អន្តរជាតិ
វៀតណាមចង់នាំផ្លែប័រទៅផ្សារអាមេរិក ខណៈមានក្តីបារម្ភថា ត្រាំ អាចបិទការនាំចូលប័រពីម៉ិកស៊ិក
× វៀតណាមកំពុងស្វះស្វែងរកឱកាសនាំចេញផ្លែប័រ (avocado) របស់ខ្លួនចូលទៅកាន់ទីផ្សារអាមេរិក បន្ទាប់រដ្ឋបាលលោក ដូណាល់ ត្រាំ គំរាមបិទព្រំដែនជាមួយម៉ិកស៊ិកដែលអាចនាំឲ្យមានកង្វះខាតផ្លែឈើប្រភេទនេះ សម្រាប់ផ្គត់ផ្គង់ប្រជាជនអាមេរិក។
ក្រសួងកសិកម្មវៀតណាមបានបង្ហាញចំណាប់អារម្មណ៍ក្នុងការចរចានាំចេញផ្លែប័រទៅកាន់អាមេរិកនៅពាក់កណ្តាលខែឧសភានេះ ស្របពេលដែលអាមេរិកអាចនឹងឈប់នាំចូលផ្លែឈើនេះពីម៉ិកស៊ិកផង។
យោងតាមទីភ្នាក់ងារព័ត៌មាន Reuters មន្ត្រីជាន់ខ្ពស់ក្រសួងកសិកម្មវៀតណាមលោក Le Van Duc បានលើកឡើងថា បច្ចុប្បន្ន វៀតណាមកំពុងនាំចេញផ្លែប័រក្នុងបរិមាណតិចតួចទៅកាន់សហភាពអឺរ៉ុប ក៏ប៉ុន្តែមិនទាន់មានលទ្ធភាពនាំចូលទៅក្នុងទីផ្សារអាមេរិកនៅឡើយទេ។
បើតាមមន្ត្រីរូបនេះ ផ្ទៃដីចម្ការដាំប័រនៅវៀតណាមមានការកើនឡើង ដ្បិតថា ផ្លែឈើប្រភេទនេះមានតម្រូវការខ្ពស់ក្នុងស្រុកនិងអន្តរជាតិ។ លោកបន្ថែមថា វៀតណាមមានចំណាប់អារម្មណ៍ក្នុងការនាំផ្លែឈើនេះទៅទីផ្សារអាមេរិក ប៉ុន្តែខ្លួនមិនទាន់ហ៊ានសន្និដ្ឋានថា ការនាំចេញនឹងអាចធ្វើទៅបានឬអត់ទេ។
នេះក៏ដោយសារវាត្រូវចំណាយពេលវេលាចរចាយូរទៀតលើលទ្ធភាពនៃការផលិត រួមជាមួយគុណភាពនិងស្តង់ដារនៃទំនិញ ដើម្បីអាចប្រកួតប្រជែងជាមួយបណ្តាប្រទេសដទៃបាន។
តាមពិតទៅ តម្លៃផ្លែប័រនៅផ្សារអាមេរិកបានហក់ឡើងជិត៥០% កាលពីខែមេសាកន្លងទៅ ខណៈដែលមានការព្រួយបារម្ភថាលទ្ធភាពនៃការផ្អាកការនាំចូលផ្លែឈើរនេះទាំងស្រុងពីម៉ិកស៊ិកអាចនឹងកើតមានផង។ បច្ចុប្បន្ន រិមាណប័រ ៨០% នៅអាមេរិក ត្រូវផ្គត់ផ្គង់ដោយម៉ិកស៊ិក។
បើតាមទីភ្នាក់ងារព័ត៌មាន Reuters ដដែល កាលពីឆ្នាំមុនអាមេរិកបានដំឡើងពន្ធនាំចូលផ្លែប័រជាងប្រាំបួនសែនតោនមកពីម៉ិកស៊ិកដែលមានតម្លៃស្មើនឹង ២,១ពាន់លានដុល្លា ដែលស្មើនឹង១០ដងនៃតម្លៃប័រដែលដែលនាំចូលទៅកាន់ទីផ្សារអាមេរិកពីបណ្តាប្រទេសផ្សេងៗទៀតលើពិភពលោក៕
ប្រែសម្រួលដោយ៖ យ៉ន សុខន
Tag:
ផ្លែប័រ
អាមេរិក
វៀតណាម
© រក្សាសិទ្ធិដោយ thmeythmey.com