កីឡាអន្តរជាតិ
អន្តរជាតិ
World Cup ឆ្នាំ២០២២ នៅកាតា រក្សា៣២ក្រុមដដែល មិនទាន់ឡើងដល់៤៨ក្រុមឡើយ
×![]()
ដោយ: ទេព ពិទូរ្យ
សហព័ន្ធកីឡាបាល់ទាត់អន្តរជាតិ (FIFA) បានសម្រេចលុបចោលផែនការបន្ថែមក្រុមពី ៣២ ទៅ៤៨ វិញសម្រាប់ការប្រកួតពានរង្វាន់បាល់ទាត់ពិភពលោក World Cup ឆ្នាំ២០២២ នៅកាតា។
ប្រធាន FIFA លោក Gianni Infantino ធ្លាប់លើកឡើងកាលពីឆ្នាំមុនថា ការពង្រីកលើសពី៣២ក្រុមអាចនឹងត្រូវយកទៅអនុម័តនៅឆ្នាំ ២០២៦ ឬនៅឆ្នាំ ២០២២ នៅក្នុងប្រទេសកាតាតែម្តង។ ប៉ុន្តែដោយមើលឃើញថាការបន្ថែមក្រុមនេះត្រូវលេងលើសចំនួនថ្ងៃធម្មតា និងពិបាកក្នុងការដំណើរការការប្រកួតនៅក្នុងប្រទេសកាតាតែមួយដោយតម្រូវឲ្យកាតារំលែកការប្រកួតទៅបណ្តាប្រទេសជិតខាងក្នុងតំបន់នោះ ទើបធ្វើឲ្យ FIFA សម្រេចលុបចោលការផ្លាស់ប្តូរវិញតែម្តង។
ការលុបចោលគម្រោងនេះ គឺបន្ទាប់ពីស្ថាប័នគ្រប់គ្រងកីឡាបាល់ទាត់ពិភពលោកបានពិគ្រោះយោបល់គ្នាយ៉ាងហ្មត់ចត់ ហើយមើលឃើញថា ការសម្រេចបន្ថែមចំនួនប្រទេសចូលរួមក្នុងព្រឹត្តិការណ៍បាល់លំដាប់ពិភពលោក មិនអាចធ្វើទៅបានឥឡូវនេះទេ។
មួយវិញទៀត កាតាក៏ធ្លាប់មានបញ្ហានយោយបាយជាមួយប្រទេសជិតខាងដោយហ៊ុមព័ទសេដ្ឋកិច្ចផ្លូវអាកាស ផ្លូវទឹក និងផ្លូវគោកជាមួយអារ៉ាប់រួមអាមេរ៉ាត និងបារ៉ែន ដែលធ្វើឲ្យមានភាពស្មុគស្មាញក្នុងការចែករំលែកទីលានប្រកួតខ្លះទៅក្រៅប្រទេស។
លោក Infantino បន្ថែមទៀតថាអង្គភាពលោកបានព្យាយាមស្វែងរកលទ្ធភាពសម្រាប់ម្ចាស់ផ្ទះកាតាដើម្បីដឹកនាំ ៤៨ ក្រុមប្រកួតប្រជែងដែរ ប៉ុន្តែបានសម្រេចមិនបន្តផែនការនេះវិញ ដ្បិតមិនមានពេលវេលាគ្រប់គ្រាន់ក្នុងការវាយតម្លៃគ្រប់ជ្រុងជ្រោយនៃផលប៉ះពាល់របស់វា។
បើទោះបិនបន្ថែមនៅឆ្នាំ២០២២នេះ ប៉ុន្តែ FIFA ប្រកាសម្តងរួចមកហើយថា FIFA World Cup ឆ្នាំ២០២៦ ដែលមាន សហរដ្ឋអាមេរិក កាណាដា និងម៉ិកស៊ិកធ្វើជាម្ចាស់ផ្ទះនោះ នឹងមានក្រុម ៤៨ចូលរួមប្រកួតប្រជែងជាលើកដំបូង បន្ទាប់ពីមានការបោះឆ្នោតគាំទ្រលើការបន្ថែមក្រុមមានចំនួនច្រើនលើសលុប៕
Tag:
បាល់ទាត់
FIFA World Cup
Gianni Infantino
© រក្សាសិទ្ធិដោយ thmeythmey.com
