ស្នងការភ្នំពេញ បង្កើតក្រុមអន្តរាគមន៍ពិសេស ដោយសុំឲ្យវៀតណាម ជួយបណ្តុះបណ្តាល

ជាតិ

សង្គមជាតិ

ស្នងការភ្នំពេញ បង្កើតក្រុមអន្តរាគមន៍ពិសេស ដោយសុំឲ្យវៀតណាម ជួយបណ្តុះបណ្តាល

22, May 2019 , 9:39 pm

រូបភាព

ជំនួបរវាងលោក ស ថេត (ស្តាំដៃ) និង គណៈប្រតិភូវៀតណាម (រូបពីស្នងការដ្ឋាននគរបាលរាជធានីភ្នំពេញ)

ដោយ: ថ្មីៗ

លោក ស ថេត ស្នងការនគរបាលរាជធានីភ្នំពេញ ប្រាប់ទៅគណៈប្រតិភូវៀតណាមថា លោក នឹងបង្កើតក្រុមអន្តរាគមន៍ពិសេស ដែលមានកម្លាំង៥០ទៅ៦០នាក់។ គណៈប្រតិភូវៀតណាម បានមកទស្សនកិច្ចនៅស្នងការដ្ឋាននគរបាលរាជធានីភ្នំពេញ នាថ្ងៃទី២១ ខែឧសភា ឆ្នាំ២០១៩ ។

ក្នុងជំនួបនោះ លោក ស ថេត បានស្នើឲ្យភាគីវៀតណាមជួយបណ្តុះបណ្តាល និងបំប៉នជំនាញដល់ក្រុមអន្តរាគមន៍នេះ។ លោក ប្រាប់សារព័តមានថ្មីៗថា តាមទូរសព្ទ នៅល្ងាចថ្ងៃទី២២ឧសភានេះថា ក្រុមអន្តរាគមន៍ពិសេសនេះ គឺត្រូវបានជ្រើសរើសចេញពីកម្លាំងរបស់ស្នងការដ្ឋាននគរបាលរាជធានីភ្នំពេញ មិនមែនជ្រើសរើសពីណាផ្សេងនោះទេ។

លោក បញ្ជាក់បែបនេះថា «កម្លាំងអន្តរាមន៍នេះ ទុកជួយប្រជាពលរដ្ឋ ពេលជួបគ្រោះអាសន្នផ្សេងៗ។ តាមពិត យើង មានស្រាប់ហើយ រាល់ថ្ងៃហ្នឹង យើងមានកម្លាំងជាង២០០ ហើយយើងគ្រាន់តែរើសមួយចំនួន ដែលក្មេងនិងមានកម្ពស់ប្រហែលគ្នា ធ្វើជាកម្លាំងអន្តរាគមន៍ពិសេស ដើម្បីឲ្យវៀតណាមជួយបណ្តុះបណ្តាលបន្ថែម»។

បើតាមលោកស្នងការ គណ:ប្រតិភូវៀតណាម បានសន្យាថា នឹងរាយការណ៍ជូនថ្នាក់ដឹកនាំរបស់ខ្លួន ដើម្បីពិចារណាលើការជួយបណ្ដុះបណ្ដាល និងបំប៉នជំនាញដល់ក្រុមកុម៉ង់ដូរបស់ស្នងការដ្ឋាននគរបាលរាជធានីភ្នំពេញ៕