កីឡាជាតិ
ជាតិ
ពានសម្តេច ស ខេង រំពឹងរួមចំណែកជួយឲ្យកូនគោលជោគជ័យនៅស៊ីហ្គេមឆ្នាំ២០២៣
×![]()
ក្រុមវាយកូនគោលរបស់សម្តេច ស ខេង ដែលចាប់ដៃគ្នាជាមួយលោក សុខ ហុង និងលោក ឈុន អូន បានក្លាយជាម្ចាស់ជើងឯកប្រចាំពានរង្វាន់សម្តេចក្រឡាហោម ស ខេង ដែលរៀបចំដើម្បីអបអរខួបលើកទី៧៤ នៃការបង្កើតកងកម្លាំងនគរបាលជាតិ។ ចំណែកក្រុមសម្តេច ទៀ បាញ់ និងសម្តេច សាយ ឈុំ ទទួលបានចំណាត់ថ្នាក់ជាបន្តបន្ទាប់។ លោ ជា បូរ៉ា រំពឹងថា ព្រឹត្តិការណ៍នេះនឹងក្លាយជាផ្នែកមួយជួយពង្រឹងសមត្ថភាពកីឡាករក្នុងការឈានទៅរកភាពជោគជ័យនៅស៊ីហ្គេមឆ្នាំ២០២៣។
ព្រឹត្តិការណ៍ប្រកួតកីឡាវាយកូនគោលដណ្តើមពានរង្វាន់សម្តេចក្រឡាហោម ស ខេង នឹងក្លាយជាផ្នែកមួយជួយចូលរួមចំណែកអភិវឌ្ឍន៍វិស័យកីឡាវាយកូនគោលកម្ពុជាឲ្យកាន់តែរីកចម្រើន។ លើសពីនេះ វាជានឹងក្លាយជាកត្តាទាក់ទាញការចូលរួមសម្រាប់យុវជន ក៏ដូចជាជួយបង្កើនសមត្ថភាពកីឡាករ ដើម្បីឈានទៅរកភាពជោគជ័យនៅស៊ីហ្គេមឆ្នាំ២០២៣នៅកម្ពុជា។ នេះជាការបង្ហាញក្តីរំពឹងរបស់លោក ជា បូរ៉ា អគ្គលេខាធិការសហព័ន្ធកីឡាវាយកូនគោលកម្ពុជា។
នាពិធីបិទពានរង្វាន់សម្តេចក្រឡាហោម ស ខេង រដ្ឋលេខាធិការក្រសួងទេសចរណ៍រូបនេះបានរៀបរាប់ថា៖«សហព័ន្ធកីឡាវាយកូនគោលកម្ពុជាកំពុងកសាងសមត្ថភាព និងគុណផលកីឡាឲ្យស្របតាមផែនការ កែទម្រង់ និងផែនការយុទ្ធសាស្ត្រ ៤ឆ្នាំរំកិលរបស់គណៈកម្មាធិការជាតិអូឡាំពិកកម្ពុជា គឺ«កម្ពុជាឆ្ពោះទៅរកគុណផលកីឡាកម្រិតខ្ពស់»។ ខ្ញុំសង្ឃឹមជឿជាក់ថា ថ្ងៃអនាគតកីឡាវាយកូនគោលកម្ពុជា នឹងមានការរីកចម្រើនឆ្ពោះទៅកាន់ភាពជោគជ័យក្នុងការប្រកួតកីឡាស៊ីហ្គេម ដែលកម្ពុជាធ្វើជាម្ចាស់ផ្ទះនាឆ្នាំ២០២៣»។
