សង្គមអន្តរជាតិ
អន្តរជាតិ
អភិបាលក្រុងម្នាក់គ្រោងចែក Viagra ដល់ពលរដ្ឋព្រោះសាលាប្រឈមបិទទ្វារដោយសារគ្មានសិស្ស
× អភិបាលក្រុង Montereau នៅដេប៉ាតឺម៉ង់ Loiret នៃប្រទេសបារាំង កាលពីពេលថ្មីៗកន្លងមកនេះ បានចេញក្រឹត្យមួយ ដើម្បីផ្តល់ថ្នាំជំនួយផ្លូវភេទ (Viagra) សម្រាប់ស្វាមីភរិយាដែលមានអាយុចន្លោះពី១៨ទៅ៤០ឆ្នាំ។ មូលហេតុអ្វី? សាលានៅតំបន់មួយនេះ ប្រឈមបិទទ្វារ ដោយសារតែកង្វះសិស្ស។ នេះបើយោងតាមការផ្សាយរបស់សារព័ត៌មាន La Dépêche du Midi។
ក្រុង Montereau មានពលរដ្ឋប្រមាណតែ៦០០នាក់ប៉ុណ្ណោះ ដោយសាលារៀនប្រឈមបិទទ្វារ ព្រោះគ្មានសិស្សរៀន។ តបទៅនឹងបញ្ហានេះ លោក Jean Debouzy ដែលជាអភិបាលក្រុង បានដាក់គោលការណ៍ដ៏មិននឹកស្មានដល់មួយ តាមរយៈផែនការចែកថ្នាំជំនួយផ្លូវភេទ «Viagra» ដល់គូស្វាមីភរិយា។
«លោកអភិបាលក្រុង ផ្តល់ជូនថ្នាំគ្រាប់តូចពណ៌ខៀវ [ប្រភេទ Viagra] ដល់ស្វាមីភរិយាអាយុពី១៨ឆ្នាំទៅ៤០ឆ្នាំ ដើម្បីផ្តល់ឱកាសសម្រាប់ការបង្ករកំណើត ក៏ដូចជារក្សាដំណើរការសាលារៀននៅឃុំទាំងពីរក្នុងក្រុង»។ នេះជាការបញ្ជាក់ក្នុងក្រឹត្យ ដែលផ្សាយដោយសារព័ត៌មានក្នុងស្រុករបស់បារាំង។
លោកអភិបាលក្រុង Montereau បានពន្យល់ហេតុផលថា ក្រុងមួយដែលគ្មានក្មេងៗ ប្រៀបដូចជាក្រុងមួយដែលស្លាប់យ៉ាងដូច្នោះដែរ។ លោកបានបន្ថែមថា ការមានអារម្មណ៍ផ្លូវភេទ ដើម្បីឈានដល់ការបង្កកំណើត ត្រឹមត្រូវ មិនមានអ្វីខុសឆ្គងនោះឡើយ។
អស់រយៈពេលជាច្រើនខែមកហើយ ភ្នាក់ងារអធិការកិច្ចសិក្សា រកឃើញថា សាលានៅក្នុងក្រុង Montereau ប្រឈមបិទទ្វារដោយសារគ្មានសិស្ស ជាពិសេសនៅខែកញ្ញាខាងមុខ ថ្នាក់រៀនមួយក្នុងចំណោមថ្នាក់រៀន៤នៅក្នុងឃុំ ត្រូវបានប្រកាសថា បិទទ្វារផ្លូវការ។
ជាមួយគ្នានេះផងដែរ លោក Jean Debouzy ត្រូវរង់ចាំគោលការណ៍បន្ថែមពីក្រុមប្រឹក្សាសាលាក្រុង ក៏ដូចជាការអនុញ្ញាតផ្ទាល់ពីស្ថាប័នសុខាភិបាលផងដែរ។ «នៅពេលទទួលបានការយល់ព្រមពីក្រុមប្រឹក្សាក្រុង យើងនឹងរៀបចំថ្នាំដាក់ក្នុងស្តុក»។ លោកបានអះអាងយ៉ាងដូច្នេះ។
នៅបារាំង ការប្រើប្រាស់ Viagra ត្រូវតែមានការអនុញ្ញាតត្រឹមត្រូវពីវេជ្ជបណ្ឌិតជំនាញ ដូច្នេះគម្រោងរបស់លោក Jean Debouzy មិនអាចចេញជារូបរាងឆាប់នោះឡើយ៕
Tag:
បារាំង
អប់រំ
Viagra
© រក្សាសិទ្ធិដោយ thmeythmey.com