អត្ថបទពាណិជ្ជកម្ម
កម្មវិធីអប់រំហិរញ្ញវត្ថុមូលដ្ឋាន ឆា-ឈីង របស់មូលនិធិព្រូដិនស៍ នឹងពង្រីកការអនុវត្តបន្ថែមទៀត ក្នុងសាលារៀនចំនួន១៥០
×![]()
ដោយ: ថ្មីៗ
ភ្នំពេញ (ថ្ងៃទី២៣ ខែឧសភា)៖ មូលនិធិព្រូដិនស៍ ដែលជាដៃគូអភិវឌ្ឍន៍សហគមន៍របស់ក្រុមហ៊ុនព្រូដិនសលអាស៊ី បានចូលរួមសហការជាមួយ ក្រសួងអប់រំ យុវជន និងកីឡា និងអង្គការមូលនិធិសិទ្ធិកុមារ ដើម្បីពង្រីកការអនុវត្តកម្មវិធី ឆា-ឈីង (Cha-Ching Money Smart Kids) រយៈពេល៣ឆ្នាំទៀត នៅតាមសាលារៀនចំនួន១៥០ ក្នុងខេត្តចំនួន៣ នៅកម្ពុជា។
ជាមួយនឹងការពង្រីកវិសាលភាពនេះ កម្មវិធី ឆា-ឈីង ត្រូវបានគេរំពឹងថានឹងផ្តល់អត្ថប្រយោជន៍ដល់ពលរដ្ឋចំនួនប្រមាណ ១ សែននាក់ នៅក្នុងប្រទេស ដោយរាប់បញ្ចូលទាំងសិស្សានុសិស្សរៀនថ្នាក់ទី៤ និងទី៥ ក៏ដូចជាមាតា-បិតាសិស្ស គ្រូបង្រៀន និងមន្ត្រីអប់រំតាម បណ្តាខេត្តផងដែរ។
កម្មវិធី ឆា-ឈីង ត្រូវបានអនុវត្តជាលើកដំបូងនៅប្រទេសកម្ពុជាក្នុងឆ្នាំ២០១៤ តាមរយៈភាពជាដៃគូជាមួយនឹងស្ថានីយ៍ទូរទស្សន៍ ស៊ីធីអិន (CTN) ដែលជាប៉ុស្តិ៍ដ៏មានប្រជាប្រិយមួយ ដោយចាក់បញ្ចាំងវីដេអូគំនូរជីវចល ឆា-ឈីង ចាប់តាំងពីពេលនោះមក។ ក្នុងខែសីហា ឆ្នាំ២០១៧ មូលនិធិព្រូដិនស៍ ក៏បានចាប់ដៃគូជាមួយនឹងអង្គការមូលនិធិសិទ្ធិកុមារ ដើម្បីសាកល្បងអនុវត្តកម្មវិធី ឆា-ឈីង នេះបន្ថែមទៀត ដោយផ្តល់ជូនគ្រូបង្រៀន នូវកិច្ចតែងការមេរៀន និងវគ្គ បណ្តុះបណ្តាលផ្សេងៗ ដើម្បីជួយដល់លោកគ្រូអ្នកគ្រូទាំងនោះ អាចជួយឱ្យកូនសិស្ស រៀនអំពីជំនាញគ្រប់គ្រងសាច់ប្រាក់ ដ៏មានសារៈសំខាន់នេះ។ មេរៀន ឆា-ឈីង ត្រូវបានបង្រៀនសាកល្បង ក្នុងសាលារៀនចំនួន២០ ក្នុងរាជធានីភ្នំពេញ និងខេត្តកណ្តាល ដែលមានសិស្សសរុបចំនួន ៧២៥ នាក់ ក្នុងឆ្នាំសិក្សា២០១៧ និង២០១៨។
កម្មវិធី ឆា-ឈីង ក៏ត្រូវបានណែនាំឱ្យស្គាល់ ដល់កូនសិស្សជាច្រើនបន្ថែមទៀត ក្នុងសាលាបឋមសិក្សាច្រើនជាង២០កន្លែង ក្នុងប្រទេសកម្ពុជា តាមរយៈការចុះដោយផ្ទាល់ និងជាបន្តបន្ទាប់របស់បុគ្គលិកក្រុមហ៊ុនព្រូដិនសលកម្ពុជា ដើម្បីជួយបង្រៀនកូនសិស្សទាំងនោះ នូវមូលដ្ឋានគ្រឹះ នៃការគ្រប់គ្រងសាច់ប្រាក់ ប្រកបដោយភាពឆ្លាតវៃ។
