អន្តរជាតិ
លោក Alan Delon និង Anouchka Delon ដែលជាកូនស្រីរបស់ខ្លួន។ AFP
×![]()
តារាសម្តែងជើងចាស់បារាំង លោក អាឡាំង ដឺឡុង (Alain Delon) បានអញ្ជើញទៅទទួលរង្វាន់កិត្តិយស Palme d'Or កាលពីថ្ងៃអាទិត្យ ក្នុងមហោស្រពភាពយន្ត Cannes ប្រចាំឆ្នាំ២០១៩ ។ ការសម្រេចផ្តល់រង្វាន់កិត្តិយសដល់តារាសម្តែងវ័យ៨៣ឆ្នាំរូបនេះ បានទទួលរងការរិះគន់ជាខ្លាំង ពាក់ព័ន្ធនឹងមតិយោបល់លោកកាលពីអតីតកាលចំពោះ រឿងអ្នកស្រឡាញ់ភេទដូចគ្នា និងការនិយាយមើលងាយមនុស្សស្រី។
ទោះបីជាមានការរិះគន់ តារាសម្តែងជើងចាស់ អាឡាំង ដឺឡុង នៅតែអាចជម្នះទទួលបានរង្វាន់កិត្តិយស Palme d’Or ដដែលកាលពីថ្ងៃទី ១៩ ឧសភា ។ ជុំវិញការរិះគន់ ម្ចាស់កម្មវិធីមហោស្រពភាពយន្ត Cannes បានចេញមុខការពារការសម្រេចចិត្តបែបនេះ ដោយលើកឡើងថា លោក អាឡាំង ដឺឡុង ពុំមែនជាតារាសម្តែងល្អឥតខ្ចោះឡើយ ប៉ុន្តែលោកត្រូវបានទទួលស្គាល់សម្រាប់អាជីពសម្តែងលោក។
មហោស្រពភាពយន្ត Cannes របស់បារាំង បានប្រកាសកាលពីខែមុនថា ខ្លួននឹងផ្តល់រង្វាន់កិត្តិយសដល់លោក អាឡាំង ដឺឡុង សម្រាប់អាជីពជាតារាសម្តែង ។ ភ្លាមៗក្រោយការប្រកាសនេះ ព្យុះរិះគន់ បានគ្របដណ្តប់លើការសម្រេចចិត្តនេះ ជាពិសេសមកពី ក្រុមអ្នកទាមទារសិទ្ធិសម្រាប់ស្ត្រី។
តាមការចុះផ្សាយទូរទស្សន៍ព័ត៌មាន FRANCE 24 លោកស្រី Marion Duquesne អ្នកនាំពាក្យម្នាក់របស់ក្រុមហ៊ុនសិទ្ធិស្ត្រីរបស់បារាំង Les Effrontées បញ្ជាក់ឲ្យដឹងថា ការផ្តល់រង្វាន់កិត្តិយសដល់បុរសដែលបានបញ្ចេញមតិយោបល់មានលក្ខណៈ រើសអើងអ្នកស្រឡាញ់ភេទដូចគ្នា និងមិនឲ្យតម្លៃលើស្ត្រី គឺជាការផ្ញើសារដ៏អាក្រក់មួយសម្រាប់មតិសាធារណៈ។
ក្នុងកិច្ចសម្ភាសនាពេលកន្លងទៅ លោក អាឡាំង ដឺឡុង ធ្លាប់បានចាត់ទុកខ្លួនលោកថា ជាបុរសដែលចូលចិត្តប្រើកម្លាំងបាយ និងបានសារភាពទៀតថា លោកធ្លាប់ទះកំភ្លៀងស្ត្រីដែលលោកបានទាក់ទងស្នេហាជាមួយទៀតផង។ លើសពីនេះ តារាសម្តែងជើងចាស់បារាំងរូបនេះ ក៏បានបញ្ចេញមតិប្រឆាំងទៅនឹងការទទួលស្គាល់ភាពស្របច្បាប់នៃអ្នកស្រឡាញ់ភេទដូចគ្នាផងដែរ។
លោក អាឡាំង ដឺឡុង មានភាពល្បីល្បាញខ្លាំងសម្រាប់ការសម្តែងក្នុងរឿងមួយចំនួន ក្នុងទសវត្សន៍ឆ្នាំ៦០ រួមមានដូចជា The Leopard (១៩៦៣) Le Samouraï (១៩៦៧) និង La Piscine (១៩៦៩)៕
Tag:
បារាំង
Alain Delon
Palme d\'Or
មហោស្រពភាពយន្ត Cannes
© រក្សាសិទ្ធិដោយ thmeythmey.com
