ជាតិ
សង្គមជាតិ
លោករ៉ាត់ រត្នមុនី ត្រូវកាត់ក្តីចុងខែនេះ, លោកសុខ ឥសាន ថាជ្រៀតជ្រែកតុលាការ បើមានមតិ
× សំណុំរឿងរបស់លោក រ៉ាត់ រត្នមុនី ត្រូវបានបិទបញ្ចប់ហើយ ក្រោយឆ្លងកាត់ការស៊ើបសួរជាងកន្លះឆ្នាំ។ ចៅក្រមសាលាដំបូងរាជធានីភ្នំពេញ សម្រេចយកសំណុំរឿងរបស់លោក ទៅជំនុំជម្រះ នៅថ្ងៃទី៣០ ខែឧសភា ឆ្នាំ២០១៩។
លោក រ៉ាត់ រត្នមុនី បានរងពីបទ «ញុះញង់ឲ្យមានការរើសអើង» ក្រោយពីលោកពាក់ព័ន្ធនឹងការផលិតខ្សែភាពយន្តឯកសារមួយ ដែលមានចំណងជើងថា «ម្តាយខ្ញុំ លក់ខ្ញុំ»។ ខ្សែភាពយន្តនេះ ចាប់ផ្តើមផ្ទុះឡើង និងត្រូវបានអាជ្ញាធរកម្ពុជាតាមដាន បន្ទាប់ពីប្រព័ន្ធផ្សព្វផ្សាយដ៏ល្បីមួយរបស់រុស្ស៊ីឈ្មោះ RT យកទៅផ្សព្វផ្សាយ នៅចុងឆ្នាំ២០១៨។
លោក សំ ទិត្យសីហា មេធាវីរបស់លោក រ៉ាត់ រត្នមុនី ប្រាប់សារព័ត៌មានថ្មីៗថា ការចោទប្រកាន់របស់តុលាការ ហាក់មិនសូវច្បាស់ឡើយ។ លោក បកស្រាយថា កូនក្តីរបស់លោក គ្រាន់តែជាអ្នកប្រែពីភាសាខ្មែរទៅភាសាអង់គ្លេស និងពីភាសាអង់គ្លេស មកជាភាសាខ្មែរ នៅក្នុងខ្សែភាពយន្តនេះប៉ុណ្ណោះ គឺមិនមែនជាអ្នកផលិតឬដឹកនាំសម្តែងនោះទេ។
លោកមេធាវី បន្តថា កូនក្តីរបស់លោក ក៏មិនមានចេតនាធ្វើឲ្យប៉ះពាល់ដល់សន្តិសុខជាតិ ឬក៏ធ្វើឲ្យខូចមុខមាត់ប្រទេសជាតិដែរ ហើយម្យ៉ាងទៀត កូនក្តីរបស់លោក ថែមទាំងបានសុំការអនុញ្ញាតពីស្ថាប័នពាក់ព័ន្ធដែរ មុននឹងចាប់ផ្តើមផលិតខ្សែភាពយន្តនេះ។ «ខ្ញុំ មិនហ៊ាននិយាយយ៉ាងម៉េចទេ ព្រោះការសម្រេច គឺជាឆន្ទានុសិទ្ធិរបស់ចៅក្រម។ តែ ក្នុងនាមខ្ញុំជាមេធាវី ខ្ញុំសង្ឃឹមថា កូនក្តីរបស់ខ្ញុំ នឹងរួចផុតពីការចោទប្រកាន់ នៅក្នុងសវនាការ»។
លោក សុខ ឥសាន អ្នកនាំពាក្យគណបក្សកាន់អំណាច បានបញ្ចេញយោបល់ខ្លីអំពីសំណុំរឿងរបស់លោក រ៉ាត់ រត្នមុនី ដែលជិតនឹងឈានដល់ការជំនុំជម្រះ។ លោក បានសរសេរក្នុងបណ្តាញទំនាក់ទំនងតេឡេក្រាមថា «ការមានមតិទាំងឡាយពាក់ព័ន្ធឹងតុលាការ គឺជាការជ្រៀតជ្រែកកិច្ចការតុលាការ ប៉ះពាល់ដល់ឯករាជ្យភាពរបស់តុលាការ»។
អាជ្ញាធរខ្មែរ អះអាងថា ភាពយន្តឯកសារខាងលើ ដែលនិយាយពីការជួញដូរផ្លូវភេទ គឺជារឿងប្រឌិត ហើយធ្វើឲ្យប៉ះពាល់ដល់មុខមាត់របស់កម្ពុជា។ ដោយមានកិច្ចសហការជាមួយសមត្ថកិច្ចកម្ពុជា សមត្ថកិច្ចថៃ បានចាប់បញ្ជូនលោក រ៉ាត់ រត្នមុនី ពីថៃ មកកម្ពុជាវិញ កាលពីខែធ្នូ ឆ្នាំ២០១៨។
កន្លងមក ភរិយារបស់លោក រ៉ាត់ រត្នមុនី និងប្រជាពលរដ្ឋមួយចំនួន ខិតខំសុំឲ្យស្ថានទូតរុស្ស៊ីប្រចាំកម្ពុជា ជួយធ្វើអន្តរាគមន៍ជាញឹកញាប់ដែរ តែមិនបានទទួលផលវិជ្ជមានឡើយ៕
Tag:
រ៉ាត់ រត្នមុនី
តុលាការ
មេធាវី
សុខ ឥសាន
© រក្សាសិទ្ធិដោយ thmeythmey.com