អន្តរជាតិ
UN ស្នើអន្តរជាតិឲ្យទុកកងទ័ពមីយ៉ាន់ម៉ាឲ្យឯកោ និងកាត់ទោសមន្ត្រីជាន់ខ្ពស់ពីបទឧក្រិដ្ឋកម្មសង្គ្រាម
× ក្រុមអ្នកជំនាញអង្គការសហប្រជាជាតិ បានរកឃើញពីមូលហេតុមួយចំនួនពាក់ព័ន្ធសកម្មភាពរបស់យោធាជាន់ខ្ពស់មីយ៉ាន់ម៉ាពីក្រោយនៃវិបត្តិជនភៀសខ្លួនរ៉ូហ៊ីងយ៉ា។ ក្រុមអ្នកជំនាញ បានផ្តល់អនុសាសន៍ និងជំរុញឲ្យសហគមន៍អន្តរជាតិផ្អាកកិច្ចសហប្រតិបត្តិការលើវិស័យការពារជាមួយនឹងមេបញ្ជាការយោធាជាន់ខ្ពស់របស់មីយ៉ាន់ម៉ាទៀតផង។
ក្រុមស៊ើបអង្កេតលើស្ថានភាពមីយ៉ាន់ម៉ារបស់អង្គការសហប្រជាជាតិនៅសប្តាហ៍មុន បានបើកសន្និសីទសារព័ត៌មានមួយស្តីពីលទ្ធផលនៃដំណើរទស្សនកិច្ចរយៈពេល១០ថ្ងៃ ទៅកាន់បណ្តាប្រទេសជុំវិញមីយ៉ាន់ម៉ាដើម្បីស្វែងរកការពិតពាក់ព័ន្ធនឹងរឿងពីក្រោយនៃស្ថានភាពអសន្តិសុខ និងវិបត្តិជនភៀសខ្លួនរ៉ូហ៊ីងយ៉ារបស់មីយ៉ាន់ម៉ា។ ក្រុមនេះ មិនត្រូវបានអនុញ្ញាតឲ្យចូលទៅក្នុងប្រទេសមីយ៉ាន់ម៉ាឡើយ។
តាមការចុះផ្សាយរបស់សារព័ត៌មាន Jakarta Post ប្រធានក្រុមបេសកកម្មស្វែងរកការពិតរបស់អង្គការសហប្រជាជាតិ លោក Marzuki Darusman បានថ្លែងឲ្យដឹងថា វិបត្តិជនភៀសខ្លួន តម្រូវឲ្យមានវិធានការចាំបាច់ និងជាក់លាក់ ដ្បិតកន្លងមក មីយ៉ាន់ម៉ា បានប្រឹងប្រែងតិចតួចបំផុតក្នុងការស្វែងរកដំណោះស្រាយលើស្ថានភាពនៅក្នុងប្រទេស ពោលគឺស្ថានភាពជារួម នៅស្ងៀមទ្រឹងតែម្តង។
ខណៈដែលរបាយការណ៍របស់អង្គការពាក់ព័ន្ធសិទ្ធិមនុស្ស បានអះអាងពីការរត់ភៀសខ្លួនរបស់ពលរដ្ឋជាង ៧០ ម៉ឺននាក់ ដែលភាគច្រើនជាជនជាតិមូស្លីមរ៉ូហ៊ីងយ៉ា ក្រុមអ្នកស៊ើបអង្កេត បានបញ្ជាក់ជាថ្មីថា ទាំងភាគីយោធា និងស៊ីវិលរបស់រដ្ឋាភិបាលមីយ៉ាន់ម៉ា នៅតែបន្តបដិសេធព្រឹត្តិការណ៍នេះ និងមិនទទួលស្គាល់ចំណាត់ការតាមច្បាប់អន្តរជាតិទៀតផង។
តាមការគូសបញ្ជាក់របស់ក្រុមអ្នកស្វែងរកការពិតដដែលនេះ ចម្លើយដែលបានមកការជួបសម្ភាសន៍ជាមួយនឹងរងគ្រោះ ដែលបានភៀសខ្លួនទៅដល់ទាំងបង់ក្លាដែស ម៉ាឡេស៊ី ថៃ និងឥណ្ឌូណេស៊ី បានបង្ហាញថា ក្រុមយោធាមីយ៉ាន់ម៉ា បានប្រព្រឹត្តបទល្មើសជាច្រើនដងប្រឆាំងទៅលើក្រុមជនជាតិភាគតិចជាច្រើនក្រុមក្នុងទម្រង់ស្រដៀងៗគ្នា។ សក្ខីកម្មនេះហើយ ដែលក្រុមអ្នកស៊ើបអង្កេតនេះ ស្នើឲ្យសហគមន៍អន្តរជាតិផ្តាច់គ្រប់ជំនួយ និងការគាំទ្រផ្សេងៗទៅកាន់កងទ័ពមីយ៉ាន់ម៉ា និងកាត់ទោសមេបញ្ជាការយោធាជាន់ខ្ពស់របស់ប្រទេសទៀតផង។
គួរជម្រាបបន្តិចផងដែរថា ករណីវិបត្តិនៅមីយ៉ាន់ម៉ានេះដែរ ក៏បានទៅដល់តុពិភាក្សារបស់អង្គការសហប្រជាជាតិរួចហើយដែរ ក៏ប៉ុន្តែពន្លឺនៃដំណោះស្រាយ នៅតែមិនទាន់មាន ខណៈបញ្ហាជាច្រើន ត្រូវបានរាយការណ៍ថា បានកើតឡើងទៅលើជនភៀសខ្លួនទាំងនោះ។ ករណីនេះផងដែរ ក៏កំពុងស្ថិតក្រោមការពិនិត្យ និងវាយតម្លៃពីតុលាការព្រហ្មទណ្ឌអន្តរជាតិផងដែរ៕
Tag:
មីយ៉ាន់ម៉ា
រ៉ូហ៊ីងយ៉ា
© រក្សាសិទ្ធិដោយ thmeythmey.com