អន្តរជាតិ
អាមេរិក ប្រកាសជួយកសិករ ដែលរងគ្រោះដោយសារសង្គ្រាមពាណិជ្ជកម្ម ប្រភពរូប៖ AFP
× សហរដ្ឋអាមេរិក បានប្រកាសកញ្ចប់ជំនួយថ្មីមួយ ដែលមានទំហំទឹកប្រាក់ ១៦ពាន់លានដុល្លារ ។ កញ្ចប់ជំនួយនេះ មានគោលដៅជួយសម្រួលដល់កសិករអាមេរិក ដែលទទួលរងផលប៉ះពាល់ដោយសារឥទ្ធិពលនៃសង្គ្រាមពាណិជ្ជកម្មជាមួយចិន។
ប្រាប់ក្រុមសារព័ត៌មាននៅសេតវិមានអាមេរិក នៅថ្ងៃទី២៣ ឧសភា លោកប្រធានាធិបតី ដូណាល់ ត្រាំ បញ្ជាក់ឲ្យដឹងថា ដោយសារចិន កសិករអាមេរិកជាច្រើន ជួបប្រទះការខាតបង់ ជាពិសេស ទាក់ទិននឹងបញ្ហាចំណូល។ យោងតាមទីភ្នាក់ងារព័ត៌មាន AFP លោក ត្រាំ និយាយថា រដ្ឋបាលលោក នឹងជួយសម្រួលការលំបាករបស់ពួកគេ តាមរយៈកញ្ចប់ជំនួយនេះ។
ទន្ទឹមនឹងគ្នានេះ រដ្ឋមន្ត្រីក្រសួងកសិកម្មអាមេរិក លោក Sonny Perdue លើកឡើងថា លុយមួយផ្នែកធំនៃកញ្ចប់ជំនួយទាំង១៦ពាន់លានដុល្លារនេះ នឹងបញ្ជូនទៅដល់ដៃកសិករដោយផ្ទាល់ ខណៈលុយមួយផ្នែកតូចផ្សេងទៀត នឹងត្រូវយកទៅប្រើប្រាស់សម្រាប់ទិញចំណីអាហារ ដើម្បីផ្គត់ផ្គង់ក្នុងកម្មវិធីជំនួយអាមេរិក ដូចជា កម្មវិធីអាហារថ្ងៃត្រង់នៅសាលារៀន និងធនាគារអាហារជាដើម។
តាមរយៈ AFP មន្ត្រីជាន់ខ្ពស់រូបនេះ គូសបញ្ជាក់ថា ផែនការថ្មីនេះ មានគោលបំណងចម្បងមួយ ដោយធានាឲ្យបានថា កសិករអាមេរិក ពុំទទួលរងឥទ្ធិពលអវិជ្ជមាននៃការដំឡើងពន្ធវាយបកពីសំណាក់ក្រុងប៉េកាំង និងដៃគូពាណិជ្ជកម្មផ្សេងៗទៀត។ លោក Perdue បន្ថែមថា កសិករ ចង់បានការធ្វើពាណិជ្ជកម្មច្រើនជាងជំនួយ ប៉ុន្តែដោយគ្មានការធ្វើពាណិជ្ជកម្ម ពួកគេ ច្បាស់ជាត្រូវការជំនួយគាំទ្រខ្លះពីរដ្ឋាភិបាល។
សូមបញ្ជាក់ថា យុទ្ធសាស្ត្រដំឡើងពន្ធប្រឆាំងចិនរបស់លោកត្រាំ ទទួលរងការវាយបកយ៉ាងមុតស្រួលពីក្រុងប៉េកាំង ដ្បិតក្រុងប៉េកាំង បានសំដៅទៅលើវិស័យកសិកម្មអាមេរិក។ សណ្តែកសៀង និងសាច់ជ្រូក គឺជាគោលដៅចម្បង ប៉ុន្តែក៏មានផលិតផលកសិកម្មផ្សេងៗទៀត ដែលទទួលរងប៉ះពាល់ដោយផ្ទាល់ ឬប្រយោលផងដែរ។
យោងតាមតួលេខរបស់ក្រសួងពាណិជ្ជកម្មអាមេរិក ការនាំចេញសណ្តែកសៀងទៅកាន់ប្រទេសចិន បានធ្លាក់ចុះ ៧៥ភាគរយក្នុងឆ្នាំ២០១៨។ ជាមួយគ្នានេះ ក្រសួងកសិកម្មអាមេរិក នឹងគិតគូរពីការខាតបង់ ដែលកើតឡើងដោយសារការវាយបករបស់ចិន ក្នុងសង្គ្រាមពាណិជ្ជកម្មនេះ ដែលកំពុងឆាបឆេះនេះ។ តួលេខបឋម នឹងត្រូវបញ្ចេញនាខែកក្កដា ឬសីហា ខាងមុខនេះ៕
Tag:
សហរដ្ឋអាមេរិក
ចិន
សង្គ្រាមពាណិជកម្ម
© រក្សាសិទ្ធិដោយ thmeythmey.com