ពីនេះ ពីនោះ
តៀមកាហ្វេថ្មីៗ៖ មនុស្សខ្លះរិះគន់តែរបស់គេ តែមិនប្រឹងធ្វើរបស់ខ្លួនឯងទេ
× សុធីរ តែងតែនិយាយបន្ទោសមន្ត្រីរាជការ រិះគន់អាជ្ញាធរនៅចំពោះមុខសំណាង ព្រោះសំណាងដែលជាក្លើ គឺជាមន្ត្រី។ តែម្តងនេះ សំណាងវាយបកទៅក្លើសុធីរវិញយ៉ាងធ្ងន់ធ្ងរ។
សុធីរ៖ មកដល់ពេលនេះហើយនៅមានមន្ត្រីខ្មោច នៅរស់ស៊ីប្រាក់ខែរដ្ឋទៀតអ្ហា? អ្ហែងក៏ឃើញរដ្ឋមន្ត្រីព័ត៌មានប្រកាសជម្រះបញ្ជីមន្ត្រីខ្មោចនៅក្រសួងគាត់។ អញសង្ស័យតែមិនមែនមានតែក្រសួងហ្នឹងទេ នៅច្រើនកន្លែងទៀត សូម្បីនៅស្ថាប័ននីតិបញ្ញត្តិ។ ជាពិសេស អាស៊ីញេចុះវត្តមាននេះ ដូចជាមិនបានផលអីទេ។
សំណាង៖ អ្អែងរិះគន់ អ្ហែងនិយាយ ជាសិទ្ធិរបស់អ្ហែង អញយល់។ តែម្ងៃៗ អញឮតែអ្ហែងនិយាយថា អ្នកនេះអាក្រក់ អ្នកនោះអាក្រក់។ អ្នកនេះអត់ធ្វើការ អ្នកនោះអសមត្ថភាព អត់ចេះធ្វើការ។ អ្ហែងមិនហត់ចិត្តទេហី?
សុធីរ៖ ចុះបើវាមានបញ្ហាមែន។ អ្ហែងក៏ឃើញដែរ! រដ្ឋថាខ្លួនឯងក្រ តែមន្ត្រីផ្ទះធំជាងវិហារលោកសង្ឃទៀត ហើយនៅគ្រប់កន្លែង។ ប្រាក់ខែតិចទេ តែរថយន្តទំនើបប៉ុណ្ណាក៏មានលុយទិញដែរ។ អត្តសញ្ញាណបណ្ណ សៀវភៅគ្រួសារ មន្ត្រីសរសេរឈ្មោះប្រជាជនខុស ហើយត្រូវឲ្យប្រជាជនរត់ការកែពាក្យ ដូរពាក្យខ្លួនឯង ពេលខ្លះត្រូវទៅដល់តុលាការទៀត។ សេវាខ្លះ រដ្ឋចែងមិនឲ្យបង់ប្រាក់ទេ តែមន្ត្រីប្រាប់ពលរដ្ឋថា តាមសទ្ធា តាមមនោសញ្ចេតនា។
សំណាង៖ អ្ហែងរៀនបានច្រើន អ្ហែងយល់ថា អ្វីៗត្រូវការពេលវេលាទេ? គិតម្តងទៀតមើល ក្រែងលោ វាមានអ្វីៗប្រសើរជាងកាលពេលអ្ហែងនៅជានិស្សិត ឬប្រសើរជាងអ្ហែងទើបចេញធ្វើការដំបូងកាលពី១៥ឆ្នាំមុន? អញយល់ស្របជាមួយឯងថា នៅមានរឿងច្រើនដូចអ្ហែងបានលើកឡើង តែអញថា វាក៏មានចំណុចល្អប្រសើរច្រើនដែរ។
ច្រកចេញចូលតែមួយ នៅតាមខណ្ឌស្រុក មានសេវារាប់សិប ដែលមានមន្ត្រីល្អៗ គេខិតខំធ្វើការបម្រើប្រជាពលរដ្ឋ។
ខាងវិស័យអប់រំ ក៏មានមន្ត្រី និងគ្រូបង្រៀនជាច្រើនដែលបានខិតខំអនុវត្តវិធានកំណែទម្រង់ ដើម្បីអនាគតកូនខ្មែរជំនាន់ក្រោយ។
អ្ហែងបន្ទោសគេថា គេធ្វើអ្វីមិនកើត តែស្ថាប័នគេមួយៗ មានបុគ្គលិករាប់រយ រាប់ពាន់នាក់។ មើលខ្លួនអ្ហែងមើល អ្ហែងធ្វើបានអីខ្លះ? បើអ្ហែងធ្វើបានល្អហើយ អ្ហែងគួរតែបន្តធ្វើឲ្យកាន់តែល្អប្រសើរទៅមុខទៀត ដើម្បីឱ្យក្លាយជាគំរូគេ ហើយគេនឹងបានធ្វើតាមអ្ហែង។
អញថា បើអ្ហែងនៅតែអង្គុយរិះគន់ទេ អ្ហែងនឹងខាតពេលសម្រាប់ការធ្វើល្អរបស់អ្ហែង។ អ្ហែងយល់ទេ?
© រក្សាសិទ្ធិដោយ thmeythmey.com