦០ប្រកួត និងស៊ុតបាល់បញ្ចូលទី២០គ្រាប់។
Kompany ជាប់ក្នុងជម្រើសជាតិបែលហ្ស៊ិកតាំងពីឆ្នាំ២០០៤ មក ហើយបានជួយឲ្យបែលហ្ស៊ិក ទទួលបានចំណាត់ថ្នាក់លេខ៣ FIFA World Cup ជាប្រវត្តិសាស្ត្រផងដែរ។
ខ្សែការពាររូបនេះ បានបញ្ជាក់ពីការចាកចេញរបស់ខ្លួន តាមរយៈសារបើកចំហរទៅកាន់ក្រុមអ្នកគាំទ្រនៅទំព័រហ្វេសប៊ុកផ្លូវការ។ Kompany ថា ជាការសម្រេចចិត្តដ៏តានតឹង ហើយរូបគេចងចាំជានិច្ចរាល់ពេលវេលានៅជាមួយមេឃខៀវ៕
តាមរយៈគេហទំព័ររបស់ខ្លួន ក្លិប Man City បានជូនពរដល់ Kompany ហើយបញ្ជាក់ថា កីឡាកររូបនេះ នៅតែជាសមាជិកគ្រួសាររបស់ក្លិបជានិច្ច៕
Tag:
Man City
Vincent Kompany
© រក្សាសិទ្ធិដោយ thmeythmey.com