ជាតិ
សេដ្ឋកិច្ច
អចលនទ្រព្យ
អត្ថបទពាណិជ្ជកម្ម
×![]()
ដោយ: ថ្មីៗ
ពីមួយឆ្នាំទៅមួយឆ្នាំ កំណើនភ្ញៀវទេសចរ និងអ្នកវិនិយោគបរទេសមកនៅកម្ពុជាកាន់តែច្រើនទៅៗ។ កំណើននេះហើយ ដែលផ្តើមឱ្យកម្ពុជា មានការអភិវឌ្ឍន៍លើគ្រប់វិស័យ។ ក្នុងនោះវិស័យទេសចរណ៍ និងវិស័យអចលនទ្រព្យ ហាក់ដូចជាដើរទន្ទឹមគ្នាយ៉ាងល្អ គួរឱ្យកត់សម្គាល់។
ងាកមកមើលលើការវិនិយោគអចលនទ្រព្យ នាតំប់ន់ទេសចរណ៍វិញម្តង មានខេត្ត និងតំបន់ទេសចរណ៍មួយចំនួន ដែលកំពុងតែមានសក្តានុពលក្នុងការអភិវឌ្ឍយ៉ាងខ្លាំង បើទោះជាភាគច្រើននៃតំបន់ទាំងនោះ មិនទាន់មានអ្នកវិនិយោគណាម្នាក់សម្លឹងឃើញ ឬចាប់ផ្តើមសកម្មភាពអភិវឌ្ឍន៍ណាមួយក៏ដោយ។ ខាងក្រោមនេះ គឺជាតំបន់កោះស្អាតៗទាំង៥ ដែលពោរពេញទៅដោយសក្តានុពល ក្នុងការវិនិយោគដោយក្នុងនោះមានដូចជា៖
១. កោះរ៉ុង
បើប្រៀបធៀបជាមួយនឹងកោះមួយចំនួន កោះរ៉ុងហាក់មានប្រៀបច្រើនជាងគេ ក្នុងការទាក់ទាញអ្នកវិនិយោគ ព្រោះកោះនេះ មានគមនាគមន៍ផ្លូវទឹកដែលនាំយកអ្នកដំណើរ និងអ្នកទេសចរជារៀងរាល់ថ្ងៃរួចទៅហើយ។ ដូច្នេះហើយ វារឹតតែធ្វើឱ្យអ្នកវិនិយោគ កាន់តែសម្លឹងឃើញឱកាសអភិវឌ្ឍន៍ នៅលើកោះនេះបន្ថែមទៀត។ ការវិនិយោគនៅលើកោះនេះ ភាគច្រើន ជាប្រទេសគម្រោង សណ្ឋាគារ រមណីយដ្ឋាន និងភោជនីយដ្ឋាន។
រដ្ឋាភិបាលប្រកាសថា នឹងផ្តល់ប្លង់កម្មសិទ្ធិកាន់កាប់ ដល់ពលរដ្ឋដែលរស់នៅលើកោះរ៉ុង។
២. កោះរ៉ុងសន្លឹម
នៅក្បែរកោះរ៉ុង ក៏មានកោះដែលមានខ្សាច់សក្បុស នៅក្បែរនោះ គឺកោះរ៉ុងសន្លឹម។ លក្ខណៈពិសេសរបស់កោះរ៉ុងសន្លឹម គឺជាឆ្នេរខ្សាច់សដ៏វែង ជាមួយនឹងទឹកសមុទ្រពណ៌ខៀវស្រងាត់ បង្កើតជាទេសភាពដ៏កម្រមួយ ដែលអាចទាក់ទាញភ្ញៀវទេសចរ បានយ៉ាងច្រើនសន្ធឹកសន្ធាប់ ឱ្យទៅលម្ហែកាយនៅទីនោះ។ មិនខុសពីកោះរ៉ុងនោះទេ កោះរ៉ុងសន្លឹម គឺជាតំបន់ដែលកំពុងមានសក្តានុពលមួយ សម្រាប់គម្រោងវិនិយោគភោជនីយដ្ឋាន សណ្ឋាគារ ឬផ្ទះលម្ហែកាយជាដើម។
៣. កោះស្តេច
មានទីតាំងស្ថិតនៅក្នុងខេត្តកោះកុង។ កោះស្តេច កំពុងក្លាយខ្លួនជាគោលដៅទេសចរណ៍មួយ ដ៏ប្រជាប្រិយភាព ពីអ្នកដែលនិយមទៅលេងសមុទ្រ។ ថ្វីបើនៅលើកោះស្តេច មានប្រជាជនរស់នៅច្រើន មិនដូចកោះរ៉ុង ឬកោះរ៉ុងសន្លឹមមែន ប៉ុន្តែកោះនេះ នៅមានកង្វះខាតច្រើន ពាក់ព័ន្ធនឹងការអភិវឌ្ឍហេដ្ឋារចនាសម្ព័ន្ធ ការវិនិយោគ និងការរៀបចំតំបន់ទេសចរណ៍ជាដើម។ ធម្មជាតិដ៏អំណោយផលនៅកោះស្តេច នឹងទាក់ទាញបានភ្ញៀវទេសចរទាំងជាតិ និងអន្តរជាតិ នៅពេលដែលមានការរៀបចំឱ្យបានត្រឹមត្រូវ បូករួមជាមួយនឹងការផ្សព្វផ្សាយឱ្យទូលំទូលាយ។
