ក្រុមហ៊ុនអង់គ្លេស និងជប៉ុន ដើរតាម Google ផ្តើមងាកចេញពី Huawei

អន្តរជាតិ

ក្រុមហ៊ុនអង់គ្លេស និងជប៉ុន ដើរតាម Google ផ្តើមងាកចេញពី Huawei

23, May 2019 , 4:16 pm

រូបភាព

ប្រភពរូប៖ AP

ដោយ:

នាដើមសប្តាហ៍នេះ ក្រោយពីអាមេរិក បានដាក់បញ្ចូលក្រុមហ៊ុន Huawei ក្នុងបញ្ជីខ្មៅ ក្រុមហ៊ុន Google បានប្រកាសលែងធ្វើអាជីវកម្មជាមួយ Huawei ដោយឈប់ផ្តល់សេវាកម្មសំខាន់ៗក្នុងប្រព័ន្ធប្រតិបត្តិការ Android ។ ការសម្រេចចិត្តរបស់ក្រុមហ៊ុនបច្ចេកវិទ្យាយក្សរបស់អាមេរិកនេះ បង្កជាព្យុះភ្លៀងយ៉ាងខ្លាំងក្នុងវិស័យឧស្សាហកម្មទូរសព្ទនៅជុំវិញសកលលោក។ ប៉ុន្មានថ្ងៃក្រោយមកទៀត ក្រុមហ៊ុនបណ្តាញទូរសព្ទនៅបណ្តាប្រទេសក្នុងតំបន់អឺរ៉ុប និងអាស៊ី ក៏ចាប់ផ្តើមធ្វើតាម Google ដោយផ្អាកអាជីវកម្មជាមួយក្រុមហ៊ុន Huawei ផងដែរ។

ក្នុងចក្រភពអង់គ្លេស ក្រុមហ៊ុនបណ្តាញទូរសព្ទធំបំផុតចំនួន២ ដូចជា EE និង Vodafone បានប្រកាសនៅថ្ងៃពុធទី ២២ ឧសភា ថា ក្រុមហ៊ុនខ្លួន នឹងផ្អាកការផ្គត់ផ្គង់ទូរសព្ទ Huawei ដែលមានបច្ចេកវិទ្យា 5G ទៅឲ្យអតិថិជនខ្លួន។

ប្រាប់ទូរទស្សន៍ CNN អ្នកនាំពាក្យឲ្យក្រុមហ៊ុន Vodafone បញ្ជាក់ឲ្យដឹងថា ក្រុមហ៊ុនខ្លួន បានសម្រេចផ្អាកការបញ្ជាទិញទុកមុនសម្រាប់ទូរសព្ទឆ្លាតវៃ Huawei Mate 20X ដែលមានបច្ចេកវិទ្យា 5G ក្នុងចក្រភពអង់គ្លេស។ ទាក់ទិននឹងមូលហេតុនៃការផ្អាកនេះ ក្រុមហ៊ុននេះលើកឡើងថា នេះ គឺគ្រាន់តែជាចំណាត់ការបណ្តោះអាសន្នប៉ុណ្ណោះ ខណៈអនាគតទូរសព្ទ Huawei ជំនាន់ថ្មីៗ មានភាពស្រពេចស្រពិល ក្រោយ Google ដកហូតអាជ្ញាបណ្ណប្រព័ន្ធប្រតិបត្តិការ Android លើទូរសព្ទនេះ។

ទន្ទឹមនឹងគ្នានេះ ក្រុមហ៊ុនបណ្តាញទូរសព្ទធំបំផុតប្រចាំចក្រភពអង់គ្លេសមួយទៀតឈ្មោះថា EE ក៏បានប្រកាសពន្យារការណែនាំទូរសព្ទប្រភេទថ្មីរបស់ Huawei ផងដែរ ដោយអះអាងថា ខ្លួននឹងមិនដាក់លក់ជាផ្លូវការឡើយ ពោលគឺរហូតដល់ស្ថានការណ៍ល្អឡើងវិញ។ ការពន្យារនេះដែរ ធ្វើឡើងក្រោយពី ក្រុមហ៊ុននេះ កាលពីថ្ងៃទី១៦ ខែឧសភាកន្លងទៅ បានប្រកាសពីគម្រោងលក់ ទូរសព្ទ Huawei Mate 20X ដែលជាទូរសព្ទមានបណ្តាញបច្ចេកវិទ្យា 5G នៅលើវេបសាយផ្លូវការរបស់ក្រុមហ៊ុនខ្លួន។

