ជាតិ
នយោបាយជាតិ
លោក ខៀវ កាញារីទ្ធ ព្រមានបង្ហោះរូបមន្ត្រីដែលមានតែឈ្មោះ តែបើកប្រាក់ខែ
× ភ្នំពេញ៖ ដើម្បីការរួមចំណែកអភិបាលកិច្ចល្អ ស្របតាមទិសដៅរដ្ឋាភិបាលនោះ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ព្រមានបង្ហោះរូបមន្ត្រី ដែលមានតែឈ្មោះ ហើយអត់ធ្វើការ ដោយរង់ចាំតែបើកប្រាក់ខែក្រសួង នៅលើបណ្ដាញសង្គមហ្វេសប៊ុក។
រដ្ឋមន្ត្រីក្រសួងព័ត៌មាន បានសរសេរសារព្រមានបែបនេះ នៅលើបណ្ដាញសង្គមហ្វេសប៊ុកដូច្នេះថា៖«ក្រោយពីមានការរអ៊ូរទាំរបស់មន្ត្រីក្រសួងព័ត៌មាន ក្រសួងព័ត៌មានសុំឲ្យគ្រប់អគ្គនាយកដ្ឋាន បញ្ជូនឈ្មោះ និង រូបថត មន្ត្រីណាខ្លះ ដែលមានតែឈ្មោះ តែបើកប្រាក់ខែ ដើម្បីរួមចំណែកអភិបាលកិច្ចល្អរបស់រាជរដ្ឋាភិបាល ដើម្បីខ្ញុំបង្ហោះរូបអ្នកដែលស៊ីលើកម្លាំងមន្ត្រីក្រសួង»។
លោក ព្រាប កុល នាយកប្រតិបត្តិនៃអង្គការតម្លាភាព យល់ឃើញថា វិធានការរបស់រដ្ឋមន្ត្រីក្រសួងព័ត៌មាន ដែលព្រមានបង្ហោះរូបមន្ត្រីអសកម្មការងារម៉ោងរដ្ឋនោះ គឺជារឿងមួយល្អ ក្នុងការកំញើញឲ្យមន្ត្រីខ្ជិល និងអសកម្មការងាររដ្ឋនេះ មានការភ័យខ្លាច ហើយងាកមកបំពេញការងារវិញ។ ប៉ុន្តែការអនុវត្តវិធានការបែបនេះ គឺមិនទាន់គ្រប់គ្រាន់នៅឡើយទេ។ បើតាមលោក ព្រាប កុល គ្រប់ក្រសួង និងស្ថាប័នទាំងអស់ ត្រូវកំណត់វិធានរដ្ឋបាល និងតាមដានការងារប្រចាំថ្ងៃរបស់បុគ្គលឲ្យបានត្រឹមត្រូវ នោះទើបអាចដោះស្រាយ និងលុបបំបាត់មន្ត្រីកេងប្រវ័ញ្ចម៉ោងរដ្ឋ ហើយយកពេលទៅរកស៊ី និងធ្វើការងារឯកជន ដើម្បីផលប្រយោជន៍ខ្លួនបាន។
ថ្លែងប្រាប់សារព័ត៌មានថ្មីៗ នាយកប្រតិបត្តិនៃអង្គការតម្លាភាពរូបនេះ បាននិយាយដូច្នេះថា៖«វាជាវិធីមួយដែលធ្វើឲ្យ(មន្ត្រីរាជការកេងប្រវ័ញ្ចម៉ោងធ្វើការ)អាម៉ាសមុខ គឺជាវិធីមួយស្រាលទេ ដែលដាក់សម្ពាធឲ្យពួកគេមកធ្វើការ បើមិនមកធ្វើការទេ គាត់បង្ហាញរូបភាពបុគ្គលនោះ ឲ្យគេឃើញ ដើម្បីឲ្យអាម៉ាស។ ហើយវិធីហ្នឹង គឹគ្រាន់តែជាវិធីមួយក្នុងចំណោមវិធីច្រើន។ ប៉ុន្តែវិធីដែលមានប្រសិទ្ធភាពបំផុត គឺមានលក្ខខណ្ឌការងារ មានគោលការណ៍ មានច្បាប់ទម្លាប់ឲ្យពួកគាត់ដឹង ហើយមានយន្តការតាមដាន ត្រួតពិនិត្យពួកគាត់ឲ្យបានត្រឹមត្រូវ ហើយនឹងមើលលទ្ធផលការងាររបស់ពួកគាត់ ។ ទាំងនេះវាជាវិធី ដែលមានប្រសិទ្ធភាពការងារល្អបំផុត»។
ជុំវិញបញ្ហាមន្ត្រីរាជការស៊ីប្រាក់ខែ តែមិនព្រមធ្វើការបម្រើរដ្ឋឲ្យពេញដៃពេញជើង ពោលគឺយកពេលរដ្ឋទៅធ្វើការងារឯកជន ឬរកស៊ីខាងក្រៅនោះ គឺតែងតែមានការរិះគន់ជាបន្តបន្ទាប់ពីសំណាក់មហាជន ទៅលើការគ្រប់គ្រងរបស់ក្រសួង និងស្ថាប័នរដ្ឋ ដែលចំណាយថវិកាខ្ជះខ្ជាយលើមន្រ្តីខ្ជិលធ្វើការហើយ (អ្នកដែលបើកប្រាក់ខែ តែមិនធ្វើការ) ប៉ុន្តែការងារវិញ មិនសូវមានប្រសិទ្ធភាព ដោយសារសម្បូរមន្រ្តីទាំងនោះនៅតាមស្ថាប័ន៕
Tag:
ខៀវ កាញារីទ្ធ
ព័ត៌មាន
រាជការ
© រក្សាសិទ្ធិដោយ thmeythmey.com