៤. កោះពស់
មិនខុសពីកោះទាំង៣ខាងលើនោះឡើយ កោះពស់ក៏ជាកោះដែលមានសក្តានុពល ក្នុងការអភិវឌ្ឍ ពាក់ព័ន្ធនឹងវិស័យទេសចរណ៍ និងសំណង់ដែរ។ ប៉ុន្តែវាពិសេសជាងកោះដទៃត្រង់ថា វានៅជិតបង្កើយទៅនឹងដីគោក ពោលគឺមិនដល់១គីឡូម៉ែត្រផង ឆ្លងទៅកោះនេះ។ លើសពីនេះទៅទៀត កោះនេះមានហេដ្ឋារចនាសម្ព័ន្ធដូចជា៖ ស្ពាន ផ្លូវថ្នល់ និងគម្រោងផ្ទះលម្ហែកាយមួយចំនួន អភិវឌ្ឍន៍រួចរាល់យ៉ាងស្អាតហើយ។ ប៉ុន្តែដោយសារតែមានបញ្ហាមួយចំនួន ធ្វើឱ្យកោះនេះអាក់ខាន មិនមានការអភិវឌ្ឍអ្វីបន្ថែមទៀត ហើយសូម្បីតែអ្នកទេសចរក៏មិនអាចចូលទៅបាន។ នាពេលអនាគត ប្រសិនជាមានអ្នកដែលអាចយកតំបន់នេះ មកដំណើរការអភិវឌ្ឍន៍បន្ថែម វាពិតជាក្លាយជាទីទាក់ទាញមួយ ដ៏ល្បីជាក់ជាមិនខាន។
៥. កោះទន្សាយ
មានទីតាំងស្ថិតនៅក្នុងទឹកដីខេត្តកែប កោះនេះ មានមនុស្សទៅលេង ស្ទើរតែមុនកោះ ទាំងអស់ខាងលើទៅទៀត ដោយសារតែចម្ងាយពីដីគោ កទៅកោះនេះ គឺមិនដល់មួយម៉ោងនោះទេ។ ទោះជាយ៉ាងណាក៏ដោយ កោះនេះ មិនទាន់មានការអភិវឌ្ឍណាមួយ រីកជាដុំកំភួននោះទេ។ តួយ៉ាង នៅលើកោះមិនសូវមានមនុស្សរស់នៅប៉ុន្មានឡើយ សូម្បីតែអ្នកដែលចង់សម្រាកលម្ហែកាយ នាពេលយប់ ក៏ពិបាកក្នុងការរកជម្រើស សម្រាប់កន្លែងស្នាក់នៅដែរ។ ខណៈដែលសក្តានុពលទេសចរណ៍ខេត្តកំពត និងកែបនេះ កំពុងតែរីកលូតលាស់យ៉ាងខ្លាំង ជាពិសេសពីសំណាក់ភ្ញៀវទេសចរជាតិ វាពិតជាឱកាសល្អមួយ នៅក្នុងការចាប់កោះនេះ មកធ្វើការវិនិយោគបន្ថែម ដើម្បីទទួលបានផលចំណេញវិញ ពីការទៅលេងកម្សាន្ត និងស្នាក់នៅទីនោះ។
ស្របជាមួយនឹងកំណើនប្រាក់ចំណូលរបស់ប្រជាជនខ្មែរ ក៏ដូចជាការរីកចម្រើននៃច្ចេកវិទ្យា ដូចជាបណ្តាញសង្គមជាដើម គម្រោងអភិវឌ្ឍន៍កោះទាំងនេះអាចនឹងទាក់ទាញការចាប់អារម្មណ៍ពីអ្នកភ្ញៀវទេសចរយ៉ាងច្រើន ប្រសិនជាមានការវិនិយោគ ដែលគួរឱ្យចាប់អារម្មណ៍ ណាមួយកើតមាន។ កត្តានេះ ក៏នឹងរួមចំណែក ធ្វើឱ្យសេដ្ឋកិច្ចកម្ពុជា កាន់តែមានការលូតលាស់ឡើង មួយកម្រិតទៀត៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com
