ជាតិ
នយោបាយជាតិ
×![]()
ដោយ: ថ្មីៗ
ភ្នំពេញ៖ តើអ្វីទៅជានយោបាយបង្កក «Frozen Politics» «Gel Politique»? វាគឺជានយោបាយមួយ ដែលត្រូវបានគេប្រើប្រាស់តាមរយៈការផ្តាច់ទំនាក់ទំនងការទូត ឬវិធីផ្សេងទៀត ដើម្បីដាក់សម្ពាធគ្នាទៅវិញទៅមក នៅពេលភាគីទាំងពីរ គ្មានការចុះសម្រុងគ្នា។
ទំនាក់ទំនងការទូត ឬនយោបាយការបរទេស រវាងប្រទេសនីមួយៗ តែងតែមានភាពល្អ អាក្រក់ ត្រជាក់ និងក្តៅ។ ការប្រើប្រាស់នយោបាយការទូត គឺមានការបត់បែនតាមកាលៈទេសៈ និងគ្រប់ស្ថានភាពជាក់ស្ដែង។ ប៉ុន្តែបើឈានដល់ចំណុចមួយ ដែលភាគីទាំងសងខាង ខ្វះការយល់ចិត្តគ្នា និងគ្មានការចុះសម្រុងគ្នានោះ ការប្រើប្រាស់នយោបាយការទូត បែបធម៌ក្តៅដាក់គ្នា នឹងអាចកើតឡើងជាក់ជាមិនខាន។
ត្រង់ចំណុចនេះសារព័ត៌មានThmeyThmey សូមលើកយកពាក្យនយោបាយបង្កក ដែលមាននៅក្នុងសទ្ទានុក្រមវិទ្យាសាស្ត្រនយោបាយ និងការទូតខ្មែរ-អង់គ្លេស-បារាំង របស់ក្រុមប្រឹក្សាជាតិភាសាខ្មែរ ដែលចេញផ្សាយកាលពីឆ្នាំ២០១៤ មកបកស្រាយ។
នយោបាយបង្កក គឺជានយោបាយមួយ ដែលផ្ដាច់ទំនាក់ទំនងជាមួយប្រទេសណាមួយ ឬក្រុមណាមួយ ដែលបានប៉ះពាល់ផលប្រយោជន៍ ដល់ប្រទេសឬក្រុមនោះ។ វាមានន័យថា ជានយោបាយប្រើប្រាស់វិធីបញ្ឈប់ទំនាក់ទំនងការបរទេស ការទូត និងផ្នែកសេដ្ឋកិច្ច។ នយោបាយនេះ កើតឡើងតែនៅក្នុងរយៈពេលណាមួយ ដែលភាគីទាំងសងខាងមិនទាន់ឯកភាព ឬស្រុះស្រួលគ្នា។
ក្នុងន័យនេះ គេអាចឲ្យជាឧទាហរណ៍ ទាក់ទងទៅនឹងបញ្ហាទំនាស់រវាងរុស្ស៊ី និងហ្ស៊កហ្ស៊ី ដែលឈានដល់ការប្រើប្រាស់នយោបាយបង្កកនេះ។ កាលណោះ នៅថ្ងៃទី០៨ សីហា ឆ្នាំ២០០៨ ក្រោយពីមានទំនាស់រវាងសហព័ន្ធរុស្ស៊ី និងហ្ស៊កហ្ស៊ី (Georgia) បានធ្វើឲ្យសហគមន៍អឺរ៉ុប និងសហរដ្ឋអាមេរិក បង្កកទំនាក់ទំនងជាមួយរុស្ស៊ី។ ឯរុស្ស៊ី វិញ ក៏បានឆ្លើយតបទៅសហគមន៍អឺរ៉ុប ដោយធ្វើនយោបាយបង្កកដូចគ្នា តាមរយៈការផ្ដាច់ការផ្គត់ផ្គង់ថាមពលឧស្ម័ន ដោយចោទអ៊ុយក្រែនថា បានបូមយកឧស្ម័នប្រាសចាកពីកិច្ចព្រមព្រៀង ដែលធ្វើឲ្យទំនាស់នេះ កាន់តែមានសភាពប្រឈមដាក់គ្នា កាន់តែតានតឹងឡើងរវាងរុស្ស៊ី និងអឺរ៉ុប។ បញ្ហានេះ បានអូសបន្លាយរហូតដល់ថ្ងៃទី១៨ មករា ឆ្នាំ២០០៩ ទើបមានជំនួបទ្វេរភាគីរវាងនាយករដ្ឋមន្ត្រីអ៊ុយក្រែន និងនាយករដ្ឋមន្ត្រីរុស្ស៊ី ដើម្បីដោះស្រាយបញ្ហានេះ ដោយមានការចូលរួមពីប្រទេសបារាំង អ៊ីតាលី អេស្ប៉ាញ និងអាល្លឺម៉ង់ផងដែរ។
ចំណុចផ្អាកទំនាក់ទំនងការទូត និងផ្ដាច់ការផ្គត់ផ្គង់ទំនិញ នៃផ្នែកសេដ្ឋកិច្ចនេះ គឺជាយុទ្ធសាស្ត្រនយោបាយបង្កក ដើម្បីដាក់សម្ពាធគ្នាទៅវិញទៅមក។
សារព័ត៌មានThmeyThmey ទទួលបានសិទ្ធិចុះផ្សាយ ពីក្រុមប្រឹក្សាជាតិភាសាខ្មែរ ។
Tag:
នយោបាយ
ការទូត
ក្រុមប្រឹក្សាជាតិភាសាខ្មែរ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
