ពីនេះ ពីនោះ
ព័ត៍មានសុខភាព
កូឡេស្តេរ៉ុលអាក្រក់កើនឡើង ចុះបើកើនកូឡេស្តេរ៉ុលល្អវិញ មានអ្វីខុសគ្នាទៅ?
×![]()
ដោយ: ថ្មីៗ
កូឡេស្តេរ៉ុលល្អ ឬហៅថា HDL ត្រូវបានគេចាត់ទុកថា ជួយដល់សុខភាពបេះដូង ដោយសារតែវាមាននាទីដឹកជញ្ជូនកូឡេស្តេរ៉ុលចេញពីចរន្តឈាម និងទៅទុកចោលក្នុងថ្លើម។ជាធម្មតា អ្នកនឹងគិតថា ការដែលមានកូឡេស្តេរ៉ុលល្អកាន់តែខ្ពស់ អ្នកនឹងអាចថយចុះការប្រឈមជំងឺបេះដូងសរសៃឈាមបាន ប៉ុន្តែវិទ្យាសាស្ត្រកំពុងតែចាប់ផ្តើមបង្ហាញថា កូឡេស្តេរ៉ុលល្អ មានលក្ខណៈសាំញ៉ាំជាងអ្វីដែលយើងដឹងទៅទៀត ហើយវាក៏មានកត្តាកាន់តែច្រើនក្នុងការចូលរួមបង្កើតជាជំងឺក្រិនរឹងសរសៃឈាមផងដែរ។ ខណៈពេលដែលកូឡេស្តេរ៉ុលល្អ មានមុខងារសំខាន់ក្នុងការបញ្ចេញកូឡេស្តេរ៉ុលពីក្នុងរាងកាយ តែឥឡូវនេះវាត្រូវបានគេជឿថា ការបង្កើនចំនួនកូឡេស្តេរ៉ុលល្អ នឹងមិនបន្ថយការកើតជំងឺបេះដូងសរសៃឈាមដែរ។ ដូច្នេះបើសិនជាអ្នកកំពុងតែព្យាយាមបន្ថយការប្រឈមនឹងជំងឺបេះដូង ចូរផ្តោតសំខាន់ទៅលើរបបអាហារ និងការហាត់ប្រាណចៀសជាងបង្កើនតែចំនួនកូឡេស្តេរ៉ុលអាក្រក់អី។
សម្រកទម្ងន់តាមរយៈការហាត់ប្រាណ
តាមពិតទៅ បើសិនជាអ្នកធាត់ ការសម្រកទម្ងន់បានបួនប្រាំគីឡូក្រាមអាចពង្រឹងដល់ចំនួនកូឡេស្តេរ៉ុលល្អបាន។ ដូច្នេះចូរផ្តោតសំខាន់ទៅលើការបន្ថយការញ៉ាំអាហារសម្បូរខ្លាញ់ និងហាត់ប្រាណជាប្រចាំ។ គ្រាន់តែចំនាយពេលដើរ ៣០នាទីរាល់ថ្ងៃក៏អាចមានសុវត្ថិភាព និងស្រកទម្ងន់បានដែរ។
ឈប់ជក់បារី
ក្រៅពីបង្កឲ្យមានជំងឺជាច្រើនរួមទាំងមហារីកថ្លើមទៀតនោះ ការជក់បារីក៏មានឥទ្ធិពលទៅលើកម្រិតជាតិកូឡេស្តេរ៉ុលក្នុងឈាមដែរ។ ការជក់បារីធ្វើឲ្យកូឡេស្តេរ៉ុលល្អថយចុះ និងបង្កើនកូឡេស្តេរ៉ុលសរុបវិញ។ ទោះបីជាអ្នកស្រូបផ្សែងបារីពីគេក៏ធ្វើឲ្យកូឡេស្តេរ៉ុលល្អថយចុះដែរ។ នេះដោយសារតែជាតិពុលក្នុងផ្សែងបារីទៅបំផ្លាញអ្វីៗក្នុងសរសៃឈាម និងកកកុញខ្លាញ់ជាប់ជញ្ជាំងសរសៃឈាមទៀត។
ញ៉ាំគ្រឿងស្រវឹងក្នុងកម្រិតមធ្យម
យកល្អ អ្នកមិនគួរណាញ៉ាំគ្រឿងស្រវឹងគ្រប់ប្រភេទតែម្តងដោយសារតែជាតិ អេតាណុលរបស់វាគឺជាជាតិពុលដល់រាងកាយ ហើយក៏ត្រូវបានគេស្គាល់ថា ជាភ្នាក់ងារបង្កមហារីកទៀត។ យ៉ាងណាមិញ ការដែលញ៉ាំគ្រឿងស្រវឹងក្នុងកម្រិតមធ្យម អាចជួយបង្កើនកូឡេស្តេរ៉ុលល្អក្នុងឈាមដែរ។ អ្វីដែលកាន់តែពិសេសនោះ ការញ៉ាំស្រាក្រហមត្រូវបានគេជឿថាមានប្រយោជន៍ចំពោះសុខភាពបេះដូងសរសៃឈាម ដោយសារតែសម្បូរអង់ទីអុកស៊ីដង់ និងជួយការពារការខូចខាតរបស់សរសៃឈាម។
ជ្រើសរើសខ្លាញ់ដែលផ្តល់សុខភាព
របបអាហារផ្តល់សុខភាពតែងតែត្រូវមានខ្លាញ់មួយចំនួន ហើយក្នុងនោះកាឡូរីប្រចាំថ្ងៃប្រហែល ២៥ ទៅ ៣៥ភាគរយគួរតែបានមកពីអាស៊ីតខ្លាញ់។ ប៉ុន្តែខ្លាញ់ប្រភេទ Saturated Fat គួរតែកាត់បន្ថយឲ្យបានច្រើនបំផុត ព្រោះវាមានកូឡេស្តេរ៉ុលដែលមិនល្អចំពោះសុខភាព។ ប៉ុន្តែចូរជ្រើសរើសខ្លាញ់ប្រភេទ Monounsaturated Fats និង Polyunsaturated Fats ព្រមទាំងខ្លាញ់អូមេហ្គាបី ដែលមានក្នុងត្រី និងគ្រាប់ល្អវិញ ទើបជារឿងល្អចំពោះសុខភាព និងកូឡេស្តេរ៉ុលល្អ។
ចូរញ៉ាំបន្លែ និងផ្លែឈើពណ៌ចាស់ៗ
រាល់បន្លែ និងផ្លែឈើស្រស់ៗសុទ្ធតែមានប្រយោជន៍ចំពោះសុខភាពទាំងអស់ ប៉ុន្តែសម្រាប់ពួកដែលមានពណ៌ក្រហម និងស្វាយចាស់វិញអាចជួយបង្កើនកូឡេស្តេរ៉ុលល្អ និងបញ្ចុះកូឡេស្តេរ៉ុលអាក្រក់បាន។ ជាក់ស្តែង ទំពាំងបាយជូរ និងផ្លែឈើពណ៌ចាស់ៗផ្សេងទៀតសម្បូរទៅដោយអង់ទីអុកស៊ីដង់ ជាពិសេសសារធាតុបំពាក់ពណ៌ឈ្មោះថា Anthocyanins តែម្តង ព្រោះវាជួយបង្កើនកូឡេស្តេរ៉ុលល្អរហូតដល់ ១៤ភាគរយឯណោះ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