សហព័ន្ធកីឡាវាយកូនគោលកម្ពុជាបង្កើតព្រឹត្តិការណ៍នេះឡើង គឺដើម្បីអបអរខួបលើកទី៧៤នៃថ្ងៃបង្កើតកងកម្លាំងនគរបាល ក៏ដូចជាផ្សព្វផ្សាយ និងទាក់ទាញយុវជនឲ្យចូលរួមលេងកីឡានេះឲ្យកាន់តែច្រើន។ បន្ថែមលើនេះ គឺដើម្បីបង្កើនភាពស្និទ្ធស្នាលរវាងថ្នាក់ដឹកនាំក្រសួងស្ថាប័នជាមួយកីឡាករកីឡាការិនី និងប្រជាពលរដ្ឋជាដើម។
ទន្ទឹមនឹងវាយតម្លៃខ្ពស់ចំពោះដំណើរការ ថាបានព្រឹត្តទៅយ៉ាងរលូនប្រកបដោយតម្លាភាព និងសុក្រឹតភាព លោក ជា បូរ៉ា អគ្គលេខាធិការសហព័ន្ធកីឡាវាយកូនគោលកម្ពុជាមានប្រសាសន៍ថា នេះជាលើកទី១ ដែលសហព័ន្ធបង្កើតព្រឹត្តិការណ៍ជាប្រវត្តិសាស្ត្រលក្ខណៈទ្រង់ទ្រាយធំនេះឡើង ដើម្បីរួមចំណែកអភិវឌ្ឍវិស័យកីឡាវាយកូនគោលនៅកម្ពុជា។
ក្រោយប្រកួតយ៉ាងស្វិតស្វាញពេញមួយថ្ងៃទី១៩ ឧសភា នៅទីលានវាយកូនគោលហ្គ្រេនភ្នំពេញ ម្ចាស់ជើងឯកពានរង្វាន់សម្តេចក្រឡាហោម ស ខេង លើវិញ្ញាសាក្រុម បានទៅលើក្រុមសម្តេច ស ខេង រដ្ឋមន្ត្រីក្រសួងមហាផ្ទៃ ដែលមានលោកឧកញ៉ា សុខ ហុង និងលោកឧកញ៉ា ឈុន អូន ជាសមាជិក។ ក្រុមនេះធ្វើបានក្នុងកម្រិតពិន្ទុដក៩(-9)។
ចំណែកក្រុមសម្តេច ទៀ បាញ់ រដ្ឋមន្ត្រីក្រសួងការពារជាតិជាមួយលោក ឥត សារ៉ាត់ និងលោក អ៊ុក សោកា ទទួលបានចំណាត់ថ្នាក់លេខ២ ក្រោយទទួលបានពិន្ទុដក៨(-8) ខណៈក្រុមសម្តេច សាយ ឈុំ ប្រធានព្រឹទ្ធសភា លោក ជា សុផារ៉ា និងលោក អ៊ុក សាវុធ ទទួលបានចំណាត់លេខ៣ ក្រោយធ្វើបានក្នុងកម្រិតពិន្ទុដក៦(-6)។
សម្រាប់ការប្រកួតឯកត្តជនដែលមានហានីកាប់ លោក សរ សិទ្ធិ ទទួលបានចំណាត់ថ្នាក់លេខ១ក្រោយធ្វើបាន៧២ពិន្ទុ រីឯលោក លី ហុង ទទួលបានចំណាត់ថ្នាក់លេខ២ក្រោយធ្វើបាន៧២ពិន្ទុដូចគ្នា ខណៈលោក លី គា ក្រោយធ្វើបាន៧៣ពិន្ទុទទួលបានលេខ៣។ ក្រៅពីពានរង្វាន់ទាំងពីរនេះ ក៏មានពានរង្វាន់ជាច្រើនទៀតផងដែរ។ ព្រឹត្តិការណ៍នេះ មានកីឡាករកីឡាការិនីចំនួន១៧៩នាក់ចូលរួម ក្នុងនោះប្រកួតជាក្រុមមានចំនួន៧២នាក់ ឯកត្តជន៨៦នាក់ និងនារី២១នាក់៕
Tag:
វាយកូនគោល
សម្តេច ស ខេង
© រក្សាសិទ្ធិដោយ thmeythmey.com
