អន្តរជាតិ
វៀតណាម-អាមេរិក ប្តេជ្ញាពង្រឹងកិច្ចសហប្រតិបត្តិការក្នុងកម្រិតមួយថ្មីទៀត
× រដ្ឋាភិបាលក្រុងវ៉ាស៊ីនតោន និងរដ្ឋាភិបាលក្រុងហាណូយ បានព្រមព្រៀងគ្នាក្នុងការពង្រឹងកិច្ចសហប្រតិបត្តិការភាពដៃគូយុទ្ធសាស្ត្រឲ្យកាន់តែរឹងមាំ និងស៊ីជម្រៅមួយកម្រិតទៀត។ ភាគីទាំងពីរ ក៏បានប្តេជ្ញាចិត្តរួមគ្នាដើម្បីបង្ហាញពីតួនាទីស្នូលនៅក្នុងអាស៊ីប៉ាស៊ីហ្វិកក្នុងកិច្ចការរក្សាសណ្តាប់ធ្នាប់ និងលើកកម្ពស់សន្តិភាព និងស្ថិរភាពនៅក្នុងតំបន់។
នាដំណើរទស្សនកិច្ចផ្លូវការថ្ងៃ២២-២៣ ឧសភា ក្នុងរដ្ឋធានីវ៉ាស៊ីនតោន លោករដ្ឋមន្ត្រីការបរទេសវៀតណាម Phạm Bình Minh បានចូលជួបពិភាក្សាជាមួយសមភាគីអាមេរិកលោក Mike Pompeo ដោយលោក បានអះអាងថា វៀតណាម ពិតជាផ្តល់តម្លៃខ្ពស់លើទំនាក់ទំនងជាមួយនឹងអាមេរិក និងបានត្រៀមខ្លួនរួចជាស្រេចក្នុងការពង្រឹងកិច្ចសហប្រតិបត្តិការ ដោយឈរលើមូលដ្ឋាននៃការគោរពឯករាជ្យ,អធិបតេយ្យ និងប្រព័ន្ធនយោបាយគ្នាទៅវិញទៅមក។
តាមភ្នាក់ងារព័ត៌មានវៀតណាម Vietnam News រដ្ឋមន្ត្រីការបរទេសវៀតណាមរូបនេះ បានឲ្យដឹងថា លោក ពិតជារីករាយដែលបានឃើញការអភិវឌ្ឍយ៉ាងវិជ្ជមាននៃទំនាក់ទំនងវៀតណាម-អាមេរិក។ លោក គូសបញ្ជាក់ថា ភាគីទាំងពីរ មានសក្តានុពលខ្លាំងលើកិច្ចសហប្រតិបត្តិការទាំងក្របខណ្ឌទ្វេភាគី តំបន់ និងលើឆាកអន្តរជាតិ ដែលលក្ខខណ្ឌនេះ លោក ចង់ឲ្យអាមេរិករក្សាស្ថិរភាពពាណិជ្ជកម្ម និងពង្រឹងកិច្ចសហប្រតិបត្តិការអប់រំ បច្ចេកវិទ្យា និងវិស័យការពារជាតិជាមួយនឹងវៀតណាម។
តាមប្រភពព័ត៌មានដដែលនោះ ភាគីអាមេរិក ក៏បានកោតសរសើរក្នុងទំនាក់ទំនងជាមួយនឹងវៀតណាម និងថែមទាំងចង់បន្តកិច្ចសហប្រតិបត្តិការជាមួយនឹងប្រទេសអាស៊ីអាគ្នេយ៍មួយនេះក្នុងកម្រិតមួយថ្មីផងដែរ។ តាមរយៈជំនួបនេះ អាមេរិក បានស្នើវៀតណាមធ្វើការជាមួយគ្នាក្នុងការពង្រឹងការផ្លាស់ប្តូរប្រតិភូជាន់ខ្ពស់ បង្កើនទំនាក់ទំនងសេដ្ឋកិច្ច ពាណិជ្ជកម្ម និងវិនិយោគ ក៏ដូចជាគាំទ្រដំណើរការដោះស្រាយបញ្ហាដែលសេសសល់ក្រោយសង្គ្រាមផងដែរ។
ឆ្លៀតឱកាសនោះ ភាគីទាំងពីរ ក៏បានពន្លិចបញ្ហាសមុទ្រចិនខាងត្បូង ដែលជាជម្លោះរវាងរដ្ឋអាស៊ានរួមទាំងវៀតណាមនោះ ជាមួយនឹងចិន ដោយភាគីទាំងពីរ ចង់ឲ្យរដ្ឋពាក់ព័ន្ធយកច្បាប់អន្តរជាតិមកដោះស្រាយ ខណៈអាមេរិក ក៏បានសន្យាជាមួយនឹងវៀតណាម ក្នុងការដើរតួនាទីស្នូលនៅក្នុងតំបន់អាស៊ីប៉ាស៊ីហ្វិក ដើម្បីពីស្ថិរភាព សន្តិភាព និងការអភិវឌ្ឍនៅក្នុងតំបន់នេះ។
គួរជម្រាបបន្តិចថា វៀតណាម និងអាមេរិក គឺជាអតីតគូបដិបក្ខនឹងគ្នានៅក្នុងអំឡុងសង្គ្រាមវៀតណាមក្នុងសម័យសង្គ្រាមត្រជាក់។ ក៏ប៉ុន្តែគិតចាប់ពីឆ្នាំ១៩៨៦ ដែលជាពេលវៀតណាម ចាប់ផ្តើមធ្វើកំណែទម្រង់សេដ្ឋកិច្ច និងបើកចំហសម្រាប់ការធ្វើកិច្ចសហប្រតិបត្តិការអភិវឌ្ឍប្រទេស ភាគីទាំងពីរ ចាប់ផ្តើមងាករកគ្នាឆ្នាំ ១៩៩៥ រហូតដល់ក្លាយជាដៃគូយុទ្ធសាស្ត្រ និងដៃគូដ៏មានសក្តានុពលទាំងក្របខណ្ឌតំបន់ និងអន្តរជាតិ៕
© រក្សាសិទ្ធិដោយ thmeythmey.com