ជាតិ
ព្រះរាជពិធីច្រត់ព្រះនង្គ័ល៖ ប្រផ្នូលល្អសសម្រាប់ស្រូវ ពោត សណ្តែក នៅឆ្នាំនេះ
× បន្ទាប់ពីការភ្ជួរជានិមិត្តរូបចំនួនបីជុំក្នុងទីព្រះស្រែនៅក្នុងកីឡដ្ឋានគិរីវង់សុខសែនជ័យ ក្រុងដូនកែវ ខេត្តតាកែវ គោឧសភរាជពីរក្បាលបានបរិភោគស្រូវ ៨៥ភាគរយ ពោត ៩០ភាគរយ សណ្តែក៨៥ភាគរយ ច្រើនជាងគេក្នុងចំណោមអាហារ៧មុខ រួមមាន ស្រូវ ពោត សណ្តែក ល្ងរ ស្មៅ ទឹក និងស្រា។ យោងតាមលទ្ធផលនៃការបរិភោគនេះ ព្រាហ្មណ៍ព្រះរាជគ្រូប្រចាំព្រះបរមរាជវាំង ដែលបានទស្សន៍ទាយទៅតាមក្បូនបុរាណ បានឲ្យដឹងថា ស្រូវ ពោត សណ្តែក ទទួលបានផលច្រើននៅឆ្នាំនេះ។
ព្រះរាជពិធីច្រត់ព្រះនង្គ័ល ដែលជានិមិត្តរូបនៃការចាប់ផ្តើមរដូវកសិកម្ម បានប្រារព្ធនៅទីព្រះស្រែក្នុងកីឡដ្ឋានគិរីវង់សុខសែនជ័យ ក្រុងដូនកែវ ខេត្តតាកែវ នាព្រឹកថ្ងៃពុធ ទី២២ ខែឧសភានេះ ត្រូវនឹងថ្ងៃ៤រោច ខែពិសាខ ពុទ្ធសករាជ២៥៦៣ ក្រោមរាជាធិបតីភាព ព្រះករុណា ព្រះមហាក្សត្រ ព្រះបាទសម្តេចព្រះបរមនាថ នរោត្តម សីហមុនី។
លោកអភិបាលខេត្តតាកែវ អ៊ូច ភា បានធ្វើជាស្តេចមាឃ រីឯភរិយាលោក ធ្វើមេហួរ នៅក្នុងព្រះរាជពិធីឆ្នាំនេះ៕
© រក្សាសិទ្ធិដោយ thmeythmey.com