អន្តរជាតិ
កាណាដាសុខចិត្តដឹកសំរាមទៅវិញ ក្រោយការគំរាមរបស់លោក ឌូទើតេ
× ទីបំផុត កាណាដា បានសម្រេចចិត្តប្រមូលមកវិញសំរាមរបស់ខ្លួនដែលត្រូវបានដឹកទៅចោលលើទឹកដីហ្វីលីពីនកាលពីឆ្នាំ២០១៣ ។ រដ្ឋមន្ត្រីបរិស្ថានកាណាដា និយាយថា រដ្ឋាភិបាលទីក្រុងអូតាវ៉ា នឹងចំណាយលុយដើម្បីចាត់ចែងការដឹកជញ្ជូនសំរាមចំនួន៦៩កុងតឺណ័រមកវិញ ទោះវាជារឿងរបស់ក្រុមហ៊ុនឯកជនក៏ដោយ។ ដោយសាររឿងសំរាមនេះ ទំនាក់ទំនងរវាងហ្វីលីពីន និងកាណាដា បានធ្លាក់ចុះដល់កម្រិតមួយគួរឲ្យបារម្ភ។
បញ្ហាសំរាមដែលជារឿងប្រទាំងប្រទើសក្នុងទំនាក់ទំនងរវាងហ្វីលីពីន និងកាណាដា ទំនងជាបញ្ចប់នៅត្រឹមអាណត្តិលោកប្រធានាធិបតី រ៉ូឌ្រីហ្គោ ឌូទើតេ នេះហើយ ដោយកាណាដាសម្រេចចិត្តទទួលយកសំរាមទៅវិញទាំងអស់។ បញ្ហាសំរាមដែលបន្សល់ទុកតាំងពីរដ្ឋាភិបាលមុនមក ធ្វើឲ្យទំនាក់ទំនងទ្វេភាគធ្លាក់ចុះយ៉ាងខ្លាំង ព្រោះទីក្រុងម៉ានីលចង់ឲ្យទីក្រុងអូតាវ៉ាយកសំរាមទៅវិញ តែអូតាវ៉ានៅអេះអុញរហូតមក។
រដ្ឋមន្ត្រីបរិស្ថានកាណាដា Catherine McKenna ប្រកាសនៅថ្ងៃទី២២ ខែឧសភា ថា រដ្ឋាភិបាលកាណាដា បានប្រគល់សិទ្ធិឲ្យក្រុមហ៊ុនឈ្មោះ Bolloré Logistics Canada ដើម្បីទទួលខុសត្រូវលើការប្រមូលសំរាមចំនួន៦៩កុងតឺណ័រពីហ្វីលីពីនមកវិញនៅត្រឹមដំណាច់ខែមិថុនាខាងមុខ។ លោកស្រីបន្តថា សំរាមនឹងត្រូវបំផ្លាញតាមស្តង់ដារបស់កាណាដានៅរដូវក្ដៅខាងមុខ ឯការចំណាយទាំងអស់ជាបន្ទុករដ្ឋាភិបាល។ គេរំពឹងថា ថ្លៃចំណាយមានចំនួន១,១៤លានដុល្លារ។
ការប្រកាសរបស់រដ្ឋមន្ត្រីកាណាដា ធ្វើឡើងបន្ទាប់ពីលោក ឌូទើតេ បានគំរាមទីក្រុងអូតាវ៉ាជាថ្មីទៀតលើរឿងសំរាមនេះ។ លោកប្រធានាធិបតីហ្វីលីពីនរូបនេះ បានបញ្ជាឲ្យរដ្ឋាភិបាលលោកជួលក្រុមហ៊ុនឯកជនដើម្បីដឹកជញ្ជូនសំរាមទៅទម្លាក់ចោលក្នុងដែនទឹកកាណាដាវិញ បើកាណាដាមិនប្រមូលដោយខ្លួនឯង។ មន្ត្រីរដ្ឋាភិបាលទីក្រុងម៉ានីលថែមទាំងនិយាយថា រដ្ឋាភិបាលលោក ឌូទើតេ នឹងចេញថ្លៃដឹកសំរាមនេះទៀតផង។
បញ្ហាសំរាម កើតឡើងតាំងពីឆ្នាំ២០១៣ មកម្ល៉េះ ដោយសំរាមចំនួន១០៣កុងតឺណ័រ ត្រូវបានដឹកដោយក្រុមហ៊ុនកាណាដាមួយទៅកាន់ទឹកដីហ្វីលីពីន ដោយអះអាងថា ជាសំរាមដែលអាចប្រើប្រាស់ឡើងវិញបាន។ សំរាមចំនួន៣៤ កុងតឺណ័រ ត្រូវបានរដ្ឋាភិបាលហ្វីលីពីនកម្ទេចចោល ទោះជាមានការប្រឆាំងយ៉ាងណាក្ដី។ ចំណែកសំរាមសេសសល់ ក៏បន្តរក្សាទុកដល់សព្វថ្ងៃរហូតក្លាយជាជម្លោះរវាងប្រទេសទាំងពីរតែម្ដង។
តាមពិតទៅ ទីក្រុងអូតាវ៉ា ហាក់ស្ទាក់ស្ទើរក្នុងការប្រមូលសំរាមទៅវិញ ទោះហ្វីលីពីនទាមទារជាច្រើនជាលើកក្ដី ព្រោះសំរាមទាំងនោះ ស្ថិតក្រោមកិច្ចព្រមព្រៀងរវាងវិស័យឯកជនប៉ុណ្ណោះ។ រដ្ឋបាលលោក ឌូទើតេ ហាក់លេងខ្លាំងដៃបន្តិចជុំវិញបញ្ហានេះ។ ដោយសារកាណាដាមិនយកស្ដាប់ការព្រមានជាច្រើនដងនោះ ទីក្រុងម៉ានីលក៏សម្រេចចិត្តកោះហៅអគ្គរដ្ឋទូត និងមន្ត្រីកុងស៊ុលនៅកាណាដាចូលស្រុកវិញទៀតផង។ ចុងក្រោយទើបកាណាដាសុខចិត្តធ្វើតាមការទាមទារ៕
Tag:
កាណាដា
ហ្វីលីពីន
ឌូទើតេ
សំរាម
© រក្សាសិទ្ធិដោយ thmeythmey.com