កីឡាអន្តរជាតិ
អន្តរជាតិ
Derby vs Aston៖ ក្រុមដែលឡើងទៅ EPL អាចរកចំណូលបាន២១៦លានដុល្លារ
× Derby County និង Aston Villa ត្រូវប្រជែងគ្នាក្នុងការប្រកួត play-off វគ្គផ្តាច់ព្រ័ត្រដើម្បីដណ្តើមកៅអីទៅកាន់ក្របខណ្ឌ Premier League រដូវកាលក្រោយ ដែលប្រព្រឹត្តទៅនៅថ្ងៃទី២៧ ខែឧសភា នាកីឡដ្ឋាន Wembley វេលាម៉ោង ៩:០០នាទីយប់ [ម៉ោងនៅកម្ពុជា]។
យោងតាមរបាយការណ៍របស់ក្រុមហ៊ុន Deloitte (ក្រុមហ៊ុនប្រឹក្សាពន្ធ និងហិរញ្ញវត្ថុ) ក្រុមដែលឈ្នះការប្រកួតនេះនឹងទទួលបានប្រាក់ចំណូលបន្ថែមប្រហែល ១៧០លានផោន (២១៦ លានដុល្លារអាមេរិក) ក្នុងរយៈពេល៣រដូវកាលបន្ទាប់។
Aston Villa ដែលធ្លាប់ជាម្ចាស់ពានកំពូលអឺរ៉ុប១លើកកំពុងស្វែងរកការវិលត្រឡប់ទៅកាន់លីគកំពូលអង់គ្លេសវិញក្រោយអវត្តមានរយៈពេល៣ឆ្នាំ។ ដោយឡែក Derby បានអាក់ខានបង្ហាញមុខនៅ Premier League តាំងពីឆ្នាំ ២០០៨ បន្ទាប់ពីពួកគេធ្លាក់ទៅលីគទី២ដោយទទួលបានលទ្ធផលអាក្រក់បំផុតមិនធ្លាប់មាន ដោយរកបានត្រឹមតែ១១ពិន្ទុប៉ុណ្ណោះក្នុងមួយរដូវកាល។
នេះក៏ជាការប្រឈមមុខគ្នារវាងអតីតមិត្តរួមក្រុម Chelsea ពីរូបគឺ Frank Lampard និង John Terry ផងដែរ។ Lampard ជាអ្នកចាត់ការក្រុម Derby រីឯ Terry ជាជំនួយការលោក Dean Smith អ្នកចាត់ការ Aston Villa។
ក្រោមការដឹកនាំរបស់ Lampard អតីតខ្សែបម្រើក្រុមជម្រើសជាតិអង់គ្លេស វ័យ៤០ឆ្នាំ Derby បានទម្លាក់ Leeds United ដោយលទ្ធផលទាំងពីរជើង ៤-៣ ក្នុងការប្រកួត play-off វគ្គពាក់កណ្តាលផ្តាច់ព្រ័ត្រ។ រីឯ Aston Villa របស់ Terry វិញ បានឈានដល់វគ្គផ្តាច់ព្រ័ត្រនេះតាមរយៈការឈ្នះ West Bromwich Albion ដោយបាល់កាត់សេចក្តី១១ម៉ែត្រ។ តើ Derby ឬ Aston Villa ដែលអាចបង្ហាញមុខនៅលីគកំពូលអង់គ្លេសរដូវកាលក្រោយ?
ការវិភាគរបស់ Deloitte បង្ហាញថាក្លិបណាដែលឡើងទៅ Premier League អាចនឹងរកប្រាក់ចំណូលបានប្រមាណ ២១៦លានដុល្លារឯណោះប្រសិនបើក្រុមនោះឈរជើងបាន៣រដូវកាលជាប់គ្នា។ ក្រុមហ៊ុនដដែលក៏ទស្សទាយថា លេងបានបីរដូវកាលហើយ ក្រុមនោះនឹងធ្លាក់ទៅលីគទីពីររបស់អង់គ្លេសវិញ។
ក្រុមហ៊ុនមានមូលដ្ឋានក្នុងប្រទេសអង់គ្លេសខាងលើនេះពន្យល់ថា ប្រាក់ចំណូលបន្ថែមដែលពួកគេនឹងទទួលបានពីការលេងនៅលីគកំពូលអង់គ្លេសរដូវកាល ២០១៩-២០ យ៉ាងហោចណាស់ចំនួន ៩៥លានផោន (១២១លានដុល្លារអាមេរិក) ដែលភាគច្រើនបានពីការផ្សាយតាមទូរទស្សន៍។ ដោយឡែក ២ រដូវកាលបន្ទាប់ទៀត ពោល ២០២០-២១ និង ២០២១-២២ ពួកគេអាចនឹងរកប្រាក់បាន ៧៥លានផោន (៩៥លានដុល្លារអាមេរិក)៕
Tag:
បាល់ទាត់
Premier League
Deloitte
© រក្សាសិទ្ធិដោយ thmeythmey.com