នៅដើមសប្ដាហ៍នេះ ប្រធានាធិបតីចិន ស៊ី ជិនភីង បានចុះត្រួតពិនិត្យរោងចក្រចម្រាញ់ធនធានរ៉ែកម្រដ៏ធំមួយក្នុងខេត្តជាំងស៊ី។ ដំណើរទស្សនកិច្ចនេះ ទាក់ទាញចំណាប់អារម្មណ៍គេឯងយ៉ាងខ្លាំង ព្រមគ្នានឹងការព្រួយបារម្ភផង។ ព្រួយបារម្ភត្រង់ថា ធនធានរ៉ែកម្រនេះ គឺជាកាំំបិតដ៏មុតស្រួចបំផុតដែលចិនអាចប្រើដើម្បីវាយបកអាមេរិកក្នុងជម្លោះពាណិជ្ជកម្មរវាងមហាអំណាចទាំងពីរ។ រ៉ែកម្រនេះ ជារូបធាតុដើមចាំបាច់បំផុតសម្រាប់វិស័យបច្ចេកវិទ្យា និងវិស័យការពារជាតិរបស់អាមេរិក។
ស្របពេលជម្លោះពាណិជ្ជកម្មនៅតែអូសបន្លាយព្រោះមិនទាន់សម្រេចបានកិច្ចព្រមព្រៀងណាមួយនោះ ទាំងអាមេរិក និងចិន សុទ្ធតែបានបញ្ចេញអាវុធរៀងៗខ្លួនដើម្បីវាយប្រហារគូប្រជែង។ មកទល់ពេលនេះ ការដំឡើងពន្ធ ជាអាវុធដែលភាគីប្រើដើម្បីដោះស្រាយបញ្ហា ប៉ុន្តែគេមើលឃើញថា ចិនហាក់រងរបួសខ្លាំងជាងអាមេរិកព្រោះទំហំនាំចេញទៅអាមេរិករបស់ចិន ធំជាងការនាំចូលរបស់អាមេរិកទៅកាន់ទីផ្សារចិន។
ប្រធានាធិបតីចិន ស៊ី ជិនភីង ត្រួតពិនិត្យរោងចក្រ JL MAG Rare-Earth Co. Ltd ដែលជារោងចក្រចកែច្នៃរ៉ែកម្រដ៏ធំមួយ។ រូបភាព Xinhua
ភាគីម្ខាងៗនៅមានអាវុធច្រើនទៀតដែលមិនប្រើនៅឡើយ។ សម្រាប់ចិនវិញ មានកាំបិតមុតស្រួចមួយលាក់ក្រោយខ្នងដែលត្រៀមគ្រប់ពេល។ នោះ គឺរ៉ែកម្រដែលអាមេរិកត្រូវការបំផុតពីចិន។ ប្រធានាធិបតីចិន ស៊ី ជិនភីង នៅថ្ងៃទី២០ ខែឧសភា បានធ្វើទស្សនកិច្ចនៅខេត្តជាំងស៊ី ហើយក៏ឆ្លៀតទៅពិនិត្យរោងចក្រ JL MAG Rare-Earth Co. Ltd. ដែលជំនាញខាងចម្រាញ់យករ៉ែកម្រទៅផលិតជាឧបករណ៍ទំនើបៗ។ ទស្សនកិច្ចរបស់លោក ស៊ី ជាសញ្ញាគំរាមដ៏មានប្រសិទ្ធភាពទៅកាន់អាមេរិក។
អ្វីជារ៉ែកម្រ?
