អន្តរជាតិ
ដើមឈើ១៧៥លានដើម នឹងត្រូវដាំលើដីហ្វីលីពីនរាល់ឆ្នាំ បើច្បាប់បរិស្ថានថ្មីអនុវត្តជោគជ័យ
× ដើម្បីអាចបញ្ចប់ការសិក្សាបាន សិស្សានុសិស្សក្នុងហ្វីលីពីន នឹងត្រូវតម្រូវតាមផ្លូវច្បាប់ឲ្យធ្វើរឿងដ៏សំខាន់មួយដើម្បីបរិស្ថាន នោះគឺ «ការដាំដើមឈើ» បន្ទាប់ពីពួកគេប្រឡងជាប់។ គេប៉ាន់ស្មានថា ប្រសិនបើច្បាប់នេះ អនុវត្តដោយជោគជ័យមែននោះ ដើមឈើយ៉ាងហោចណាស់ ១៧៥លានដើម នឹងត្រូវដាំជារៀងរាល់ឆ្នាំ ។
ច្បាប់ថ្មី នឹងតម្រូវយ៉ាងចាំបាច់ឲ្យសិស្សថ្នាក់ បឋមសិក្សា វិទ្យាល័យ និងសាកលវិទ្យាល័យ ដាំដើមឈើយ៉ាងហោចណាស់១០ដើមសិន មុននឹងអាចបញ្ចប់ការសិក្សា។ ច្បាប់ថ្មីនេះ ហៅថា «Graduation Legacy for the Environmental Act» ដែលត្រូវបានអនុម័ត កាលពីថ្ងៃទី១៥ ខែឧសភា មានគោលដៅទប់ស្កាត់ការកាប់បំផ្លាញព្រៃឈើ ខណៈជួយដល់ក្មេងជំនាន់ក្រោយឲ្យមានស្មារតីការពារបរិស្ថាន។
ទាក់ទិននឹងច្បាប់ការពារបរិស្ថានថ្មីនេះ សមាជិកសភាហ្វីលីពីន លោក Gary Alejano ដែលជ្រោមជ្រែងខ្លាំងជាងគេក្នុងការតាក់តែងច្បាប់នេះឡើង ពន្យល់ថា បច្ចុប្បន្ននេះ សិស្សានុសិស្សជាង ១២លាននាក់ ត្រៀមបញ្ចប់ការសិក្សាពីថ្នាក់បឋមសិក្សា, ជិត៥លាននាក់ពីថ្នាក់វិទ្យាល័យ និងស្ទើរ ៥០ម៉ឺននាក់ពីថ្នាក់សាកលវិទ្យាល័យ ។ ជាមួយតួលេខនេះ ប្រសិនបើច្បាប់នេះ អនុវត្តត្រឹមត្រូវ និងទទួលបានជោគជ័យ ដើមឈើថ្មីប្រមាណ ១៧៥លានដើម នឹងត្រូវដាំដុះលើដីហ្វីលីពីន ជារៀងរាល់ឆ្នាំ។
សូមបញ្ជាក់ថា ច្បាប់ថ្មីនេះ ជាផ្នែកមួយនៃកិច្ចខិតខំប្រឹងប្រែងរបស់រដ្ឋាភិបាលហ្វីលីពីន ក្នុងគោលដៅដោះស្រាយឥទ្ធិពលនៃការប្រែប្រួលអាកាសធាតុ ដោយការអនុវត្តវិធានការសម្រាប់ការដាំដុះព្រៃឈើឡើងវិញ។ សម្រាប់វិធានការនេះ ក្រសួងអប់រំហ្វីលីពីន នឹងទទួលខុសត្រូវក្នុងការអនុវត្ត។
មិនខុសពីប្រទេសនានាក្នុងតំបន់អាស៊ីអាគ្នេយ៍ ហ្វីលីពីន កំពុងប្រឈមមុខនឹងការកាប់ទន្ទ្រានព្រៃឈើយ៉ាងធ្ងន់ធ្ងរ។ វិសាលភាពព្រៃឈើសរុប ដែលគ្របដណ្តប់ក្នុងប្រទេសនេះ បានធ្លាក់ចុះពី ៧០ភាគរយ ទៅកាន់២០ភាគរយ អំឡុងពេលសតវត្សរ៍ទី២០ ។ កត្តាចម្បង គឺបណ្តាលមកពី កំណើនការកាប់ព្រៃឈើលក់ខុសច្បាប់ និងផលិតកម្មដើមឈើធំៗ ក្នុងតំបន់ហាមឃាត់៕
Tag:
ហ្វីលីពីន
បរិស្ថាន
ដើមឈើ
© រក្សាសិទ្ធិដោយ thmeythmey.com