អន្តរជាតិ
បន្ទាប់ពីទូកវៀតណាម ឥណ្ឌូណេស៊ីបន្តរឹបអូសទូកនេសាទខុសច្បាប់ពីហ្វីលីពីន
រូបភាព៖ Jakarta Post
×![]()
រដ្ឋាភិបាលឥណ្ឌូណេស៊ី បានបន្តឃាត់ និងរឹបអូសទូកនេសាទពីរគ្រឿងមកពីហ្វីលីពីន ដែលបានចូលធ្វើសកម្មភាពខុសច្បាប់នៅក្នុងដែនទឹករបស់ឥណ្ឌូណេស៊ី។ នេះ គឺជាចំណាត់ការមិនរើសមុខ និងមិនដកដៃមួយរបស់បងធំអាស៊ាន ក្នុងការធានាមិនឲ្យផលប្រយោជន៍ជាតិរបស់ខ្លួនបាត់បង់ដោយសារការបំពានរបស់បរទេស។
ក្រសួងកិច្ចការដែនសមុទ្រ និងជលផលឥណ្ឌូណេស៊ី នៅថ្ងៃ២៤ ឧសភា បានចេញសេចក្តីប្រកាសមួយស្តីពីការរឹបអូសទូកនេសាទហ្វីលីពីនពីរគ្រឿង ដែលបានចូលនៅក្នុងដែនទឹករបស់ឥណ្ឌូណេស៊ីដោយខុសច្បាប់។ ឥណ្ឌូណេស៊ី បានឃាត់ខ្លួនក្រុមអ្នកនេសាទមួយចំនួន ជាមួយនឹងវត្ថុតាងផងដែរ។ នេះបើយោងតាមការចុះផ្សាយរបស់សារព័ត៌មាន Jakarta Post។
តាមប្រភពព័ត៌មានដដែល មន្ត្រីជាន់ខ្ពស់ឥណ្ឌូណេស៊ី បានបញ្ជាក់បន្ថែមថា កងកម្លាំងល្បាតឥណ្ឌូណេស៊ី បានរឹបអូសទូកនេសាទខុសច្បាប់នេះ ដោយមានផ្ទុកប្រភេទត្រី ទុណា ជាងមួយរយគីឡូក្រាម និងឧបករណ៍នេសាទផ្សេងទៀត ខណៈដែលក្រុមនេសាទ ត្រូវបានអះអាងថា នឹងត្រូវប្រឈមនឹងការកាត់ទោសពន្ធនាគាររយៈពេល៦ឆ្នាំ និងពិន័យជាទឹកប្រាក់ប្រមាណ ១,៩ លានដុល្លារ។
គួរឲ្យកត់សម្គាល់នោះ ថ្មីៗនេះ ក្រសួងកិច្ចការដែនសមុទ្រ និងជលផលឥណ្ឌូណេស៊ី បានចេញរបាយការណ៍ស្តីពីប្រតិបត្តិការរបស់ខ្លួនគិតចាប់ពីខែមករា ឆ្នាំ២០១៩ នេះ ដោយបានអះអាងថា ឥណ្ឌូណេស៊ីបានរឹបអូសទូកនេសាទបរទេសចំនួន៣២គ្រឿង ក្នុងនោះមកពីវៀតណាមមាន ១៥ គ្រឿង, ម៉ាឡេស៊ី ១៤ គ្រឿង និងមកពីហ្វីលីពីន មាន៣គ្រឿង។
ដោយឡែកបើគិតចាប់ពីការចាប់ផ្តើមនៃចំណាត់ការបង្ក្រាបមួយនេះ ពោលគឺចាប់ពីលោកប្រធានាធិបតីចូកូ វីដូដូ ឡើងកាន់អំណាចនៅឆ្នាំ២០១៤មក ឥណ្ឌូណេស៊ី បានរឹបអូស និងបំផ្លាញទូកនេសាទបរទេសដែលប្រតិបត្តិការខុសច្បាប់ក្នុងដែនទឹករបស់ឥណ្ឌូណេស៊ីចំនួន ៥៣៩គ្រឿង ដែលក្នុងនោះទូកនេសាទមកពីវៀតណាម មានជាងពាក់កណ្តាលនៃទូកសរុប ។
កន្លងមកដោយសារតែការលួចចូលនេសាទពីទូកបរទេស ធ្វើឲ្យឥណ្ឌូណេស៊ីខាតបង់ចំណូលជាច្រើនជាច្រើនលានដុល្លារក្នុងមួយឆ្នាំៗ ដែលបញ្ហានេះ តម្រូវឲ្យរដ្ឋបាលដឹកនាំរបស់លោក ចូកូវី ត្រូវចាត់វិធានតឹងរឹងបំផុត រហូតដល់ពេលខ្លះ ក៏មានការរិះគន់ថា ចំណាត់ការរបស់លោក ដែលពន្លិច និងបំផ្លាញទូកនេសាទខុសច្បាប់ទាំងនោះចូល ថាជាគោលនយោបាយឃោរឃៅមួយទៀតផង៕
Tag:
ឥណ្ឌូណេស៊ី
អាស៊ាន
© រក្សាសិទ្ធិដោយ thmeythmey.com
