សេដ្ឋកិច្ចអន្តរជាតិ
អន្តរជាតិ
សិង្ហបុរី ផ្តួលអាមេរិក ក្លាយជាប្រទេសមានសេដ្ឋកិច្ចប្រកួតប្រជែងបំផុតលើពិភពលោក
ប្រភពរូប៖ AFP
×![]()
សិង្ហបុរី ហក់ឡើងដល់ចំណាត់កំពូលក្នុងឆ្នាំ២០១៩ ដោយក្លាយជាប្រទេសមានសេដ្ឋកិច្ចប្រកួតប្រជែងខ្លាំងបំផុតលើពិភពលោក ។ តំណែងកំពូលប្រចាំឆ្នាំ ក្នុងចំណោមប្រទេសចំនួន៦៣នេះ ធ្លាប់ត្រូវបានសហរដ្ឋអាមេរិកកាន់កាប់ កាលពីឆ្នាំ២០១៨កន្លងទៅ។ នេះបើយោងតាមរបាយការណ៍របស់មជ្ឈមណ្ឌលស្រាវជ្រាវ IMD World Competitiveness ដែលមានមូលដ្ឋានក្នុងប្រទេសស្វ៊ីស ចេញផ្សាយនៅថ្ងៃពុធទី ២៩ ខែឧសភា។
ការវិលត្រឡប់របស់សិង្ហបុរីទៅកាន់តំណែងកំពូលផុតលេខនេះ ដែលជាប់ជាលើកដំបូងកាលពីឆ្នាំ២០១០កន្លងទៅ គឺដោយសារតែកត្តាចម្បងៗមួយចំនួន ដូចជា ហេដ្ឋារចនាសម្ព័ន្ធបច្ចេកវិទ្យាឈានមុខ ភាពសម្បូរហូរហៀរនៃកម្លាំងពលកម្មជំនាញ ច្បាប់អន្តោប្រវេសន៍ដែលមានភាពអនុគ្រោះ និងមានលក្ខណៈអំណោយផលដល់ការធ្វើជំនួញថ្មីៗ។ នេះយោងតាមរបាយការណ៍ដដែលនេះ។
ក្នុងចំណោមលក្ខខណ្ឌសំខាន់ៗចំនួន៤ ដែលត្រូវបានវាយតម្លៃ សិង្ហបុរី ឈរនៅចំណាត់កំពូលទាំង៥ សម្រាប់លក្ខណ្ឌចំនួន៣ រួមមាន សកម្មភាពសេដ្ឋកិច្ច (ចំណាត់ថ្នាក់លេខ៥) ប្រសិទ្ធភាពរដ្ឋាភិបាល (ចំណាត់ថ្នាក់លេខ៣) និងប្រសិទ្ធភាពធុរកិច្ច (ចំណាត់ថ្នាក់លេខ៥) ។ សម្រាប់លក្ខខណ្ឌចុងក្រោយដែលសំដៅលើហេដ្ឋារចនាសម្ព័ន្ធ សិង្ហបុរី ជាប់លេខ ៦ ។
សហរដ្ឋអាមេរិក ដែលធ្លាប់ឈរនៅចំណាត់ថ្នាក់លេខ១កាលពីឆ្នាំ២០១៨ បានធ្លាក់មកកាន់តំណែងលេខ៣ តាមពីក្រោយ ទីក្រុង ហុងកុង ។ ទាក់ទិននឹងការធ្លាក់តំណែងរបស់អាមេរិកនេះ របាយការណ៍ ដែលបានចេញផ្សាយជារៀងរាល់ឆ្នាំ ចាប់តាំងពីឆ្នាំ១៩៨៩មក លើកឡើងថា ការផ្តល់សន្ទុះសេដ្ឋកិច្ច ក្រោមគោលនយោបាយពន្ធដារជំហានដំបូង របស់ប្រធានាធីបតីអាមេរិក ដូណាល់ ត្រាំ ត្រូវបានគេមើលឃើញថា ចាប់ផ្តើមសាបរលាប។
បន្ថែមពីនេះ ភាពប្រកួតប្រជែងរបស់សេដ្ឋកិច្ចអាមេរិក ក៏ទទួលរងផលប៉ះពាល់ដោយកត្តាមួយចំនួនទៀត រួមមាន តម្លៃប្រេងឡើងខ្ពស់ ការនាំចេញបច្ចេកវិទ្យាទំនើបធ្លាក់ចុះ និងការប្រែប្រួលតម្លៃលុយដុល្លារ។ នេះបើតាមរបាយការណ៍ខាងលើ៕
Tag:
សិង្ហបុរី
IMD Centre
សេដ្ឋកិច្ចអន្តរជាតិ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
