អន្តរជាតិ
វៀតណាម សម្លាប់ជ្រូកជិត២លានក្បាលដើម្បីទប់ស្កាត់ជំងឺប៉េស្តជ្រូកអាហ្វ្រិកដែលរាលដាលខ្លាំង រូបភាព Reuters
× អាជ្ញាធរវៀតណាម បានសម្លាប់សត្វជ្រូកជិតពីរលានក្បាលហើយគិតត្រឹមខែឧសភានេះ នៅពេលជំងឺប៉េស្តជ្រូកអាហ្វ្រិករាលដាលសឹងមួយប្រទេសទៅហើយ។ ក្រសួងកសិកម្មវៀតណាមបានប្រកាសនៅថ្ងៃទី២៧ ខែឧសភា ថា រយៈពេលត្រឹមពីរសប្ដាហ៍ចុងក្រោយនោះ ជ្រូកចំនួនប្រាំសែនក្បាលត្រូវបានសម្លាប់ដើម្បីទប់ស្កាត់ការរីករាលដាលជំងឺជ្រូកប្រភេទនេះ។ បើស្ថានការណ៍នៅតែអាក្រក់ វៀតណាម គ្រោងបញ្ចេញយោធាដើម្បីជួយដោះស្រាយផងដែរ។
ជំងឺប៉េស្តជ្រូកអាហ្វ្រិក បានផ្ទុះឡើងនៅវៀតណាមជាលើកដំបូងក្នុងខែកុម្ភៈ។ បើគិតពីខែកុម្ភៈ ដល់ខែឧសភានេះ ជ្រូកចំនួន១,៧លានក្បាលដែលស្មើនឹងប្រាំភាគរយនៃបរិមាណជ្រូកទូទាំងប្រទេស ត្រូវបានអាជ្ញាធរសម្លាប់ ខណៈគ្រាន់តែពីថ្ងៃទី១៣ ខែឧភសាមក សត្វជ្រូកចំនួនប្រាំសែនក្បាល ត្រូវបានកម្ទេចចោល។ នេះបើតាមការរបាយការណ៍នាយកដ្ឋានផលិតកម្មសត្វនៃក្រសួងកសិកម្មវៀតណាមនៅថ្ងៃទី២៧ ខែឧសភា។
សាច់ជ្រូក មានចំណែកដល់ទៅ៧៥ភាគរយនៃបរិមាណសាច់សម្រាប់បរិភោគនៅវៀតណាម។ ប្រជាជនវៀតណាមប្រមាណ៩៥លាននាក់ ពឹងផ្អែកលើសត្វជ្រូកប្រមាណ៣០លានក្បាលដែលត្រូវបានចិញ្ចឹមនៅទូទាំងប្រទេស។ យ៉ាងណាមិញ វត្តមានជំងឺលើសត្វជ្រូកនេះ កំពុងបង្កផលប៉ះពាល់ខ្លាំងដល់ការបរិភោគរបស់ប្រជាជន ស្របពេលដែលវីរុសនេះបានរាលដាលដល់ខេត្តចំនួន៤២ក្នុងចំណោមខេត្តទាំង៦៣របស់វៀតណាម។
រដ្ឋមន្ត្រីកសិកម្មវៀតណាម Nguyen Xuan Cuong អះអាងថា ការផ្ទុះឡើងករណីជំងឺប៉េស្តជ្រូកអាហ្វ្រិកលើកនេះ បង្កគ្រោះថ្នាក់ និងការខាតបង់យ៉ាងធ្ងន់ធ្ងរបំផុតសម្រាប់ឧស្សាហកម្មចិញ្ចឹមសត្វរបស់វៀតណាម។ នេះក៏ព្រោះតែ វីរុសនេះនៅមិនទាន់មានថ្នាំព្យាបាល ឬវ៉ាក់សាំងការពារនៅឡើយទេ បើទោះជាត្រូវបានរកឃើញលើពិភពលោកនេះជាងមួយរយឆ្នាំហើយក្ដី។
ចិន ជាអ្នកជិតខាងវៀតណាម និងជាប្រទេសផលិតសាច់ជ្រូកធំជាងគេរបស់ពិភពលោក ក៏រងគ្រោះខ្លាំងដោយសារការសាយភាយវីរុសនេះដែរ។ បើតាមទីភ្នាក់ងារព័ត៌មាន Reuters ទីក្រុងប៉េកាំងប្រកាសកាលពីសប្ដាហ៍មុនថា ខ្លួននឹងចាប់ផ្ដើមធ្វើការលើថ្នាំការពារជំងឺនេះ ដែលបង្កគ្រោះថ្នាក់សម្រាប់សត្វ ទោះជាជំងឺមិនមានហានិភ័យអ្វីលើមនុស្សក៏ដោយចុះ។
ជុំវិញការរាលដាលវិញ លោក Nguyen Xuan Cuong លើកឡើងថា វាជារឿងលំបាកក្នុងការទប់ស្កាត់វីរុសនេះ ព្រោះវាអាចរស់នៅក្នុងបរិស្ថានបានយូរអង្វែង ហើយអាចបម្លាស់ទីក្នុងស្ថានភាពស្មុគស្មាញតាមរយៈមធ្យោបាយជាច្រើន។ ក្នុងករណីការរាលដាលនៅតែកើតឡើងខ្លាំង ទីក្រុងហាណូយអាចពង្រាយយោធា និងកម្លាំងប៉ូលិសដើម្បីជួយទប់ទល់ស្ថានការណ៍កុំឲ្យកាន់តែយ៉ាប់យ៉ឺន។ អង្គការស្បៀងអាហារ និងកសិកម្មពិភពលោក ក៏ធ្លាប់ណែនាំឲ្យវៀតណាមប្រកាសអាសន្នផងដែរ៕
Tag:
វៀតណាម
ជំងឺប៉េស្តជ្រូកអាហ្វ្រិក
© រក្សាសិទ្ធិដោយ thmeythmey.com