ក្រឡេកមកមើលនៅតំបន់អាស៊ីវិញ ក្រុមហ៊ុនបណ្តាញទូរសព្ទធំៗចំនួន៣ ដូចជា KDDI, Softbank និង NTT DoCoMo បានប្រកាសថា ក្រុមហ៊ុនខ្លួន នឹងពន្យារពីគម្រោងដាក់លក់ទូរសព្ទ Huawei P30 Lite និង ទូរសព្ទ Huawei P30 Pro ដោយអះអាងថា ពួកគេ កំពុងតាមដានពីឥទ្ធិពលនៃទណ្ឌកម្មរបស់អាមេរិក។ ឲ្យពិតទៅ ទូរសព្ទរបស់ Huawei ទាំងពីរនេះ ត្រូវបានក្រុមហ៊ុនត្រៀមដាក់លក់ជាផ្លូវការ នាខែមិថុនាខាងមុខ ក្នុងប្រទេសជប៉ុន។

ការប្រកាសទាំងនេះ គឺជាការឆ្លើយតបដំបូងបង្អស់របស់ក្រុមហ៊ុនបណ្តាញទូរសព្ទក្នុងតំបន់អឺរ៉ុប ទៅនឹងការបាត់បង់អាជ្ញាបណ្ណ Android របស់ Huawei ព្រោះថា ទូរសព្ទរបស់ក្រុមហ៊ុនចិននេះ លក់ដាច់ខ្លាំងក្នុងតំបន់នេះ។ គិតត្រឹមត្រីមាសដំបូងនៃឆ្នាំ២០១៩ Huawei បាននាំចេញទូរសព្ទខ្លួនច្រើនជាង ៥៩លានគ្រឿង ដែលជិតពាក់កណ្តាលនៃទូរសព្ទទាំងនោះ ឆ្ពោះទៅកាន់ទីផ្សារអឺរ៉ុប។ នេះមានន័យថា ទូរសព្ទរបស់ក្រុមហ៊ុននេះ គ្របដណ្តប់ស្ទើរតែ១ភាគ៤ នៃទីផ្សារទូរសព្ទទំនើបទាំងមូលក្នុងតំបន់អឹរ៉ុប។

អត្ថបទទាក់ទង

ស្ថាបនិក Huawei មិនបារម្ភពីទណ្ឌកម្មអាមេរិក ខណៈប៉េកាំងប្រកាសធ្វើខ្នងបង្អែក

ក្រុមហ៊ុន Huawei បង្កើតឡើងដោយលោក Ren Zhengfei អតីតមន្ត្រីយោធាចិន

អាមេរិកពន្យារពេលដាក់ទណ្ឌកម្មលើ Huawei ៩០ថ្ងៃ ព្រោះអាចត្រូវជើងខ្លួនឯង

Google ដកហូតអាជ្ញាបណ្ណប្រព័ន្ធប្រតិបត្តិការ Android ពីក្រុមហ៊ុនទូរសព្ទ Huawei

ដោយគ្មានអាជ្ញាបណ្ណ Android ពេញលេញរបស់ Google ទូរសព្ទទំនើប Huawei នឹងបាត់បង់សិទ្ធិចូលទៅកាន់ Google Play Store , កម្មវិធីសំខាន់ៗ ដូចជា Facebook Instagram, YouTube និងGoogle Maps ជាដើម និងសិទ្ធិទទួលបានសេវាកម្មដំឡើងសុវត្ថិភាពទូរសព្ទផងដែរ។ ទោះបីជា Huawei ទទួលអាជ្ញាបណ្ណបណ្តោះអាសន្ន ដែលអាចបន្តប្រើប្រាស់សេវាកម្មសំខាន់ៗក្នុងប្រព័ន្ធប្រតិបត្តិការ Android លើទូរសព្ទខ្លួនដដែល រហូតដល់ថ្ងៃទី១៩ ខែសីហាក្តី ប៉ុន្តែអនាគតរបស់ទូរសព្ទរបស់ក្រុមហ៊ុននេះ នៅតែមិនទាន់ច្បាស់លាស់៕