ជាតិ
ជនសង្ស័យ២នាក់ត្រូវបានឃាត់ខ្លួនបន្ទាប់ពីឆក់កាបូបស្ដ្រីជនជាតិអ៊ីរ៉ង់ពេលទៅលេងអង្គរ រូបភាព៖ រដ្ឋបាលខេត្តសៀមរាប
× សៀមរាប៖ ជនសង្ស័យ២នាក់ ត្រូវបានសមត្ថកិច្ចនៃស្នងការដ្ឋាននគរបាលខេត្តសៀមរាធ្វើការស្រាវជ្រាវនិងឃាត់ខ្លួន បន្ទាប់ពីបានធ្វើសកម្មភាពឆក់កាបូបស្ដ្រីទេសចរសញ្ជាតិអ៊ីរ៉ង់ ពីរនាក់ ដែលកំពុងជិះរ៉ឺម៉កកង់បីទៅមើលថ្ងៃរះនៅប្រាសាទអង្គរវត្ត។ ប្រតិបត្តិការនេះ គឺមានការបញ្ជាផ្ទាល់ពីអភិបាលខេត្តសៀមរាប លោក ទៀ សីហា។
ជនសង្ស័យដែលត្រូវបានឃាត់ខ្លួននិងបានសារភាពពីសកម្មភាពឆក់របស់ខ្លួននោះរួមមានទីមួយឈ្មោះ ទីវ ប៊ុន ភេទប្រុស អាយុ២៧ឆ្នាំ មានទីលំនៅភូមិជ្រៃ ឃុំកណ្ដែក ស្រុកប្រាសាទបាគង និងទីពីរឈ្មោះ រ៉េត មករា ភេទប្រុស អាយុ ២៣ឆ្នាំ ស្នាក់នៅបន្ទប់ជួលក្នុងភូមិត្រពាំងសេះ សង្កាត់គោកចក ក្រុងសៀមរាប។ តាមប្រភពពីអាជ្ញាធរបានបញ្ជាក់ថា ជនសង្ស័យទាំង២ ធ្វើសកម្មភាពតាមជនរងគ្រោះតាំងពីកន្លែងលក់សំបុត្រចូលទស្សនារមណីយដ្ឋានអង្គរ និងរហូតដល់ផ្លូវកូម៉ៃក៏ឆក់កាបូបតែម្ដង។ ការប្រទាញប្រទង់បានបណ្ដាលឱ្យស្ដ្រីរងគ្រោះម្នាក់ក្នុងចំណោម២នាក់ ធ្លាក់ពីលើរ៉ឺម៉កបណ្ដាលឱ្យរងរបួសលើផ្ទៃមុខនិងដៃជើងផងដែរ។
អ្នកនាំពាក្យរដ្ឋបាលខេត្តសៀមរាប លោក លី សំរិទ្ធ បានប្រាប់សារព័ត៌មានថ្មីៗនៅព្រឹកថ្ងៃទី៣០ ឧសភាថា ជនសង្ស័យខាងលើត្រូវបានឃាត់ខ្លួននៅចន្លោះថ្ងៃទី២៧និង២៨ ដែលការឃាត់ខ្លួនដំបូងមានចំនួន៥នាក់។ តែនៅព្រឹកថ្ងៃទី២៩ បន្ទាប់ពីមានការចង្អុលពីជនរងគ្រោះ បុរស២នាក់ត្រូវបានកំណត់អត្ដសញ្ញាណថាជាជនសង្ស័យពិតប្រាកដ។ បច្ចុប្បន្នជនទាំងនេះ ត្រូវបានកសាងសំណុំរឿងដើម្បីចាត់ការតាមនីតិវិធីហើយ។
បើតាមការបញ្ជាក់ពីលោក លី សំរិទ្ធ ក្នុងហេតុការណ៍នេះអភិបាលខេត្តសៀមរាប មានភាពខ្នះខ្នែងជាខ្លាំងដោយក្នុងនោះលោកបានជួយចេញថ្លៃព្យាបាល សោហ៊ុយស្នាក់នៅនិងត្រឡប់ទៅទីក្រុងបាងកកវិញផងដែរ។ ជាមួយគ្នានេះ អ្នកនាំពាក្យក៏បង្ហាញការសោកស្ដាយចំពោះសកម្មភាពឆក់ភ្ញៀវទេសចរនេះដែរ ដែលធ្វើឱ្យប៉ះពាល់ដល់មុខមាត់ខេត្តទេសរបស់កម្ពុជា ប៉ុន្តែបានបញ្ជាក់ថា កម្លាំងចម្រុះបានខិតខំធ្វើយ៉ាងណាបង្ការមិនឱ្យករណីបែបនេះមានទៀតឡើយ ហើយសកម្មភាពបែបនេះកើតមានយូរៗម្ដងតែប៉ុណ្ណោះ។ លោក លី សំរិទ្ធ ស្នើឱ្យប្រជាពលរដ្ឋចូលរួមសហការ រាយការណ៍ដល់សមត្ថកិច្ចក្នុងករណីមានការសង្ស័យលើជនណាមួយ ដើម្បីកុំឱ្យកើតមានរឿងបែបនេះតទៅទៀត ហើយត្រូវមានការប្រុងប្រយ័ត្នមិនថាទេសចរបរទេសឬបងប្អូនប្រជាពលរដ្ឋខ្មែរ។
គួរបញ្ជាក់ថា ករណីខាងលើបានកើតឡើងនៅថ្ងៃទី២៤ ឧសភា វេលាព្រឹកម៉ោង៦កន្លះ តាមបណ្ដោយផ្លូវកូម៉ៃ។ ស្ដ្រីរងគ្រោះឈ្មោះ FATEMEH ARABSHEIKH បានអរគុណដល់សមត្ថកិច្ចដែលប្រឹងប្រែងរកមុខជនសង្ស័យ ក៏ដូចជារកលិខិតឆ្លងដែននិងសម្ភារប្រគល់ឱ្យខ្លួនវិញ។ តាមការបញ្ជាក់ពីអាជ្ញាធរ ករណីនេះមិនពាក់ព័ន្ធនឹងអ្នករត់រ៉ឺម៉កកង់បីទេ៕
© រក្សាសិទ្ធិដោយ thmeythmey.com