រ៉ែកម្រ សំដៅដល់រ៉ែចំនួន១៧ប្រភេទនៃតារាងខួបគីមីមាន cerium (Ce), dysprosium (Dy), erbium (Er), europium (Eu), gadolinium (Gd), holmium (Ho), lanthanum (La), lutetium (Lu), neodymium (Nd), praseodymium (Pr), promethium (Pm), samarium (Sm), scandium (Sc), terbium (Tb), thulium (Tm), ytterbium (Yb), and yttrium (Y) ។ រ៉ែប្រភេទនេះ មិនកើតឡើងវិញឡើយ។
គេចាត់ទុកជារ៉ែកម្រ ទោះជាវាកើតក្នុងធម្មជាតិលាយឡំជារ៉ែផ្សេងទៀតក្ដី។ នេះក៏ព្រោះការចម្រាញ់យក និងការបំបែករ៉ែទាំងនេះពីរ៉ែផ្សេងទៀតដើម្បីប្រើក្នុងគោលដៅពាណិជ្ជកម្ម ត្រូវចំណាយប្រាក់យ៉ាងច្រើនសន្ធឹកសន្ធាប់ ហើយម្យ៉ាង សង្វាក់ផលិតកម្ម ក៏ត្រូវគិតគូរខ្លាំងបរិស្ថាន និងស្តង់ដានៃការភាយចេញទៅកាន់បរិយាកាសខាងក្រៅ ដ្បិតអាចបង្កគ្រោះថ្នាក់។ ក្រុមរ៉ែកម្រទាំងនេះនេះ ត្រូវបានប្រើក្នុងការផលិតទូរសព្ទឆ្លាតវៃ ទូរទស្សន៍ កាមេរ៉ា ហើយសូម្បីមីស៊ីលប្រដេញអាមេរិក ក៏ប្រើរ៉ែនេះដែរ។
បច្ចុប្បន្ន ចិនជាប្រទេសច្នៃរ៉ែកម្រច្រើនជាងគេ គឺ៩៥ភាគរយនៃផលិតកម្មសរុបពិភពលោក ហើយអាមេរិកវិញពឹងផ្អែកលើចិនដល់ទៅ៨០ភាគរយនៃការនាំចូលសរុប។ ទីភ្នាក់ងារព័ត៌មានរដ្ឋចិន Xinhua ផ្សាយថា អំឡុងទស្សនកិច្ចខាងលើ លោក ស៊ី ចាត់ទុករ៉ែកម្រនេះ ជាធនធានយុទ្ធសាស្ត្ររបស់ចិន។ ការលើកឡើងបែបនេះ រឹតតែធ្វើឲ្យគេសង្ស័យថា ចិននឹងមិនរអាក្នុងការប្រើប្រាស់ធនធានរ៉ែកម្ររបស់ខ្លួន ដើម្បីជាកាំបិតវាយបកអាមេរិកវិញឡើយ បើខ្លួនរងការគំរាមកាន់តែខ្លាំងនោះ។
រ៉ែកម្រ កាំបិតដ៏មុតស្រួចដែលចិនមិនទាន់ប្រើ
សម្រាប់ស្ថានភាពបច្ចុប្បន្ន ការធ្វើតាមអាមេរិកដោយការដំឡើងពន្ធនាំចូល មិនសូវមានប្រសិទ្ធភាពខ្លាំងឡើយ។ ចិនក៏មានកាំបិតផ្សេងទៀតដែលអាចប្រើដូចជា ការសម្រួលគោលនយោបាយសារពើពន្ធ និងរូបិយវត្ថុ ការទម្លាក់តម្លៃយ័ន ឬការលក់បណ្ណបំណុលជាដើម។ ប៉ុន្តែរ៉ែកម្រទាំង១៧មុខ គឺជាកាំបិតដ៏មុខស្រួចមួយដែលអាចទីក្រុងប៉េកាំងអាចប្រើក្នុងការដាក់សម្ពាធលើសេដ្ឋកិច្ចអាមេរិក ហើយបន្តការចរចាគ្នាជាមួយទីក្រុងវ៉ាស៊ីនតោនទៀត។
លោក James Kennedy ប្រធានក្រុមហ៊ុនប្រឹក្សាយោបល់ ThREE Consulting បានសរសេរក្នុងទស្សនាវដ្ដី National Defense ថា៖ «ចិនអាចកាត់ផ្ដាច់រាល់ឧស្សាហកម្មយានយន្ត កុំព្យូទ័រ ទូរសព្ទឆ្លាតវៃ និងយន្តហោះនៅក្រៅប្រទេសចិន បើចិនជ្រើសរើសការរឹតត្បិតការនាំចេញធនធានរ៉ែទាំងនេះមែននោះ។»
សព្វថ្ងៃ ក្នុងបញ្ជីទំនិញដែលត្រូវរងការដំឡើងពន្ធ អាមេរិកមិនទាន់បញ្ចូលធនធានរ៉ែកម្រទាំងនេះនៅឡើយទេ ព្រោះដឹងថា នឹងប៉ះពាល់ឧស្សាហកម្មក្នុងស្រុករបស់ខ្លួន។ ប៉ុន្តែបើប៉េកាំងចាក់ចំណុចនេះ វ៉ាស៊ីនតោន នឹងរបួសធ្ងន់មិនខាន។ លោក Li Mingjiang សាស្ត្រចារ្យមកពីសាលា S. Rajaratnam សម្រាប់ការសិក្សាអន្តរជាតិនៅសិង្ហបុរី អះអាងថា ទស្សនកិច្ចរបស់លោក ស៊ី មិនមែនជារឿងចៃដន្យឡើយ ហើយចិនពិតជាពិចារណាហាមឃាត់ការនាំចេញរ៉ែកម្រ ជាអាវុធប្រឆាំងអាមេរិក៕