Spurs ហាមអ្នកគាំទ្រ៣នាក់ចូលទស្សនាវគ្គផ្តាច់ព្រ័ត្រ Champions League ព្រោះយកសំបុត្រលក់បន្ត

កីឡាអន្តរជាតិ

អន្តរជាតិ

Spurs ហាមអ្នកគាំទ្រ៣នាក់ចូលទស្សនាវគ្គផ្តាច់ព្រ័ត្រ Champions League ព្រោះយកសំបុត្រលក់បន្ត

22, May 2019 , 6:39 pm

រូបភាព

ដោយ: ទេព ពិទូរ្យ

ក្លិប Tottenham Hotspur សម្រេចហាមអ្នកគាំំទ្រ៣រូបមិនឲ្យចូលទស្សនាការប្រកួតក្រោយរកឃើញថា ពួកគេបានយកសំបុត្រវគ្គផ្តាច់ព្រ័ត្រ UEFA Champions League ដែលទិញរួចយកទៅដាក់លក់បន្តលើវេបសាយយ៉ាងអាណាធិបតេយ្យ។ នេះបើតាមសេចក្តីប្រកាស់របស់ក្លិប Spurs នៅថ្ងៃទី២១ ខែឧសភា។

ក្រុម Spurs នឹងត្រូវតទល់ជាមួយ Liverpool ក្នុងជំនួបវគ្គផ្តាច់ព្រ័ត្រពានកំពូលអឺរ៉ុបនៅទីក្រុងម៉ាឌ្រីដប្រទេសអេស្ប៉ាញ នៅថ្ងៃទី ១ ខែមិថុនា ដោយក្រុមនីមួយៗទទួលបានសំបុត្រចំនួន ១៧០០០ សន្លឹក នៅកីឡដ្ឋាន Wanda Metropolitano ដែលផ្ទុកទស្សនិកជនសរុបចំនួន ៦៣៥០០នាក់។

តាមច្បាប់ចាប់តាំងពីឆ្នាំ ១៩៩៤ មក សម្រាប់ក្រុមនៅអង់គ្លេស សំបុត្រទិញរួចមិនអាចយកទៅដាក់លក់បន្តឲ្យជនបន្ទាប់ដោយគ្មានការអនុញ្ញាតឡើយ។

តាមរយៈសេចក្តីប្រកាសរបស់ក្លិប Spurs ពួកគេបានរំឭកដល់អ្នកគាំទ្រថា៖«សំបុត្រដែលបានទិញគឺសម្រាប់ការប្រើប្រាស់បុគ្គលតែមួយគត់។ ការផ្ទេរឬលក់សំបុត្រដោយខុសច្បាប់ គឺរំលោភលើលក្ខខណ្ឌរបស់យើង ហើយវាផ្ទុយនឹងច្បាប់ផងដែរ»។

ក្រុមមាន់ខ្នាយមាសថែមទាំងស្នើសុំកុំឲ្យអ្នកគាំទ្រខ្លួនបំផ្លាញឱកាសដ៏ធំបំផុតក្នុងប្រវត្តិសាស្ត្រក្លិបតាមរយៈការលក់សំបុត្រពីមួយទៅមួយយ៉ាងអាណាធិបតេយ្យ។

Liverpool ឯណោះវិញក៏កំពុងបើកការស៊ើបអង្កេតលើអ្នកគាំទ្ររបស់ខ្លួនចំនួន៥នាក់ដែលបានទិញសំបុត្រហើយធ្វើរឿងដូចគ្នានេះដែរ។ ប៉ុន្តែបើរកឃើញករណីនេះមែន ហង្សក្រហមនឹងដាក់ពិន័យអ្នកគាំទ្រខ្លួនមិនឲ្យចូលទស្សនាអស់មួយជីវិតតែម្តង៕