កីឡាអន្តរជាតិ
អន្តរជាតិ
Zidane ៖ សុំទោសដែលមិនបានដាក់ Bale ឲ្យលេង ប៉ុន្តែខ្ញុំធ្វើអ្វីទៅតាមបច្ចុប្បន្នភាព គ្រូបង្វឹកលោក Zinedine Zidane និងកីឡាករ Gareth Bale នាពេលហ្វឹកហាត់កន្លងមក (រូបពី AFP)
× កីឡាករខ្សែប្រយុទ្ធ Gareth Bale បានត្រឹមស្ថិតនៅកៅអីបម្រុងប៉ុណ្ណោះ នៅក្នុងការប្រកួតបិទរដូវកាល ដែលក្លិបយក្សស Real Madrid ទទួលបរាជ័យក្រោមថ្វីជើងក្រុម Real Betis ដោយលទ្ធផល២ទល់០។ ការបរាជ័យនេះ បានធ្វើឲ្យគ្រូបង្វឹកសញ្ជាតិបារាំងលោក Zinedine Zidane ត្រូវប្រឈមមុខបកស្រាយនឹងសំនួរ ពាក់ព័ន្ធនឹងការសម្រេចចិត្ត មិនដាក់ខ្សែប្រយុទ្ធសញ្ជាតិWales ចូលលេង។
ការប្រកួតចុងក្រោយនៃការបិទបញ្ចប់រដូវកាលពានរង្វាន់ La Liga របស់ប្រទេសអេស្ប៉ាញ កាលពីថ្ងៃទី១៩ ឧសភានោះ ក្លិប Real Madrid ធ្វើមិនបានល្អឡើយ ដោយបន្សល់ការខកចិត្តដល់អ្នកគាំទ្រ បន្ទាប់ពីចាញ់ក្រុម Real Betis ២ទល់០។ ប៉ុន្តែការបរាជ័យនេះ ក៏បានធ្វើឲ្យគ្រូបង្វឹក លោក Zinedine Zidane ឈឺក្បាលមិនស្ទើដែរ ព្រោះត្រូវបកស្រាយជាមួយអ្នកកាសែតជុំវិញការមិនដាក់កីឡាករ Bale ចូលលេង។ Bale ដែលជាខ្សែប្រយុទ្ធ ទិញមកពីក្លិប Tottemham Hotspur កាលពីឆ្នាំ២០១៣ ក្នុងតម្លៃខ្លួនជិត៩០លានដុល្លារនោះ បានត្រឹមតែអង្គុយកៅអីបម្រុងប៉ុណ្ណោះ ខណៈដែលមានព័ត៌មានលេចឭថា ក្លិបយក្សនៅអេស្ប៉ាញមួយនេះ ចង់លក់ខ្សែប្រយុទ្ធសញ្ជាតិWales រូបនេះ ចេញពី Bernabue។
នៅក្នុងសន្និសីទកាសែតគ្រូបង្វឹក Zidane មិនបានបញ្ជាក់ពីមូលហេតុច្បាស់ នៃការសម្រេចចិត្តមិនដាក់Bale ចូលលេងនោះទេ។ ចម្លើយដែលលោក Zidane បានបកស្រាយប្រាប់អ្នកកាសែតនោះ យ៉ាងដូច្នេះថា៖« ខ្ញុំសុំទោសដែល bale មិនអាចចូលលេងបាន ប៉ុន្តែគ្មានអ្នកណាដឹងថា នឹងមានអ្វីកើតឡើងទេ»។ នេះជាការលើកឡើងរបស់គ្រូបង្វឹកសញ្ជាតិបារាំងរូបនេះ ដែលបានស្រង់សម្តីចុះផ្សាយដោយកាសែត BBC។
ជាមួយគ្នានេះគ្រូបង្វឹកសញ្ជាតិបារាំង ដែលទើបចូលមកដឹកនាំក្រុមវិញ កាលខែមីនាកន្លងទៅនេះ បាននិយាយថា អ្វីដែលលោកធ្វើនៅពេលនេះ គឺស្របតាមស្ថានភាពក្រុមបច្ចុប្បន្នប៉ុណ្ណោះ។ គ្រូបបង្វឹករូបនេះបន្ថែមថា៖«បើសិនខ្ញុំគិតថា កីឡាករមិនទាន់អាចលេងបាននៅក្នុងក្រុមនោះ ខ្ញុំត្រូវតែធ្វើអ្វីមួយ ដែលខ្ញុំគិតថាវាជាកិច្ចការងារដ៏ល្អបំផុត។ គ្មាននរណាអាចផ្លាស់ប្ដូរអ្វី ដែល Bale ធ្លាប់បានធ្វើសម្រាប់ក្រុមកន្លងមកទេ ប៉ុន្តែក្នុងនាមជាគ្រូបង្វឹកម្នាក់ ខ្ញុំត្រូវតែធ្វើអ្វីមួយ ឬរស់នៅជាមួយបច្ចុប្បន្នភាព»។
នៅពេលដែលគេសួរពីវាសនារបស់ Bale និងអ្នកចាំទី Keylor Navas អាចបន្តរស់នៅជាមួយក្លិប Real Madrid ឬត្រូវផ្លាស់ចេញដែរទេ? លោក Zidane បានត្រឹមឆ្លើយដូច្នេះថា៖«ខ្ញុំមិនដឹងថាតើវាជាការប្រកួតលើកចុងក្រោយរបស់ពួកគេនៅBernabue ឬក៏អត់ទេ? ហើយខ្ញុំក៏មិនដឹងថា នឹងមានរឿងអ្វីកើតឡើងនៅពេលខាងមុខដែរ។ សម្រាប់ខ្ញុំ Keylor Navas ធ្វើបានល្អ ប៉ុន្តែយើងរង់ចាំមើលថា នឹងមានអ្វីកើតឡើងនារដូវកាលក្រោយ»។
ក្រុមយក្សស Real Madrid ស្ថិតនៅក្នុងចំណាត់ថ្នាក់លេខ៣ ដែលមាន៦៨ពិន្ទុ តាមពីក្រោយក្រុមលេខ២ Atletico Madrid ចំនួន៨ពិន្ទុ និងនៅឆ្ងាយពីក្រុមBacelona ម្ចាស់ពាន La Liga រហូតដល់១៨ពិន្ទុ៕
Tag:
កីឡារ
Zidane
អេស្ប៉ាញ
© រក្សាសិទ្ធិដោយ thmeythmey.com