ប្រមុខការពារជាតិអាមេរិកថា ចង់កំញើញអុីរ៉ង់ មិនដល់ថ្នាក់ធ្វើសង្គ្រាមឡើយ

អន្តរជាតិ

ប្រមុខការពារជាតិអាមេរិកថា ចង់កំញើញអុីរ៉ង់ មិនដល់ថ្នាក់ធ្វើសង្គ្រាមឡើយ

22, May 2019 , 3:30 pm

រូបភាព

រដ្ឋមន្រ្តីស្តីទីក្រសួងការពារជាតិអាមេរិក ផាទ្រីក សាណាហាន់ (ឆ្វេង) និងរដ្ឋមន្រ្តីការបរទេស ម៉ៃ ប៉ុមប៉េអូ (ស្ដាំ) ថ្លែងទៅកាន់អ្នកសារព័ត៌មាន។ រូបភាព AFP

ដោយ: តន ចាន់រិទ្ធារ៉ា

ស្របពេលការប្រឈមមុខជាមួយអ៊ីរ៉ង់កាន់តែតានតឹង រដ្ឋបាលប្រធានាធិបតី ដូណាល់ ត្រាំ បានបង្ហាញជំហរទន់ភ្លន់បន្តិចវិញ។ ពីវិមាន Capitol Hill ប្រមុខការពារជាតិអាមេរិក ផាទ្រីក សាណាហាន់ និយាយច្បាស់ៗថា ជំហរបស់អាមេរិក គឺគ្រាន់តែចង់កំញើញអ៊ីរ៉ង់ប៉ុណ្ណោះ ហើយគ្មានបំណងធ្វើសង្គ្រាមអ្វីឡើយ។ សម្ដីរបស់លោក សាណាហាន់ ហាក់ផ្ទុយពីការលើកឡើងរបស់លោក ត្រាំ ដែលគំរាមធ្វើឲ្យអ៊ីរ៉ង់រលាយសាបសូន្យនោះ។

នៅថ្ងៃទី២១ ខែឧសភា មន្ត្រីកំពូលរដ្ឋបាលប្រធានាធិបតី ដូណាល់ ត្រាំ ពីររូបគឺរដ្ឋមន្ត្រីស្តីទីក្រសួងការពារជាតិ ផាទ្រីក សាណាហាន់ និងរដ្ឋមន្ត្រីការបរទេស ម៉ៃ ប៉ុមប៉េអូ បានរាយការណ៍ព័ត៌មានសម្ងាត់ទាក់ទងបញ្ហាអ៊ីរ៉ង់ទៅកាន់សមាជិកជាន់ខ្ពស់សភាទាំងពីរ ស្របពេលដែលស្ថានការណ៍នៅឈូងសមុទ្រពែរ្សមិនទាន់ថយកម្ដៅ។ លោក សាណាហាន់ ក៏បញ្ជាក់ពីជំហររបស់អាមេរិកដែលមិនចង់ធ្វើសង្គ្រាមជាមួយអ៊ីរ៉ង់ឡើយ។

រឿងមិនចង់ធ្វើសង្គ្រាមនេះ ត្រូវបានមន្ត្រីអាមេរិកលើកឡើងជាច្រើនដងមកហើយ សូម្បីតែលោក ត្រាំ ផ្ទាល់ ដែលគំរាមកម្ទេចអ៊ីរ៉ង់មិនដាច់ពីមាត់នោះ ក៏ធ្លាប់និយាយបែបនេះដែរ។ ប៉ុន្តែ វត្តមាននាវាដឹកយន្តហោះចម្បាំង យន្តហោះទម្លាក់គ្រាប់បែក B-52 ដែលនៅមិនឆ្ងាយពីអ៊ីរ៉ង់ឯណោះទេ ទើបជារឿងធ្វើឲ្យកម្ដៅកើនឡើងស្រឺតៗនោះ ជាមួយនឹងការព្រួយបារម្ភថា ភាពភាន់ភាំងណាមួយក្នុងចំណោមភាគីពាក់ព័ន្ធ ប្រាកដជានាំទៅរកជម្លោះពេញទីមិនខាន។

ក្រោយជំនួបជាសមាជិកសភា លោក សាណាហាន់ ប្រាប់អ្នកសារព័ត៌មានដែលចោមរោមលោក ថា ការបញ្ជូននាវាដឹកយន្តហោះ និងយន្តហោះទម្លាក់គ្រាប់បែក ជាការឆ្លើយតបមួយ ហើយវាក៏បានផ្ដល់សញ្ញាច្បាស់ទៅកាន់អ៊ីរ៉ង់ដែរ។ បើតាមទីភ្នាក់ងារព័ត៌មាន AFP ប្រមុខមន្ទីរបញ្ចកោណនេះ អះអាងថា ការសម្ញែងអាវុធទាំងនេះ បានកំញើញអ៊ីរ៉ង់មិនឲ្យធ្វើសកម្មភាពអ្វីទៀត ហើយគោលដៅសំខាន់ គឺធ្វើយ៉ាងណាកុំឲ្យគិតគូរខុសឲ្យសោះ។

ដោយឡែកមុនពេលចូលប្រជុំនៅវិមាន Capitol Hill មន្ត្រីជាន់ខ្ពស់រូបនេះក៏និយាយបែបលើកសរសើរដល់ការពង្រាយសព្វាវុធនៅតំបន់ឈុងសមុទ្រ ថា ចំណាត់ការដ៏ប្រុងប្រយ័ត្នដែលបានទប់ស្កាត់ការគំរាមកំហែងពីសំណាក់ទីក្រុងតេហេរ៉ង់។ នៅពេលសួរថា លោកចង់បានមានន័យដូចម្ដេចពេលលើកឡើងថា បានទប់ស្កាត់ការគំរាម លោកពន្យល់ថា អាមេរិក មិនបានរងវាយប្រហារណាមួយដោយកម្លាំងអ៊ីរ៉ង់ ឬកម្លាំងក្រោមបង្គាប់អ៊ីរ៉ង់នាពេលកន្លងមកឡើយ។

តាមពិតទៅ អាមេរិក ហាក់បានផ្ញើសារចម្រុះជុំវិញបញ្ហាអ៊ីរ៉ង់នេះ។ មានពេលខ្លះ មន្ត្រីមួយចំនួនប្រកាសពីជំហរតឹងរ៉ឹងដាក់អ៊ីរ៉ង់ ហើយពេលខ្លះ មន្ត្រីផ្សេងទៀត បែរជាបញ្ចេញជំហរបែបទន់ភ្លន់ទៅវិញ។ មន្ត្រីក្នុងរដ្ឋបាលលោក ត្រាំ ដែលមានជំហរតឹងតែងជាងគេ គឺទីប្រឹក្សាសន្តិសុខជាតិ ចន ប៊ូលតុន ។ លោកតែងតែចង់ឲ្យអាមេរិកដាក់បន្ទុកខ្លាំងអ៊ីរ៉ង់ ជាការធម៌ត្រជាក់ដូចមន្ត្រីឯទៀត។ លោក ត្រាំ ធ្លាប់និយាយថា លោកត្រូវឃុំគ្រងមន្ត្រីរូបឲ្យបានខ្លាំង៕