អន្តរជាតិ
ប្រធានាធិបតីអាមេរិក ដូណាល់ ត្រាំ និងនាយករដ្ឋមន្រ្តីជប៉ុន ស៊ីនហ្សូ អាបេ ត្រួតពិនិត្យនាវា Kaga នៅមូលដ្ឋាន Yokosuka ។ រូបភាព AFP
×![]()
ដោយ: តន ចាន់រិទ្ធារ៉ា
ប្រធានាធិបតីអាមេរិក ដូណាល់ ត្រាំ ទើបបញ្ចប់ដំណើរទស្សនកិច្ចផ្លូវរដ្ឋនៅជប៉ុនកាលពីថ្ងៃទី២៨ ខែឧសភា។ អំឡុងដំណើរទស្សនកិច្ចនេះ លោក ត្រាំ ក៏ឆ្លៀតចុះត្រួតពិនិត្យនាវាចម្បាំងធំជាងគេរបស់ជប៉ុន ដែលមានសមត្ថភាពផ្ទុកយន្តហោះចម្បាំងស៊េរីទំនើប F-35 ផង។ ប្រធានាធិបតីអាមេរិករូបនេះសង្ឃឹមថា ជប៉ុន នឹងអាចធ្វើជាទ័ពជំនួយសម្រាប់អាមេរិកក្នុងការទប់ទល់ការគំរាមកំហែងក្នុងតំបន់ និងនៅកន្លែងផ្សេងៗទៀតលើពិភពលោក។
ជប៉ុនដែលជាមហាអំណាចក្នុងតំបន់មួយ ត្រូវបានគេមើលឃើញថា កំពុងបង្កើនសមត្ថភាពយោធារបស់ខ្លួនកាន់តែខ្លាំង។ ពោល គឺមិនមែនត្រឹមធ្វើប្រតិបត្តិការក្រោមស្លាកកងស្វ័យការពារទៀតឡើយ តែរដ្ឋាភិបាលលោកនាយករដ្ឋមន្ត្រី ស៊ីនហ្សូ អាបេ បានដាក់គោលដៅធ្វើយ៉ាងឲ្យយោធាជប៉ុនធ្វើដំណើរទៅឆ្ងាយពីឆ្នេរសមុទ្ររបស់ខ្លួនទៅទៀត។ កំណែទម្រង់កងទ័ព ត្រូវបានអនុវត្តជាបន្តបន្ទាប់ដែលត្រូវបានជំរុញដោយថវិកាយោធាច្រើនសន្ធឹកសន្ធាប់។
ស្របពេលដែលជប៉ុនពង្រឹងសមត្ថភាពកងទ័ពរបស់ខ្លួន ប្រធានាធិបតីអាមេរិក ដូណាល់ ត្រាំ ក៏ប្រកាសក្ដីរំពឹងថា ជប៉ុននឹងជួយយោធាក្នុងការប្រតិបត្តិការប្រឆាំងការគំរាមកំហែងនានា។ លោក ត្រាំ និយាយបែបនេះ អំឡុងពេលចុះត្រួតពិនិត្យនាវាចម្បាំងជប៉ុន Kaga នៅថ្ងៃទី២៨ ខែឧសភា មុនចាកចេញទៅកាន់អាមេរិកវិញ។ Kaga ជានាវាចម្បាំងធំជាងគេរបស់ជប៉ុន និងត្រូវប្រើជានាវាផ្ទុកឧទ្ធម្ភាគចក្រប្រមាញ់នាវាមុជទឹក។
សព្វថ្ងៃ ទីក្រុងតូក្យូ មានគម្រោងអភិវឌ្ឍនាវាចម្បាំងនេះដើម្បីមានសមត្ថភាពឲ្យយន្តហោះចម្បាំង F-35B ឡើងចុះបាន។ យន្តហោះ F-35B ជាយន្តហោះស៊េរីទំនើបដែលអាចចុះចតដោយមិនត្រូវការផ្លូវរតវែង និងហោះឡើងលើដោយត្រង់បាន។ លោក ត្រាំ ប្រកាសថា ជប៉ុននឹងទិញយន្តហោះនេះជាងមួយរយគ្រឿងបន្ថែមទៀត ដែលវានឹងធ្វើឲ្យជប៉ុនក្លាយជាសម្ព័ន្ធមិត្តអាមេរិកដំបូងគេមានយន្តហោះ F-35 ច្រើនសន្ធឹកសន្ធាប់បែបនេះ។
ជាមួយនឹងសម្ភារថ្មីពិសេស Kaga នឹងជួយអាមេរិកដើម្បីការពារប្រឆាំងការគំរាមកំហែងដ៏ស្មុគស្មាញជាច្រើននៅក្នុងតំបន់ និងនៅក្រៅតំបន់ផងដែរ។ នេះជាការលើកឡើងរបស់ប្រធានាធិបតីអាមេរិក ដែលឈរក្បែដោយលោកនាយករដ្ឋមន្ត្រីជប៉ុន។
ការដំឡើងសមត្ថភាពនាវា Kaga និងនាវាចម្បាំងមួយទៀត Izumo ពិតជាជួយដល់ការធ្វើប្រតិបត្តិការរបស់យោធាអាមេរិកពីទឹកដីជប៉ុន ដោយនាវាទាំងពីរអាចដើរតួជាទីស្ថានីយចាក់សាំងសម្រាប់យន្តហោះ F-35 បាន។ ដើមឡើយ នាវាទាំងពីរនេះ ត្រូវបានកសាងត្រឹមជានាវាពិឃាតប៉ុណ្ណោះ ព្រោះរដ្ឋធម្មនុញ្ញជប៉ុនហាមប្រើប្រាស់នាវាដែលអាចវាយប្រហារប្រទេសផ្សេង។ គម្រោងកែប្រែនាវាទាំងពីរនេះ ត្រូវបាន ជំរុញខ្លាំងដោយលោក អាបេ ដែលកំពុងព្យាយាមកែប្រែរដ្ឋធម្មនុញ្ញសន្តិភាពផងនោះ៕
Tag:
អាមេរិក
ជប៉ុន
ដូណាល់ ត្រាំ
© រក្សាសិទ្ធិដោយ thmeythmey.com
