កម្ពុជាបញ្ជូនកីឡាករកីឡាការិនីចំនួន៦រូប ឲ្យទៅហ្វឹកហាត់ពង្រឹងសមត្ថភាពនៅប្រទេសចិន ដើម្បីត្រៀមប្រជែងដណ្តើមមេដាយក្នុងព្រឹត្តិការណ៍កីឡាស៊ីហ្គេមនៅហ្វីលីពីនឆ្នាំនេះ។ ពួកគេទាំង៦រូបនឹងហ្វឹកហាត់នៅទីនោះ រហូតដល់ការប្រកួតតែម្តង។ នេះបើតាមការបញ្ជាក់របស់លោក វ៉ាត់ ចំរើន ដែលអមដំណើរជាមួយកីឡាករទាំងនេះ ទៅប្រទេសចិន។ តាមរយៈការហ្វឹកហាត់នៅចិន កម្ពុជារំពឹងថា ពួកគេនឹងទទួលបានលទ្ធផលល្អនៅស៊ីហ្គេមឆ្នាំនេះ។
កីឡាករកីឡាការិនីលើប្រភេទកីឡាចំបាប់ និងកាយសម្ព័ន្ធចំនួន៦នាក់ ត្រូវបានបញ្ជូនទៅហ្វឹកហាត់ពង្រឹងសមត្ថភាពនៅប្រទេសចិនរយៈពេល៦ខែ គឺចន្លោះពីខែឧសភា ដល់ខែវិច្ឆិកា ឆ្នាំ២០១៩។ ការបញ្ជូនទៅហ្វឹកហាត់នៅចិននេះ គឺដើម្បីត្រៀមការប្រជែងដណ្តើមមេដាយក្នុងព្រឹត្តិការណ៍កីឡាស៊ីហ្គេមលើកទី៣០នៅប្រទេសហ្វីលីពីន នាចុងឆ្នាំ២០១៩ ខាងមុខនេះ។
បើយោងតាមលោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា ដែលជាអ្នកជូនដំណើរកីឡាករទាំង៦រូបទៅប្រទេសចិន កីឡាករកីឡាការិនីកម្ពុជាទាំងនេះ នឹងហ្វឹកហាត់នៅទីនោះរហូតដល់ការប្រកួតតែម្តង។ ពោលគឺពួកគេនឹងចាកចេញពីប្រទេសចិនទៅចូលរួមប្រកួតនៅប្រទេសហ្វីលីពីនតែម្តង។
អគ្គលេខាធិការរូបនេះរំពឹងថា កីឡាករទាំង៦រូបនឹងទទួលបានបទពិសោធថ្មីៗ ដើម្បីអភិវឌ្ឍសមត្ថភាពនិងបច្ចេកទេសឲ្យកាន់តែប្រសើរ ក្នុងការឈានឆ្ពោះទៅដណ្តើមមេដាយស៊ីហ្គេមជូនជាតិនៅឆ្នាំនេះ។ ជាមួយគ្នានេះ លោក ជំរុញឲ្យកីឡាករកីឡាការិនីទាំងអស់ ត្រូវយកចិត្តទុកដាក់ ប្រឹងប្រែងហ្វឹកហាត់អភិវឌ្ឍសមត្ថភាព គោរពវិន័យ និងចៀសវាងប្រព្រឹត្តអំពើដែលនាំឲ្យប៉ះពាល់ដល់កិត្តិយសខ្លួនឯង និងប្រទេសជាតិ។
កីឡាករកីឡាការិនីទាំងនេះរួមមានកីឡាការិនីចំបាប់ ឌន ស្រស់, ជា កញ្ញា, ឌិត សំណាង, សឿន នឿន, យុន ដាណេ និងកីឡាករកាយសម្ព័ន្ធ អៀ សៀវមីង។ ពួកគេទាំងនេះបានចាកចេញពីកម្ពុជាទៅកាន់ប្រទេសចិននៅថ្ងៃទី២៨ ខែឧសភា ឆ្នាំ២០១៩នេះ ដោយមានលោក វ៉ាត់ ចំរើន និងលោក ណយ ផាណា អគ្គលេខាធិការសហព័ន្ធកីឡាកាយសម្ព័ន្ធ អមដំណើរជាមួយ។ សម្រាប់ការហ្វឹកហាត់នៅប្រទេសចិននេះ គឺទទួលបានការឧបត្ថម្ភទាំងស្រុងពីលោក ថាង ហ្គោដុង (Tang Gordon) អនុប្រធានទី១នៃគណៈកម្មាធិការជាតិអូឡាំពិកកម្ពុជា។
កម្ពុជា ក៏មានគម្រោងបញ្ជូនកីឡាករកីឡាការិនីទ្រង់ទ្រាយធំទៅហ្វឹកហាត់ពង្រឹងសមត្ថភាពនៅក្រៅប្រទេសរយៈវែង ដើម្បីត្រៀមការប្រកួតកីឡាស៊ីហ្គេមនៅឆ្នាំ២០២៣ផងដែរ។ «បន្ទាប់ពី១ក្រុមនេះ ប្រហែលជា២ទៅ ៣ខែខាងមុខ យើងនឹងមានរៀបចំ១ក្រុមធំប្រមាណជាង១០០នាក់ទៀត ទៅហ្វឹកហាត់នៅចិន កូរ៉េ និងជប៉ុន ដើម្បីជំរុញគុណភាពហ្វឹកហាត់ឆ្ពោះទៅស៊ីហ្គេមឆ្នាំ២០២៣។ ការហ្វឹកហាត់នេះគ្រោងនឹងចាប់ផ្តើមពីឆ្នាំនេះដល់ឆ្នាំ២០២៣តែម្ដង»។
កីឡាករ អៀ សៀវមីង ជាកីឡាករកាយសម្ព័ន្ធទី២ ដែលបានទៅហ្វឹកហាត់នៅចិនឆ្នាំនេះ ក្រោយកីឡាករ វៃ ភ័ក្ត្រា ត្រូវបានសហព័ន្ធកីឡាកាយសម្ព័ន្ធកម្ពុជាបញ្ជូនទៅហ្វឹកហាត់នៅប្រទេសនេះកាលពីអំឡុងខែមេសា ឆ្នាំ២០១៩ កន្លងទៅ។ មិនខុសពី សៀមីង នោះទេ ការហ្វឹកហាត់របស់ ភ័ក្ត្រា ក៏ដើម្បីត្រៀមព្រឹត្តិការណ៍កីឡាស៊ីហ្គេមនៅហ្វីលីពីនផងដែរ៕