ជាតិ
សេដ្ឋកិច្ច
ធនាគារអភិវឌ្ឍន៍ជនបទ ត្រៀមថវិកា២លានដុល្លារសម្រាប់ការផលិត«បន្លែសុវត្ថិភាព»ខ្នាតតូច នៅកម្ពុជា
× ភ្នំពេញ៖ ធនាគារអភិវឌ្ឍន៍ជនបទ បានត្រៀមថវិកា២លានដុល្លារ សម្រាប់គាំពារដល់សហគមដាំបន្លែសុវត្ថិភាពខ្នាតតូចទូទាំងប្រទេស ដើម្បីលើកកម្ពស់សុខមាលភាពប្រជាពលរដ្ឋ ។ ជាពិសេសកាត់បន្ថយការប្រើប្រាស់បន្លែគីមី និងគ្មានគុណភាព។
លោក កៅ ថាច អគ្គនាយកធនាគារអភិវឌ្ឍន៍ជនបទ បានបញ្ជាក់ថា គម្រោងកញ្ចប់ថវិកា២លានដុល្លារនេះ នឹងអនុវត្តនៅពេលខាងមុខ ។ ក្រៅពីត្រៀមថវិកាសម្រាប់គាំពារដល់សមាគមដាំបន្លែសុវត្ថិភាពនេះ ខាងធនាគារអភិវឌ្ឍជនបទ ក៏មានកញ្ចប់ឥណទានសម្រាប់ក្រុមហ៊ុនបញ្ជាទិញបន្លែសុវត្ថិភាពពីសមាគម ខ្ចីយកទៅប្រើប្រាស់ទៀតផង។
ប្រភពរូប៖ បានពីទំព័រហ្វេសប៊ុកធនាគារអភិវឌ្ឍន៍ជនបទ
លោក កៅ ថាច បានប្រាប់សារព័ត៌មានថ្មីៗ នៅថ្ងៃទី២២ ឧសភា ដូច្នេះថា៖«គម្រោងគាំពារដល់ការផលិតបន្លែសុវត្ថិភាពនេះ គឺផ្តោតទៅលើសមាគមកសិកម្ម និងអ្នកផ្គត់ផ្គង់សម្ភារកសិកម្ម ដូចជាជី និងពូជបន្លែជាដើម។ ហើយខេត្តនីមួយៗ អាចនឹងផ្តោតទៅលើប្រភេទបន្លែផ្សេងៗគ្នា។ ដូចជាខេត្តកណ្តាល យើងផ្តោតលើបន្លែប្រភេទស្លឹក, ខេត្តភាគឦសានយើងផ្តោតលើបន្លែប្រភេទមើម និងខេត្តផ្សេងទៀត យើងផ្តោតទៅលើបន្លែប្រភេទដើម។ យើងធ្វើបន្លែកុំឱ្យជាន់គ្នា ដើម្បីផ្តល់ភាពងាយស្រួលក្នុងស្វែងរក និងចាប់ទីផ្សារផ្សេងៗគ្នា។ ហើយតម្លៃបន្លែសុវត្ថិភាពនេះ នឹងអាចតម្លៃប្រហាក់ប្រហែលទៅនឹងបន្លែធម្មតាផងដែរ»។
សម្រាប់ការជួយដល់អ្នកផលិតបន្លែសុវត្ថិភាព គឺជាការសាកល្បងលើកទីមួយ របស់ធនាគារអភិវឌ្ឍន៍ជនបទ ក្នុងការចូលរួមលើកកម្ពស់ជីវភាពប្រជាកសិករ ក៏ដូចជាការចូលរួមកាត់បន្ថយការប្រើប្រាស់បន្លែគីមីផងដែរ។
កាលពីថ្ងៃទី១៧ឧសភា ឆ្នាំ២០១៩ ធនាគារអភិវឌ្ឍន៍ជនបទ បានប្រជុំពិភាក្សាអំពីគម្រោងគាំទ្រការដាំដុះបន្លែសុវត្ថិភាពនៅកម្ពុជា ជាមួយតំណាងក្រុមហ៊ុនបោះដុំ-លក់បន្លែសុវត្ថិភាពជាង១០ក្រុមហ៊ុនប្រចាំនៅរាជធានីភ្នំពេញ។ ការប្រជុំបានសម្រេចបង្កើតក្រុមការមួយឡើង ដោយមានតំណាងពីធនាគារអភិវឌ្ឍន៍ជនបទ ក្រុមហ៊ុនទិញ-លក់បន្លែសុវត្ថិភាព ដើម្បីសិក្សារួមគ្នាលើបញ្ហាទីផ្សារបន្លែ និងយន្តការនៃគន្លឹះសំខាន់ៗ ដើម្បីអភិវឌ្ឍការដាំដុះបន្លែសុវត្ថិភាពរបស់ប្រជាកសិករឱ្យមានប្រសិទ្ធភាពខ្ពស់៕
Tag:
កសិកម្ម
បន្លែសុវត្ថិភាព
កៅ ថាច
© រក្សាសិទ្ធិដោយ thmeythmey.com