លោក Marc Fancy នាយកប្រតិបត្តិនៃមូលនិធិព្រូដិនស៍ មានប្រសាសន៍ថា៖ «ក្រោយពីការសាកល្បងអនុវត្តកម្មវិធី ឆា-ឈីង ប្រកបដោយជោគជ័យរួចមក ពួកយើងពិតជារីករាយណាស់ ក្នុងការបន្តអនុវត្តកម្មវិធីនេះ ទៅដល់សាលារៀន និងក្មេងៗកាន់តែច្រើនបន្ថែមទៀត នៅប្រទេសកម្ពុជា ក្នុងរយៈពេល៣ឆ្នាំខាងមុខទៀត»។
សម្រាប់លោក Marc Fancy វាពិតជាមានសារៈសំខាន់ណាស់ ក្នុងការផ្តល់នូវការអប់រំផ្នែកហិរញ្ញវត្ថុនៅតាមសាលារៀន ដែលនឹងជួយឱ្យក្មេងៗអភិវឌ្ឍផ្នត់គំនិតពីធម្មជាតិ និងឥរិយាបថរបស់ពួកគេ ទៅលើការគ្រប់គ្រងសាច់ប្រាក់ តាំងពីវ័យក្មេងៗទៅ។ លោក Marc Fancy បន្តថាកម្មវិធីអប់រំរបស់កម្មវិធី ឆា-ឈីង ពិតជាមធ្យោបាយដ៏មានប្រសិទ្ធភាពមួយ ដែលជួយឱ្យគ្រូបង្រៀន អាចចែករំលែកទេពកោសល្យ នៃការគ្រប់គ្រងសាច់ប្រាក់ដ៏សំខាន់ ទៅឱ្យកូនសិស្ស តាមរយៈការបង្កើតនូវសកម្មភាពចូលរួមដ៏សកម្ម និងសម្ភារជាច្រើន ដែលត្រូវបានរៀបចំឡើង ដើម្បីគាំទ្រដល់របៀបរៀនផ្សេងៗគ្នារបស់ក្មេងៗ។ Marc Fancy បន្ថែមដូច្នេះ៖«យើងពិតជាមានមោទកភាពណាស់ ក្នុងការគាំទ្រកម្មវិធី ឆា-ឈីង នៅកម្ពុជា ព្រមទាំងជួយអភិវឌ្ឍក្មេងជំនាន់ក្រោយ ឱ្យក្លាយជាមនុស្សពេញវ័យ ដែលមានការទទួលខុសត្រូវខ្ពស់លើផ្នែកហិរញ្ញវត្ថុ»។
លោក ណាត បូរឿន រដ្ឋលេខាធិការក្រសួងអប់រំ យុវជន និងកីឡា និងប្រធាននៃគណៈកម្មការសម្របសម្រួលលើគម្រោងរបស់កម្មវិធី ឆា-ឈីង មានប្រសាសន៍ថា ក្រសួងអប់រំ យុវជន និងកីឡា នឹងបន្តគាំទ្រដល់ដៃគូអភិវឌ្ឍន៍ទាំងអស់ ដើម្បីអនុវត្តកម្មវិធីអប់រំហិរញ្ញវត្ថុមូលដ្ឋាន ឆា-ឈីងនេះ សំដៅផ្តល់ប្រយោជន៍ដល់កុមារគ្រប់រូប ក្នុងប្រទេសកម្ពុជា។
«Cha-Ching Money Smart Kids» គឺជាកម្មវិធីអប់រំហិរញ្ញវត្ថុ ដែលទទួលបានពានរង្វាន់ និងជាកម្មវិធីដែលបង្រៀនក្មេងៗ អំពីជំនាញជាមូលដ្ឋាន នៃការគ្រប់គ្រងសាច់ប្រាក់។ កម្មវិធីនេះ មានតួអង្គជាគំនូជីវចល ចំនួន៦នាក់ ក្នុងក្រុមតន្ត្រីមួយ ដែលផ្សព្វផ្សាយពីមូលដ្ឋានគ្រឹះហិរញ្ញវត្ថុចំនួន៤ រួមមានការរកលុយ ការសន្សំ ការចំណាយ និងការបរិច្ចាគ តាមរយៈបទចម្រៀងដ៏គួរឱ្យចាប់អារម្មណ៍ជាច្រើនបទ។
សម្រាប់ព័ត៌មាន បន្ថែមសូមចូលទៅកាន់: www.prudencefoundation.com ៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com
