អន្តរជាតិ
វៀតណាម ស្នើប្រេស៊ីលបើកទីផ្សារកសិកម្មសម្រាប់ខ្លួន និងសន្យាធ្វើជាស្ពានភ្ជាប់ក្រុមសេដ្ឋកិច្ចអាស៊ាន-អាមេរិកខាងត្បូង
នាយករដ្ឋមន្ត្រីវៀតណាម និងរដ្ឋមន្ត្រីកសិកម្មប្រេស៊ីល (រូបភាព៖ VNA)
×![]()
រដ្ឋាភិបាលវៀតណាម បានបង្ហាញជំហរមុតមាំក្នុងការបង្កើនកិច្ចសហប្រតិបត្តិការពាណិជ្ជកម្ម វិនិយោគ និងកសិកម្មជាមួយនឹងរដ្ឋាភិបាលប្រេស៊ីល។ វៀតណាម ក៏បានស្នើត្រង់ៗទៅកាន់ប្រេស៊ីលដើម្បីបើកចំហរទីផ្សាររបស់ខ្លួនដើម្បីវៀតណាមអាចមានលទ្ធភាពនាំចូលផលិតផលកសិកម្មទៅទីនោះកាន់តែទូលាយផងដែរ។
នាជំនួបក្នុងរដ្ឋធានីហាណូយជាមួយនឹងរដ្ឋមន្ត្រីកសិកម្មប្រេស៊ីល លោកស្រី Terresa Cristina Correa លោកនាយករដ្ឋមន្ត្រីវៀតណាម Nguyễn Xuân Phúc បានធ្វើសំណើត្រង់ៗទៅកាន់ប្រេស៊ីលដើម្បីជួយសម្របសម្រួលដល់ការនាំចូលផលិតផលកសិកម្ម និងផលិតផលសមុទ្រវៀតណាមទៅក្នុងទីផ្សាររបស់ប្រេស៊ីល។ នេះបើយោងតាមការចុះផ្សាយរបស់ភ្នាក់ងារព័ត៌មាន Vietnam News នៅថ្ងៃ១៨ ឧសភា។
លោកនាយករដ្ឋមន្ត្រី តាមរយៈជំនួបដដែលនោះ បានថ្លែងពីការពេញចិត្តចំពោះការអភិវឌ្ឍទំនាក់ទំនងរយៈពេលបីទសវត្សរ៍មកនេះរវាងវៀតណាម និងប្រេស៊ីល និងថែមចង់ឃើញភាគីទាំងពីរបង្កើនគម្រោង និងកម្មវិធីជាក់លាក់នឹងគ្នាសម្រាប់កិច្ចសហប្រតិបត្តិការ ជាពិសេសនោះដើម្បីលើកទឹកចិត្តដល់អ្នកវិនិយោគកសាងភាពជាដៃគូលើវិស័យសក្តានុពល។
តាមប្រភពព័ត៌មានដដែលនោះ លោកស្រីរដ្ឋមន្ត្រី ក៏បានអះអាងដូចគ្នាផងដែរថា ប្រេស៊ីល ពិតជាផ្តល់តម្លៃខ្ពស់លើទំនាក់ទំនងជាមួយនឹងវៀតណាម។ លោកស្រី ក៏រំពឹងផងដែរថា កិច្ចសហប្រតិបត្តិការទ្វេភាគីរវាងវៀតណាម-ប្រេស៊ីល ពិសេសនោះលើវិស័យកសិកម្មនឹងកើនឡើងថែមទៀត ខណៈតំណាងក្រុមហ៊ុនប្រេស៊ីលជាង២០ ដែលអមដំណើរជាមួយលោកស្រី ក៏បានបង្ហាញពីការចាប់អារម្មណ៍ផងនោះ។
អ្វីដែលគួរឲ្យចាប់អារម្មណ៍នោះ នៅចំពោះមុខប្រតិភូជាន់ខ្ពស់របស់ប្រេស៊ីល ប្រមុខដឹកនាំវៀតណាម បានសន្យាធ្វើជាស្ពានតភ្ជាប់អាស៊ាន និងក្រុមសេដ្ឋកិច្ចអាមេរិកខាងត្បូង Mercosur ក៏ដូចជាស្នើឲ្យប្រេស៊ីលសិក្សាលើលទ្ធភាពនៃកិច្ចព្រមព្រៀងពាណិជ្ជកម្ម វៀតណាម និងក្រុមសេដ្ឋកិច្ច Mercosur នេះដែរ។
គួរជម្រាបផងដែរថា Mercosur គឺជាក្រុមប្រទេសសេដ្ឋកិច្ច រួមមាន អាហ្សង់ទីន ប្រេស៊ីល ប៉ារ៉ាហ្កាយ អ៊ុយរូហ្កាយ និងវេណេស៊ុយអេឡា។ ប្រេស៊ីល គឺជាដៃគូពាណិជ្ជកម្មធំបំផុតរបស់វៀតណាមប្រចាំតំបន់អាមេរិកឡាទីន និងជាដៃគូធំបំផុតលំដាប់ទីពីរប្រចាំតំបន់អាមេរិក បន្ទាប់ពីសហរដ្ឋអាមេរិក៕
Tag:
វៀតណាម
ប្រេស៊ីល
© រក្សាសិទ្ធិដោយ thmeythmey.com
