ជាតិ
នយោបាយជាតិ
មេសហជីពល្បីៗ៦រូប រួចផុតពីបទចោទ ពាក់ព័ន្ធនឹងអំពើហិង្សាលើផ្លូវវ៉េងស្រេង ពីឆ្វេងទៅស្តាំ៖ លោក ជា មុន្នី លោក ប៉ាវ ស៊ីណា និងលោក អាត់ ធន់ មេសហជីព៣រូប ក្នុងចំណោម៦រូប ដែលត្រូវបានទម្លាក់បទចោទ
× ក្រោយបញ្ចប់សវនាការនៅថ្ងៃទី២៨ ខែឧសភា ឆ្នាំ២០១៩នេះ សាលាឧទ្ធរណ៍ សម្រេចទម្លាក់បទចោទចេញពីមេសហជីពល្បីឈ្មោះ៦រូប រួមមាន លោក រ៉ុង ឈុន លោក ជា មុន្នី លោក អាត់ ធន់ លោក ប៉ាវ ស៊ីណា អ្នកស្រី ម៉ម ញឹម និង អ្នកស្រី យ៉ាង សោភ័ណ្ឌ។
កាលពីចុងឆ្នាំ២០១៨ សាលាដំបូងរាជធានីភ្នំពេញ បានបើកសវនាការជំនុំជម្រះ លើសំណុំរឿងមេដឹកនាំសហជីពទាំង៦រូបនេះ ពាក់ព័ន្ធនឹងការដឹកនាំធ្វើបាតុកម្ម នៅមុខសួនឧស្សាហកម្មកាណាឌីយ៉ា និងផ្លូវវ៉េងស្រេង តាំងពីឆ្នាំ២០១៣មក។
កាលនោះ សាលាដំបូងរាជធានីភ្នំពេញ សម្រេចឲ្យមេសហជីពទាំង៦រូប ជាប់ពន្ធនាគារពីរឆ្នាំកន្លះ និងត្រូវបង់ប្រាក់ដល់ទៅខ្ទង់លានរៀលក្នុងម្នាក់ៗ ទៅឲ្យដើមបណ្តឹង។ ប៉ុន្តែ ទោសពីរឆ្នាំកន្លះ ត្រូវបានព្យួរ ពោលគឺ តុលាការ អនុញ្ញាតឲ្យពួកគេ រស់នៅក្រៅពន្ធនាគារ។
សម្តេចនាយករដ្ឋមន្ត្រី ហ៊ុន សែន បានសម្តែងការមិនពេញចិត្តចំពោះការសម្រេចរបស់សាលាដំបូងរាជធានីភ្នំពេញ ហើយក៏ជំរុញឲ្យពួកគេ ប្តឹងជំទាស់ទៅសាលាឧទ្ធរណ៍។ ក្រោយមានការជំរុញពីនាយករដ្ឋមន្ត្រី ពួកគេ ក៏សម្រេចប្តឹងទៅសាលាឧទ្ធរណ៍ ហើយទីបំផុតពួកគេ ទទួលបានជោគជ័យ ដោយសាលាឧទ្ធរណ៍ បដិសេធសេចក្តីសម្រេចរបស់សាលាដំបូងរាជធានីភ្នំពេញ៕
© រក្សាសិទ្ធិដោយ thmeythmey.com