អន្តរជាតិ
ម៉ាឡេស៊ី រឹបអូសទូកនេសាទវៀតណាមខុសច្បាប់៣គ្រឿង និងមនុស្ស៣៣នាក់ ប្រភពរូប៖ Reuters
× អាជ្ញាធរម៉ាឡេស៊ី បានឃាត់ខ្លួនអ្នកនេសាទវៀតណាម៣៣នាក់ និងរឹបអូសទូកនេសាទ៣គ្រឿង។ ចំណាត់ការនេះ បានធ្វើឡើងក្រោយពីអាជ្ញាធរម៉ាឡេស៊ី បានរកឃើញថា ក្រុមអ្នកនេសាទវៀតណាមទាំងនេះ បានធ្វើសកម្មភាពនេសាទត្រីខុសច្បាប់ក្នុងដែនទឹកខ្លួន។
ក្រោយពីទទួលដំណឹងថា ទូកនេសាទវៀតណាម៣គ្រឿងដែលមានបំពាក់ឧបករណ៍ឆក់ត្រីខុសច្បាប់ បានបើកចូលដែនទឹកម៉ាឡេស៊ីត្រង់ឆ្នេរSabah អាជ្ញាធរម៉ាឡេស៊ីបានចាត់កម្លាំងភ្លាមៗទៅឃាត់ទូកទាំងបីនោះទុក។ ហេតុការណ៍នេះដែរ បានកើតឡើងកាលពីដើមសប្តាហ៍មុន។
យោងតាមកាសែតម៉ាឡេស៊ី The Star ភ្នាក់ងារដែនទឹកម៉ាឡេស៊ី (MMEA) បញ្ជាក់ឲ្យដឹងថា ក្រោយចុះឆែកឆេរ ទូកនេសាទវៀតណាមទាំងនេះ ពុំមានអាជ្ញាបណ្ណដើម្បីប្រតិបត្តិការក្នុងទឹកទឹកម៉ាឡេស៊ីឡើយ។ ហើយអ្នកនេសាទជនជាតិវៀតណាមទាំង៣៣នាក់នោះ ដែលមានអាយុចន្លោះពី ១៦ ដល់ ៥៥ឆ្នាំ ត្រូវបានចាប់ខ្លួនដោយសារល្មើសនឹងច្បាប់នេសាទរបស់ម៉ាឡេស៊ី។
ជុំវិញការឈានដល់ការចាប់ខ្លួនអ្នកនេសាទវៀតណាមទាំងនេះ អាជ្ញាធរម៉ាឡេស៊ី អះអាងថា ពួកគេ បានរក្សាឧបករណ៍នេសាទខុសច្បាប់ ដែលបង្កការគំរាមកំហែងធ្ងន់ធ្ងរដល់ប្រព័ន្ធអេកូសមុទ្ររបស់ប្រទេសម៉ាឡេស៊ី។ ជាមួយគ្នានេះដែរ អាជ្ញាធរម៉ាឡេស៊ី ក៏បានរកឃើញបរិមាណត្រីដល់ទៅ ៩០០គីឡូក្រាមផងដែរក្នុងទូកនេសាទទាំងបីគ្រឿងរបស់វៀតណាមនេះ។
សូមបញ្ជាក់ថា អ្នកនេសាទវៀតណាមជាច្រើន ត្រូវបានចាប់ខ្លួនក្នុងដែនទឹករបស់ប្រទេសជិតខាតខ្លួន។ តួយ៉ាង ចាប់តាំងពីដើមឆ្នាំ២០១៨មក ទូកនេសាទវៀតណាមខុសច្បាប់ប្រមាណ ១០១ករណី បានធ្វើសកម្មភាពនៅក្នុងដែនទឹកនៃបណ្តាប្រទេសដទៃ រួមមាន ឥណ្ឌូណេស៊ី និងម៉ាឡេស៊ីជាដើម។
យោងតាមរបាយការណ៍របស់ក្រសួងកសិកម្ម និងអភិវឌ្ឍន៍វៀតណាម ទូកនេសាទវៀតណាមសរុបចំនួន ១៦៣គ្រឿង និងអ្នកនេសាទ ១២៥៨នាក់ ត្រូវបានឃាត់ខ្លួន ពាក់ព័ន្ធនឹងសំណុំរឿងប្រតិបត្តិការនេសាទខុសច្បាប់ក្នុងដែនទឹកប្រទេសដទៃ៕
Tag:
ម៉ាឡេស៊ី
វៀតណាម
ទូកនេសាទខុសច្បាប់
© រក្សាសិទ្ធិដោយ thmeythmey.com