អន្តរជាតិ
×![]()
អតីតនាយករដ្ឋមន្ត្រីថៃ លោកឧត្តមសេនីយ៍ Prem Tinsulanonda បានទទួលមរណភាពក្នុងមន្ទីរពេទ្យមួយនារាជធានីបាងកក នៅព្រឹកថ្ងៃអាទិត្យទី ២៦ ខែឧសភា ឆ្នាំ ២០១៩នេះ។ មូលហេតុនៃការស្លាប់នេះ គឺដោយសារតែ គាំងបេះដូង ។
បុរសរដ្ឋថៃ លោក Prem បានទទួលមរណៈភាពដោយសារ គាំងបេះដូង នៅឯមន្ទីរ Phra Mongkut ។ នេះបើតាមការចុះផ្សាយរបស់សារព័ត៌មានថៃ Khaosod ។ ជាបុគ្គលដ៏មានឥទ្ធិពលក្នុងនយោបាយថៃ លោក Prem ក៏បានកាន់តំណែងជាទីប្រឹក្សាផ្ទាល់របស់មហាក្សត្រថៃផងដែរ ។
ឧត្តមសេនីយ៍ចូលនិវត្តន៍រូបនេះ បានបាត់បង់ជីវិត ៣សប្តាហ៍ក្រោយពីលោកបានដឹកនាំព្រះរាជពិធីរៀបអភិសេករវាង ព្រះមហាក្សត្រថៃ Vajiralongkorn និងព្រះមហាក្សត្រីថ្មី Suthida និងមួយខែ ក្រោយពី លោកបានឈានចូលវ័យ ៩៨ឆ្នាំ។
កើតក្នុងឆ្នាំ១៩២០ ក្នុងខេត្តភាគត្បូងប្រទេសថៃ លោកឧត្តមសេនីយ៍ Prem បានចូលបម្រើកងទ័ព និងចូលប្រឡូកក្នុងឆាកនយោបាយឡើងដំបូង ជាសមាជិកនៃគណៈកម្មាធិការតាក់តែងរដ្ឋធម្មនុញក្នុងឆ្នាំ១៩៥៩ ក្រោមការដឹកនាំរបស់ឧត្តមសេនីយ៍ Sarit Thanarat ។
លោក ទទួលជោគជ័យខ្លាំងទាំងក្នុងជួរកងទ័ព និងអាជីពនយោបាយ ដោយឡើងតំណែងពីសមាជិកព្រឹទ្ធសភាទៅសមាជិករដ្ឋសភា និងទៅកាន់ឧបនាយករដ្ឋមន្ត្រី ហើយចុងក្រោយ បានក្លាយជានាយករដ្ឋមន្ត្រី ក្នុងឆ្នាំ១៩៨០។
លោក Prem បានកាន់តំណែងកំពូលនេះសម្រាប់រយៈពេល៨ឆ្នាំ ដែលអំឡុងពេលនេះក្រោយមកប្រវត្តិសាស្ត្រថៃហៅថា យុគសម័យ «ប្រជាធិបតេយ្យពាក់កណ្តាល»។ អាណត្តិលោក ហ៊ុមព័ទ្ធដោយ ការប៉ុនប៉ង់ធ្វើរដ្ឋប្រហារ និងការមិនពេញចិត្តពីសមាជិកសភាថៃ មុននឹងលោក បានចុះចេញពីតំណែងក្នុងឆ្នាំ១៩៨៨ ហើយបានក្លាយជាប្រធានក្រុមប្រឹក្សារាជបល្គ័ងថៃ។
ទោះបីជាអវត្តមានពីឆាកនយោបាយក្តី លោកឧត្តមសេនីយ៍ Prem បានបន្តទទួលបានការគោរពពីកងទ័ព និងមន្ត្រីរដ្ឋាភិបាលថៃគ្រាក់ៗដដែល រួមមាន នាយករដ្ឋមន្ត្រីថៃ ឧត្តមសេនីយ៍ ប្រាយុទ្ធ ចន្ទអូចា ផងដែរ៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
