ជាតិ
កម្លាំងនគរបាល ត្រៀមការពារសុវត្ថិភាពនិងសណ្ដាប់ធ្នាប់ ក្នុងពិធីច្រត់ព្រះនង្គ័ល រូបភាពពីអគ្គស្នងការដ្ឋាននគរបាលជាតិ
× អគ្គស្នងការដ្ឋាននគរបាលជាតិ បានប្រជុំពិភាក្សានិងផ្សព្វផ្សាយផែនការ គ្រប់អង្គភាពពាក់ព័ន្ធទាំងអស់ ត្រៀមការពារសន្តិសុខ សណ្តាប់ធ្នប់ និងសុវត្ថិភាព ក្នុងពិធីច្រត់ព្រះនង្គ័ល ដែលនឹងប្រព្រឹត្តនៅថ្ងៃទី២២ ខែឧសភា នៅខេត្តតាកែវ។ នេះបើតាមលោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិ។
លោក ឆាយ គឹមខឿន ប្រាប់សារព័ត៌មានថ្មីៗ តាមទូរស័ព្ទថា កម្លាំងសមត្ថកិច្ចនិងគ្រប់អាជ្ញាធរពាក់ព័ន្ធ បានត្រៀមការពារសុវត្តិភាពនិងសណ្ដាប់ធ្នាប់រួបជាស្រេច ចំពោះសុវត្តិភាពព្រះមហាក្សត្រ និងជូនប្រជាពលរដ្ឋ។ លោក ឆាយ គឹមខឿន សង្កត់ធ្ងន់ថា៖ «ផែនសម្រាប់ការការពារដល់ពលរដ្ឋចូលរួម, ការរៀបចំទីតាំងការពារក្នុងទីកន្លែងប្រារព្ធពិធី, ការការពារពីចម្ងាយ, ការសម្រួលចរាចរណ៍ និងដាក់ការពារនៅគោលដៅសំខាន់ៗគ្រប់ច្រក រួមជាមួយការត្រៀមឡានសង្គ្រោះបន្ទាន់»។
កាលពីថ្ងៃទី២០ឧសភា ឆ្នាំ២០១៩ លោក ទូច ណារ៉ុថ អគ្គស្នងការរងនគរបាលជាតិនិងជាប្រធាននាយកដ្ឋានអង្គរក្ស, លោក ម៉ន សាម៉ុន មេបញ្ជាការរងកងរាជអាវុធហត្ថលើផ្ទៃប្រទេស, លោក ខាន់ សុខា អភិបាលរងខេត្តតាកែវ និងអ្នកពាក់ព័ន្ធផ្សេងៗទៀត បានរៀបចំកិច្ចប្រជុំផ្សព្វផ្សាយផែនការ អំពីការការពារសុវត្ថិភាព និងសណ្ដាប់ធ្នាប់។ លើសពីនេះ គ្រប់អង្គភាពបានចុះពិនិត្យទីតាំងភូមសាស្ត្រតាមដងផ្លូវ និងកន្លែងប្រារព្ធព្រះរាជពិធីច្រត់ព្រះនង្គ័ល នៅកីឡាដ្ឋានគិរីវង់សុខសែនជ័យ។
ពិធីច្រត់ព្រះនង្គ័លឆ្នាំ២០១៩ ប្រារព្ធនៅកីឡាដ្ឋានគិរីវង់សុខសែនជ័យ ស្ថិតនៅភូមិត្រពាំងអង្គ សង្កាត់រកាក្រៅ ក្រុងដូនកែវ ខេត្តតាកែវ៕
Tag:
ការពារសន្តិសុខ
សណ្តាប់ធ្នាប់
ច្រត់ព្រះនង្គ័ល
© រក្សាសិទ្ធិដោយ thmeythmey.com