អន្តរជាតិ
លោក ម៉ូឌី បន្តធ្វើនាយករដ្ឋមន្ត្រីឥណ្ឌា ក្រោយទទួលជ័យជម្នះជាប្រវត្តិសាស្ត្រ រូបភាព AFP
× នាយករដ្ឋមន្ត្រីឥណ្ឌា នារិន្ទ្រា ម៉ូឌី នៅថ្ងៃទី២៣ ខែឧសភា បានសន្យាកសាងអនាគតរួមសម្រាប់ប្រជាជនឥណ្ឌាទាំងអស់ បន្ទាប់ពីទទួលជ័យជម្នះដ៏ត្រចះត្រចង់ក្នុងការបោះឆ្នោតសភា។ បក្ស Bharatiya Janata Party (BJP) របស់លោក បានឈ្នះអាសនៈក្នុងសភាច្រើនលើសលប់ ដែលបានបញ្ចប់ក្ដីសង្ឃឹមក្នុងការវិលមករកអំណាចរបស់បក្សសមាជនៃត្រកូលអ្នកនយោបាយគន្ធី។ មេដឹកនាំបរទេសជាច្រើន បានផ្ញើសារសាទរលោក ម៉ូឌី ដែលនឹងបន្តដឹកនាំឥណ្ឌា៥ឆ្នាំទៀត។
បក្សកាន់អំណាច Bharatiya Janata Party (BJP) រំពឹងទទួលបានអាសនៈក្នុងសភាយ៉ាងហោចណាស់៣០០ ក្នុងចំណោមអាសនៈសរុប៥៤៣ ដែលធ្វើឲ្យបក្សនេះមានសំឡេងភាគច្រើនលើសក្នុងសភា ហើយបើកផ្លូវឲ្យលោក នារិន្ទ្រា ម៉ូឌី បន្តធ្វើជានាយករដ្ឋមន្ត្រីឥណ្ឌា៥ឆ្នាំទៀត។ ចំណែកបក្សសមាជដែលជាបក្សប្រឆាំងវិញ ក៏កើនសំឡេងក្នុងសភាដែរ ប៉ុន្តែមិនគ្រប់គ្រាន់ដើម្បីរារាំងការបន្តអំណាចរបស់លោក ម៉ូឌី ឡើយ។
ថ្លែងក្នុងពិធីអបអរជ័យជម្នះនៅទីស្នាក់ការបក្សក្នុងរដ្ឋធានីញូវដែលី លោក ម៉ូឌី ប្រកាសកសាងឥណ្ឌសម្រាប់ប្រជាជនឥណ្ឌាទាំងអស់ ដោយមិនទុកឲ្យនរណានៅតែឯងឡើយ។ ចំពោះអ្នកគាំទ្ររបស់ខ្លួន លោក ម៉ូឌី និយាយថា រួមគ្នាយើងរីកចម្រើន រួមគ្នាយើងនឹងទៅមុខ។ លោកចាត់ទុកការបោះឆ្នោតដែលចាប់ផ្ដើមតាំងពីពាក់កណ្ដាលខែមេសាមកនោះ ជាព្រឹត្តការណ៍ធំបំផុតក្នុងប្រវត្តិសាស្ត្រប្រជាធិបតេយ្យពិភពលោក។
នេះជាលើកប្រវត្តិសាស្ត្រឥណ្ឌាជាងប្រាំទសវត្សរ៍មកនេះដែលនាយករដ្ឋមន្ត្រីទទួលជ័យជម្នះនៅអាណត្តិទីពីរដោយសំឡេងកើនឡើងលើសលប់បែបនេះ។ កាលពីការបោះឆ្នោតឆ្នាំ២០១៤ បក្ស BJP ឈ្នះកៅអីសភាចំនួន២៨២ ប៉ុណ្ណោះ។ បក្សប្រឆាំងឯណោះវិញ ទទួលបានកៅអីសភាចំនួន៥២។ ប្រធានបក្សប្រឆាំង រាហ៊ុល គន្ធី បានបាត់បង់អាសនៈរបស់ខ្លួនបន្ទាប់ពីបរាជ័យដោយសារគូប្រជែងមកពីបក្សលោក ម៉ូឌី ក្នុងមណ្ឌលដែលត្រកូលគន្ធីធ្លាប់កាន់កាប់ជាយូរ។
មេដឹកនាំបរទេស ពិសេសប្រទេសមហាអំណាចជាច្រើនបានសាទរជ័យជម្នះភ្លូកទឹកភ្លូកដីរបស់លោក ម៉ូឌី ។ មេដឹកនាំទាំងនោះមាន ប្រធានាធិបតីចិន ស៊ី ជិនភីង ប្រធានាធិបតីរុស្ស៊ី វ្ល៉ាឌីមៀ ពូទីន ប្រធានាធិបតីបារាំង អេម៉ានុយអែល ម៉ាក្រុង នាយករដ្ឋមន្ត្រីជប៉ុន ស៊ិនហ្សូ អាបេ នាយករដ្ឋមន្ត្រីអូស្ត្រាលី ស្កុត ម៉ូរីសុន និងនាយករដ្ឋមន្ត្រីអ៊ីស្រាអែល បេនចាមីន ណាតាន់យ៉ាហ៊ូ ។ ប្រធានាធិបតីអាមេរិក ដូណាល់ ត្រាំ បានសរសេរលើ Twitter ថា រឿងអស្ចារ្យកើតមានក្នុងទំនាក់ទំនងអាមេរិក-បារាំងពេលលោក ម៉ូឌី ធ្វើនាយករដ្ឋមន្ត្រី។
អ្វីគួរឲ្យចាប់អារម្មណ៍ ប៉ាគីស្ថានជាសត្រូវសួពូជរបស់ឥណ្ឌា ក៏ចូលរួមអបអរលោក ម៉ូឌី ដែរ។ នាយករដ្ឋមន្ត្រីប៉ាគីស្ថាន អ៊ីមរ៉ាន ខាន់ លើកឡើងថា លោករង់ចាំធ្វើការជាមួយលោក ម៉ូឌី ដើម្បីសន្តិភាព ការឈានមុខ និងវិបុលភាពអាស៊ីខាងត្បូង។ លោក ម៉ូឌី បានអរគុណជាអនេកទៅមេដឹកនាំប៉ាគីស្ថានវិញ ហើយក៏ប្រកាសពីជំហរប្រកាន់ខ្ជាប់សន្តិភាព និងការអភិវឌ្ឍក្នុងតំបន់៕
Tag:
ឥណ្ឌា
នារិន្ទ្រា ម៉ូឌី
© រក្សាសិទ្ធិដោយ thmeythmey.com